日日番工食頹飯已經夠慘，間唔中放下假都想慰勞下自己。其實係觀塘食嘢有平有貴，今日我依莉詩就帶大家去呢間主打來自日本各縣的和牛燒肉店食好西啦！
主攻和牛燒肉
雖然話係偶然豪一餐，但都要比得值嘛！今次介紹呢間主題日式燒肉店叫 「萌MOE by Nishimura」，上年年底開業，不過因為商場比較新，未必有人知。而燒肉店主打來自日本各縣的和牛燒肉及新派日本料理，從日本最南的沖繩縣，及九州的宮崎縣及鹿兒島，以至最北的北海道，定期購入原隻和牛，從中嚴選最頂級部份，，讓食客一次過品嚐不同地域的特色風味。
1)「萌之牧場」黑毛和牛燒肉拼盤
人少少又想一次過試晒沖繩、宮崎 及 北海道 和牛，我建議揀「萌之牧場」黑毛和牛燒肉拼盤，入面有齊宮崎黑毛和牛肉眼、上助肉，沖繩 Motobu 牛西冷、上肩肉 同 北海道黑毛和牛肉眼、上助肉，每款 2片。宮崎黑毛和牛肉質美味、沖繩 Motobu 牛雪花細緻肉質嫰滑鬆軟，入口即溶之餘有更氣牛味，而北海道黑毛和牛肉質結實，肥而不膩。每款試過之後再添食，咁就唔怕揀唔啱口味。
售價：$780
推薦度：★★★★★
2) 「至 Ture 初戀」牛助肉
來自鹿兒島的「至 Ture 初戀」牛助肉係牛中最幼滑的部份，肉質軟腍適中，肉味濃厚。
售價：$128
推薦度：★★★★☆
3)「至Pure美少女牛」薄切和牛
同樣來自鹿兒島的「至Pure美少女牛」薄切和牛油花均勻，入口即溶。
售價：$108
推薦度：★★★★☆
▲ 食燒肉當然要配埋醬汁，呢度有柚子燒肉、鹽粷、蜜糖芥末 3款特製醬汁帶出和牛的鮮味和芳香。
4) 沖繩沙律菜
食咗咁多肉，應該要食番 D 菜中和下油膩感。呢度有 9款特色的沖繩沙律菜提供，而我推介芥末沙律菜，入口有淡淡的日式芥末味，非常特別。
售價：待定
推薦度：★★★★☆
▲ 和牛夾菜一齊食，入口首先感受到淡淡的日式芥末風味，然後和牛油香一擁而上，味道辛口富層次，為和牛提味之餘，同時減少油膩感。
5) 北海道產豚肉腸
除咗牛，都可以試下豬嘅。呢碟腸仔用原條豚肋骨做，以豚肉配上惹味黑椒調味製成，製作過程以白樺木炭火烘乾。最特別的是特別口味的抺茶豚肉腸、無塩漬豚肉腸 同 墨汁豚肉腸，齋睇顏色已經夠突出，一定要試下。
售價：待定
推薦度：★★★☆☆
▲ 身為抺茶控的我食過抺茶豚肉腸之後，反而推介骨付豚肉腸，因為抺茶豚肉腸無咩抺茶味，反而骨付豚肉腸的肉汁更吸引我。
6) 「山萌海誓」海鮮盛合
此外，海產都係必燒的美食。呢個海鮮盛合有日本直送的鰻魚、海老、魷魚、廣島蠔同帶子，每樣有兩件，兩個人食就啱晒。
售價：$380
推薦度：★★★★☆
▲ 廣島蠔海水味濃，肉質飽滿，食一隻真係唔夠。
7) 雪糕雕魚燒
就算已經食到飽飽，但見到呢條咁可愛的雪糕雕魚燒都一定要食得落肚。雖然雕魚燒樣的雪糕三文治係便利店都見過，但輕輕一燒之後，外表脆卜卜，加上入面的紅豆同曲奇口味雪糕，完全係另一個層次，令呢餐畫上完美的句號。
售價：$35
推薦度：★★★★★
▲ 原來燒過的雪糕雕魚燒咁好食，搞到我番屋企整下。
立食零售區
燒肉就一定要坐定定係度食，如果平時食 lunch 可以去「立食零售區」，唔單止有新鮮生蠔、和牛及便當等堂食或外帶，仲有和牛咖喱丼、便當及特色飯團，方便上班一族輕鬆速食午餐。
▲ 飯糰加包沙律菜，就可以享受中環級的 lunch 啦。
依莉詩：「偶然要豪一次！」
今次呢間燒肉店走高檔路線，甚至比牛角更貴，不過質素亦更高，所以性價比都唔太低。而且店內工業風的裝修充滿格調，通風良好沒有太大油煙，坐得舒適。加上有靚仔店員幫你燒埋，偶然好一次都應該嘅！至於立食區，如果以係觀塘食 lunch 嚟講飯糰同沙律菜的價格都偏貴，應該係中環的級數，所以唔算太吸引。
萌MOE by Nishimura
地址: 觀塘駿業街56號中海日升中心1樓A號舖
開放時間：12nn-11pm
電話：3974-5138
分享到 :
最新影片
