話說下星期就係情人節，嗱嗱嗱，雖然話 ＃真嘢唔好拎出嚟講，都唔好走住先，港女唔係要放閃呀！只係咁啱得咁橋，琴日見到美國有個相睇網站 Match.com 公佈咗佢地對 5500 個 18 歲或以上嘅單身人士嘅調查結果，港女覺得可能對大家有用，想同大家分享下啫，我係嚟幫你地㗎嘛❤️
調查入面，有唔少問題都同科技扯上關係，例如佢有問啲受訪者覺得科技有冇幫到你識人呀，你會唔會憑一個人嘅 fb/ig/twitter… posts 去了解/判斷一個人，有冇試過約網友出嚟呀，約會嘅時候如果撳電話會唔會扣分呀等等。
當中有唔少有趣嘅發現，例如啲後生仔 （生於 90 年代中期或以後）相比起其他年齡層，有多 22％ 嘅人覺得科技令認識另一半嘅難度高咗；有 57％ 單身人士覺得社交網站強調咗「這些機會不是屬於我的」；最值得注意嘅係，個人社交網站帳戶的管理係十分重要。雖然有超過一半人口裏說不話唔會從你啲 posts 去 judge 你，實際上，佢地會睇你影啲相靚唔靚（42％）、英文有冇錯 grammar（39％）（當然呢個講緊美國人，但個人覺得不少港女都係一樣）、笑得好唔好睇（37％）、著啲咩衫（35％）等。而喺香港呢個人人都係 social media 重度用家嘅地方，我覺得呢啲 judgement 係有過之而無不及，蝦蝦蝦。
從另一角度睇，調查入面有接近三成人覺得收到電話 call 係會令人心動；喺社交網站上不活躍亦都係另一個令人心動嘅賣點；相反如果你喺社交網站上非常活躍，或者經常放負，前者有一半人同你講咗 byebye，後者仲衰，58％ 唔會 so 你。所以話，雖然睇人 _ _ 最開心，但人都係鍾意 偽善嘅 正能樣的。
至於約會大忌：用電話，調查結果都有反映到出嚟。約會途中講電話簡直係死罪，有 75％單身人士唔鍾意；其次，有 66％單身人士唔鍾意人約會途中 send message；58％單身人士覺得約會時冚埋部電話就最好喇；亦都有 45％單身人士 prefer 你喺佢面前熄咗個電話。港女就覺得約會途中用電話係好難避免嘅，其實有時都唔使太 harsh，一齊睇下啲搞笑片、可愛動物片都可以係情趣嚟嘅～
最搞笑係 iPhone 用家好鬼 harsh，佢地畀 Android 用家劣評的機會率比其他用家高 21 倍；調返轉，Android 用家畀 iPhone 用家劣評的機會率只係比其他用家高 15 倍咋。唔通用 iPhone 嗰啲人覺得自己高人一等？
仲有一點，就係關於爆 Mon，調查發現原來女人最憎人爆 Mon，有 86％ 女人會畀負皮，如果佢見到個約會對象爆咗 Mon。港女嘅叮囑就係：唔用殼都黏張玻璃 Mon 貼啦，好平之嘛?
分享到 :
最新影片
