提起哥斯拉你可能會諗起超人打怪獸，但其實哥斯拉電影係無超人呢個角色架！如果想喚醒番你對哥斯拉的記憶，除咗可以睇即將上映的電影 「真．哥斯拉」之外，仲可以去一風堂一邊食住拉麵一邊同哥斯拉來個親密接觸添！我依莉詩今日就試過哥斯拉的味道啦！
主題佈置唔多零影相位
雖然話所有香港一風堂分店都有哥斯拉為主題作佈置，展示多款哥斯拉於電影中的不同造型。不過以我今日到新港中心分店睇，暫時最特別的裝飾只有牆上的 3D 貼紙，好似哥斯拉爪伸出嚟一樣。如果想影相打卡，就只有哥斯拉對白的 props 比較吸引。講真其實今次無乜影相位，亦唔算係一間主題餐廳，我諗只係純粹 Gimmick 罷了。
▲ 據說哥斯拉會係一風堂 Facebook Page 預早發佈自己的出沒地點，想捕捉佢的話就要留意啦！
▲ 睇真 D 門口的紅白剪影就會發覺有哥斯拉隱藏係入面。
▲ 牆上有哥斯拉同各種怪獸的貼紙，佢地就好似要破牆而出咁。
▲ 每張枱都有電影對白的 props，俾你影下得意既相。
拉麵有蝦味但零裝飾
以為哥斯拉主題肯定會有「哥斯拉拉麵」？咁你就錯啦！雖然話新出的特色拉麵，概念取材自 1966 的經典哥斯拉電影『南海の大決闘』，同時亦新推出咗全新 menu，不過當中一 D 哥斯拉裝飾都無，幾好食都聯想唔到哥斯拉吧！
▲ 野菜餅角包 ($28)
柔軟的角包内夾住香脆的野菜天婦羅餅，内脆外軟，而且無油膩感。
▲ 黑松露汁博多一口餃子($48)
餃子不過不失，皮唔會太厚，但都唔脆，吞完無乜特別感覺。至於黑松露汁亦唔太香，只係少少鹹。
▲ 五周年海老豚骨拉麵 ($88)
新 Menu 的重點係五周年海老豚骨拉麵，概念取材自 1966 的經典哥斯拉電影『南海の大決闘』，好有海洋的味道。中太麵加入蝦子同蝦粉，更加一點彈牙，上面更有蝦醬同海老 XO 醬製成的海老肉味噌，又鮮又辣，令海老豚骨湯底去到另一個層次。鮮蝦肉雲吞同兩隻海蝦就係整碗麵的靈魂，鮮味彈牙。
▲ 雪糕銅鑼燒 ($28)
雪糕的抹茶味唔太濃，亦沒有苦澀味，只有淡淡清香，配合鬆軟的銅鑼燒同甜甜地的紅豆，好啱夏天食。
依莉詩：「好唔哥斯拉」
坦白講，今次一風堂搵哥斯拉做主題好似純粹 Gimmick，無乜影相位之餘，食物都無裝飾。最特別就只有牆上的 3D 貼紙，所以就可以唔太需要因為哥斯拉而去。
一風堂ｘ哥斯拉
地址：香港九龍廣東道30號新港中心2樓210號鋪
查詢：2957 8893
分享到 :
最新影片
