電影敘述嘅方式越來越多，就好似最近 Deadpool 就選擇咗打破「第四面牆」，同觀眾對話；而係 4 月 21 日上映嘅《爆機特攻》則選擇咗以第一身視角，令觀眾代入主角角色，進行連番苦鬥。《爆機特攻》嘅宣傳﹑預告雖然稱唔上鋪天蓋地，但每次見到都非常吸引住筆者；即使見到爛番茄上僅有 51% ，亦都無阻筆者入場嘅心情。咁睇完之後到底佢又有無令我失望呢？
第一身視角似足打機 難以言喻嘅爽感
故事講述「你」就係《爆機特攻》主角 Henry ，一開眼你完全失憶；而係你眼前嘅就係稱係你老婆嘅 Estelle 。好快就被強大僱傭兵集團殺到埋身，亡命逃走之際，老婆更不幸被擁有異能的 Akan 擄走。係一個陌生嘅城市，子彈橫飛﹑炸彈亂爆，個個都想置你於死地，唯獨係 Jimmy 似係同道中人。你一身疑惑，只可以拍住 Jimmy ，憑住勁揪嘅改造軀體上天下海，見一個殺一個，誓要救返老婆，破解身世之謎。
《爆機特攻》最大賣點當然就係觀眾可代入主角 Henry 嘅角色（一起身仲有個靚女老婆 XD），而且係「你」老婆幫「你」裝返聲線之前， Akan 就殺到嚟，結果一直 Henry 都無出過聲，亦係令觀眾更易代入 Henry 嘅。由開場到結尾，一路都係咁打，十足十將打機變做電影化，其實比預告個感覺來得爽啊！
評分低？ 全因劇情太過唔合理！
雖然係咁，但《爆機特攻》評分低﹑影評又多係負面，咁到底問題出咗係邊呢？其實就係劇情比人感覺斷斷續續，而且仲有好多唔合理位令到觀眾好疑惑。
首當其衝嘅當然就係， Jimmy 不停死完又出現，死完又出現，死完再繼續出現（因為佢真係死咗好多次），去到電影後半才解釋點解佢好似有「不死身」咁，絕對係成套戲最大疑問之一。第二，明明 Jimmy 係電影開頭話 Henry 嘅電力有限，最多只有三十分鐘；但係真正見到 Henry 充電嘅畫面，筆者並唔太覺眼，而且經常畫面窒下窒下想表示就無電（或者被打到壞壞地），但每次畫面黑一黑幾秒又繼續接返情節，完全無「斷片」情況出現過。更甚者，電影中 Akan 個角色設定好無敵咁，有人話似磁力王，不過筆者就覺得佢似鳳凰女男版多啲姐；總之，異能人士建立起一對新機械人軍隊，要比 Henry 來得新同強，但就十幾人好快就被 Henry 輕易打低。而且更低能係，明明 Henry 一直連行近 Akan 都無辦法，比佢異能所控制住；但電影結尾 Akan 想搭直升機走時，卻輕易地被 Henry 捉到並斬甩個頭。 Um… 點解有異能都瞬間變到咁弱？
18+ 畫面唔用第一身太可惜 畫面震動幅度仍難接受
今次《爆機特攻》之所以會係三級，除咗因為用第一身打鬥血腥，其實亦係因為有一個 18+ 部分。當中 Henry 來到一間脫衣舞俱樂部搵 Jimmy ，而 Jimmy 就正係房同一班脫衣舞孃… 你懂的。成個部分嘅裸露程度都非常大膽，而筆者就以為「我最期待的畫面出現了！」，點知去到最後都無以第一身做，但卻有 Henry 幻想嘅老婆意淫畫面，可以話真係點到即止，不過咁先係正常嘅 XD ！
而成套戲最可惜就係，震動幅度仍然大得誇張，只係睇咗半個鐘已經好頭暈。雖然用第一身視點加打鬥，震動多多少少一定避唔到，但既然要搬上電影應用，筆者會以為係可以接受嘅範圍；但卻發現睇得耐真係要閉眼抖一抖再睇先會舒服啲。
總結：「第一身視點似足打機咁爽 唯劇情須砍掉重練」
整體而言，我覺得《爆機特攻》係一個好嘗試，但就仍然有好大嘅進步空間，尤其係加強劇情嘅合理性同點樣再減低震動令觀眾無咁頭暈呢兩方面。推唔推薦入場睇？如果你自問好鍾意打機，都可以不妨入場一看；但話又說回來，如果劇情做得唔好，又係咁震係咁震，點解唔去機鋪打機而嚟貼錢買難受呢？
分享到 :
最新影片
