昨日 Sony 在電話方面，除了推出 Xperia XZ 外，另一部較被人忽視的機款，就是 Xperia X Compact。這部流著 X 系列血統，但就機身較細的中階機，究竟用落如何？Edward 在現場都試了一陣，而家同大家分享一下。
粉藍色機身堅係靚！膠機預咗
今次這部 Xperia X Compact，屬於中階機款，所以外膠用了塑膠物料製造，有別於之前 X、X Performance 等所採用的金屬機殼，另外亦填補了 X 與 XA 之間的空隙，算是一個不錯的選擇。不過可能正是用了塑膠外殼，所以在用色上才見到 Sony 的大膽，尤其是今次的粉藍版，真係好靚，應該會吸引到唔少後生女入手。
▲粉藍色堅係靚！而且機身前方頂及底，以及機背都是同一色系，十分統一。
▲如果不喜歡粉藍，白色都是一個唔錯的選擇。
此外，由於機身進一步縮細，熒幕進一步減至只有 4.6 吋，令機身闊度大幅縮窄至只有 65mm，Edward 單手揸機及使用都十分舒服，好有當年使用 iPhone SE 的影子。如果你的手掌比較細，又十分重視單手操控效果，X Compact 應該會俾到大家唔錯的感受。
▲單手操控在 X Compact 上真係無得輸！
▲與「大佬」X Performance 比一比，可見 X Compact 真係細了一個圈。
▲其實設計風格與 XZ 幾乎一樣，只是外殼換上了塑膠而已。
▲與 XZ 一樣都換上了 USB Type-C 插槽。
平玩 XZ 頂級功能
雖然 Xperia X Compact 屬於中階機款，與 Xperia XZ 的旗艦機在效能上有一段距離，但在功能上就「過繼」了不少 XZ 的頂級功能，尤其是它的五軸防震功能，在 X Compact 上都玩得到，即是大家可以付出更少都可以拍出更穩定的影片！另外，它與 XZ 一樣都擁有「三重影像感測技術」，同樣擁有高速對焦及準確顏色的特點，即係大家可以平玩 XZ 頂級功能，超級抵讚！但可惜在 X Compact 上，就沒有了 XZ 的 1,300 萬像素前置鏡頭，這一點算是少少 trade off 了。
▲雖然只是中階機款，但 X Compact 仍然擁有 2,300 萬像素鏡頭。
▲另外，鏡頭與 XZ 一樣，都擁有「三重影像感測技術」，對焦一樣快而準。
▲影相出來的效果都唔算差呢！
▲最令筆者驚喜的，是 X Compact 作為中階機，都一樣有五軸防震功能！如果預算有限買唔到 XZ，X Compact 在拍片上都一樣幫到你。
▲唯一可惜係前置鏡頭只有 500 萬像素。
熒幕質素算夠用
至於熒幕方面，畢竟 X Compact 屬於中階機款，所以很難像 X Performance、XZ 般擁有 1080p 熒幕，所以 X Compact 今次就採用了 4.6 吋 720p 熒幕，一般使用來說其實都夠用，唯一是睇細字邊位可能會有少許「狗瓦位」，但如果不是放得很大來睇，都唔會太覺，整體都可以接受。至於色水方面，筆者覺得它屬於偏暖色系，睇落幾舒服，而且可視角度都幾闊，最少大家係使用時應該不會有太大 hard feeling。
▲熒幕質素以 720p 解像度來說算是不錯了。
▲可視角度都算幾高，但側面睇有少少變暗，好彩唔算太嚴重。
總結：細細部好揸手粉藍係堅靚！
總括而言，今次 Sony 同場推出 Xperia X Compact，筆者覺得對於預算不多，但又想平玩 XZ 的頂級攝影及錄影功能，確實可以考慮。此外，值得一提的是它採用了 Qualcomm Snapdragon 650 處理器，效能已可滿足一般日常需要，即使用來打機都夠力之餘，它亦相對比 Snapdragon 820 處理器的機款省電，如果大家想搵部慳電一點的機款，X Compact 應該是不錯選擇。
分享到 :
最新影片
