因為我知道，佢已經唔再明白我。佢問我有咩好睇，我真係唔想答佢。有三角戀？有爭家產？有 BBQ 大團員？真係膚淺。權力遊戲每一個角色都有佢既歷史，佢既故事，T_B 劇究竟有 D 乜？根本就好似 D 白痴港女咁，一無所知，戇 _ _，生勾勾。
好啦潮文用完，係時候入正題。權力遊戲第六季終於開播，我苦等 Jon Show 之謎等左成年，喺上幾集終於得償所願，知道結果，呢個過程真係既期待又怕受傷害。老實講，權力遊戲已經成為左我每星期唯二既精神支柱 (另一支係甲鐵城)，你話星期一要番工好唔開心好眼瞓唔想做野，我就話依家最期待既就係星期一呢一日，連星期日放假都想時間快啲過去。一到咗星期一，個人精神咗，做野快咗，連病都少咗。當然每個星期一睇完，換來既就係無盡既失落，因為我又要等一百六十八個小時，即係一萬零八十個分鐘，我先可以睇到下一集。
你問「哇，有無咁 _ 誇呀」，咁問得，可能係你無睇開呢套野，咁我唯有盡力講吓。(筆者唔係專業既影評人，只能夠喺核心既外圍去講呢套劇) 權力遊戲入面有好多個 Great Houses 大家族，去分別管治、或者係曾經管治 Westeros 大陸上既七大王國 Seven Kingdoms。不過如果你以為呢個係戰爭片，睇兵法同打仗，咁你又錯。劇入面其實極少戰爭場面，連打鬥都係幾集先有少少，一切以「人」同劇情為主，可以話係劇力萬鈞，比電影更好睇。首先觀眾會以 House Stark 家族，一個北方英名領主家族既角度去睇成件事，佢地成家比 House Lannister 害到 PK，但當你視 Lannister 為敵人既時候，慢慢睇落去你又會改觀，當然仲有好多個 House 既線不斷發展。喺權力遊戲入面，成個世界都好反覆，好黑暗，好暴力，同好現實，而且仲有好多超越劇集常規、意想不到既「超展開」，同埋令你咬牙切齒，或者嚇到 _ 都縮埋既情節 (例如S601 Red Woman..)。如果你話虛淵係暗黑編劇之神，咁權力遊戲既作者 George R. R. Martin 應該係暗黑編劇既 DIABLO，暗黑破壞神。
好喇講番今季第六季，因為劇組進度快得濟同太多人等既關係，今季將會比第五季更加偏離原作小說，而且會開展小說之後既原創劇情。換句話說就快連小說派都無得劇透純劇集派，一切發展無人知，雖然唔太影響筆者睇劇事 (原諒筆者無睇小說)，不過呢種展開真係集集更令既期待又怕受傷害，例如上兩集超關鍵位既 Tower of Joy，就差一點點比小說更早引證某個猜測 ….. (唔講得)。
呢篇文係比較淺白，因為權力遊戲實在太大，筆者實在唔識寫，而且亦唔想有任何劇透。不過我真係想同大家推薦呢套劇，總之你無睇既話係非常非常非常之可惜。
