每次洗完頭又要梳，又要風筒，仲要出動埋造型夾，手忙腳亂之餘，仲要有搞搞成個鐘。最近我依莉詩就搵到個 Multicurl 擰擰風筒，可以邊梳邊吹邊捲。聽落非常方便，依家就試下 work 唔 work 先。
陶瓷棒+隔熱梳+風筒 3合1
其實 Multicurl 擰擰風筒 同之前試用過嘅 Philips StyleCare 自動旋轉熱風梳 原理好似，都係利用熱風打造想要嘅髮型，不過呢個風筒就更進一步，結合埋隔熱梳同雙層陶瓷棒，一次過做齊梳理、吹乾同定型。洗完頭，用一件工具就可以打造理想髮型，非常方便。呢個風筒比普通風筒重少少，把手有凹位都幾好揸手，但因為佢唔似普通風筒呈 90度，所以吹頭嘅時候要打直吹，手勢有啲怪，要重新學習。
▲ 風筒就好似一支好粗嘅掃把，出風口有多條黑色隔熱梳齒保護，就算握實梳齒都唔會熱。
▲ 隔熱梳入有多條陶瓷棒，加強定型效果。
360度無阻隔扭動
風筒有 3種模式，分別係 120度配強風、140度配弱風 以及 180度配無風，方便打造不同造型使用，可惜無冷風選擇，如果吹得太熱只好停一停。洗完頭，我會選擇用 120度配強風先吹至 8成乾，再轉用 140度配弱風決定吹彎定吹直，而瀏海會用 180度配無風 捲出空氣感。轉換模式都好簡單，一推就可以，就算去到強風，風筒都唔會特別嘈。另外，尾部嘅電源線可以 360度扭動，set 頭時點扭都唔怕電線糾結，變得更靈活方便。而手柄同隔熱梳中間有個可以轉動嘅圈，只要輕輕轉動就可以轉動隔熱梳，唔使隻手轉嚟轉去，用落更順手方便。
▲ 風筒可調校 120度配強風、140度配弱風 以及 180度配無風，方便打造不同造型使用。
▲ 360 度可轉動嘅電線就唔怕轉手時出現電線糾結，變得更靈活方便。
▲ 只要輕輕轉動白圈就可以轉動隔熱梳，唔使隻手轉嚟轉去，用落更順手。
▲ 隔熱梳靠手動轉向，而非按掣轉動，唔怕一時按錯而轉錯方向。
實試 — 吹曲吹直無難度
借得番嚟梗係要試下好無用啦！今次就試下吹曲吹直係咪都做到。
▲ 將一束頭髮放係梳齒間，再轉動白圈，頭髮就會自動圈入風筒內，用 140度配弱風 hold 10 秒左右，就可以做出波浪效果。雖然好快就整得曲，但效果好似唔多好。
▲ 直髮比較容易吹，而且有梳齒 hold 住，單手都做到，頭髮唔會飛飛下，不過始終都係家用，吹出嚟嘅風無專業級風筒咁強，要吹 3至4下先會變直髮。
▲ 曲髮嘅效果相當明顯，而直髮就可以因為吹曲完再吹，所以未係 100%順直。
▲ 近睇頭髮變得好毛燥，睇嚟唔可以經常使用。
依莉詩：「又快又明顯，不過小心傷頭髮」
今次呢個風筒好方便，一次過做齊梳理、吹乾同定型，大大縮短造型時間，而且效果明顯，Keep 得耐。另外，呢個風筒靜過普通風筒，而且好揸手，單手就可以吹直髮。不過可能太強勁，如果吹曲髮會有明顯嘅毛燥，所以都係唔好日日用，怕傷頭髮呢！
Multicurl 擰擰風筒
售價：$450
查詢：Girlylane
分享到 :
最新影片
