見到唔少大廠推出手提電話都十分著重鏡頭，今日 Motorola 亦都推出了一款主打影相功能的 G4 PLUS，究竟呢部機以 $2,699 作為定價又抵唔抵玩？當中的影相功能又是否可以滿足到較有要求的用家，而家就等小編同大家分享一下初步試玩評測。
「真‧指紋」解鎖
去到今日，基本上大部份的智能手機都會配備指紋解鎖功能，一來可以提供比數字或圖形鎖更安全的保安，而且解鎖速度亦都更快。MOTO G4 Plus 在機身下方位置都加入了指紋解鎖功能，解鎖反應確實係相當快，不過這個指紋解鎖就單單只有解鎖功能，並不像其他電話可以當作 Home 鍵使用，所以除了解鎖之外便無任何功能，好似小編咁習慣用其他機的話，好多時都會習慣性地按下去。
▲指紋解鎖快，但可惜就唔可以當 Home 鍵用，起初用確實會好唔習慣。
影相對焦快 選單夠就手
如果講到今次 G4 Plus 的賣點，相信就是影相功能，當中鏡頭像素就提升至 1,600 萬像素，仲加入鐳射和相位對焦技術，初步試過對焦速度的確幾快，只要在熒幕上點選對焦點就完成對焦，而且對焦完仲會彈出一個亮度調整圈，等大家可以更容易調整光暗。整個影相選單用落都好就手，對焦距離、白平衡、光圈、ISO 到 EV 值透過半圓形選單就已經可以進行調校，比起要進入選單慢慢調整更直覺，亦都可以即時睇到實際效果。不過，G4 Plus 就拍唔到 4K 片，又冇加入任何 OIS 防手震功能，可能會令唔少人卻步，至於個一搖影相功能其實好雞肋，大家又會唔會影相前搖一搖部機？
試相
▲全自動模式下，明顯見到會有偏藍的問題。
▲室內試影，在一般燈光下，都會有偏暗的問題。
獨立雙 SIM 槽唔洗爭位用
雙卡雙待唔可以話係一個賣點，不過現時好多機都會將第二張 SIM 卡槽同 microSD 卡共用，即係話想要雙卡功能就要放棄 microSD 擴充容量，反之亦然。G4 Plus 就同時保留了 2 個獨立 SIM 卡槽同埋一個 microSD 插槽，會為用家帶來更大的方便，唔洗再二揀一咁麻煩。加上佢個機背殼都算好易拆，唔似得部份機個設計要用好大力甚至要用小工具先開到個機背殼，對於好似小編咁經常要出 Trip 成日要換 SIM 卡來說就更方便。
規格未見驚喜
以一部 $3,000 樓下的電話，各位 wire 民就唔好對 G4 Plus 的規格有太大的期望，部機用 Qualcomm Snapdragon 617 處理器，在效能同功耗上取得平衡，加上 3GB RAM 同 32GB ROM，對一般用家來說都夠用既。至於 5.5” 熒幕就令到部機大小適中，單手用都幾順手，不過就只係 TFT 級數，係陽光下使用就明顯覺得唔夠光。
叉 15 分鐘用到 6 個鐘
今時今日同大家講部機用到幾多個鐘都未必太過實際，始終要捱到成日電就要加大容量，變相令到部機又厚又重。Moto G4 Plus 就加入 TurboCharging 快叉技術，廠商聲稱充電 15 分鐘就可以用到 6 個鐘，但就要用返原廠充電器先做到，因為當中最高可以支援 12V 輸出。不過，G4 Plus 有一個較大的缺點，就係經初步試玩大約半個鐘左右，就會明顯感到機身較熱，可能同部機用膠殼有關，始終散熱效果會比起金屬殼差。
辛尼評語：整體未算吸引
Motorola 雖然被 Lenovo 收購，今次推出的 G4 Plus 其實以定位來說有點尷尬，售價 $2,699 但整體規格來說唔算好吸引，指紋感應器未能當 Home 鍵用已經扣分，上手膠感較重加上機身較熱亦是缺點。小編最欣常就唯有其相機的選單同快速對焦。
建議售價：$2,699
查詢：Distribution One Ltd.（2789 0877）
