正所謂以人為本，相信好多 Wire 民都好著重用家體驗，所以最近 Unwire 就同 Samsung 舉辦咗兩場「Samsung Galaxy S7 / S7 edge 體驗日」，場面仲非常墟冚添。當日過百位參加咗活動嘅 Wire 民不但可以破天荒咁一人一機，唔駛等仲可以即場任玩新機同埋 Gear VR 眼鏡，以下就等 Unwire 為大家報道返當日嘅盛況啦！
「真．一人一機」任玩
今場嘅 Samsung Galaxy S7 / S7 edge 試玩會廠方準備咗大量嘅新機俾各位參加嘅讀者可以一人一機試玩架！你無聽錯，真係一人一機！就咁睇見都覺得個排場好勁呀！同場仲有 Samsung 嘅 Gear VR 眼鏡俾大家試戴睇下效果同埋好多唔同種類嘅配件！大家就可以一路玩住手機等試 Gear VR，唔駛排隊呆等，中間完全無悶場！
▲想一次過睇到咁多部全新嘅 Galaxy S7/S7 edge 同配件，除咗嚟試玩會相信都冇咩邊度有咁多機任你玩任你試！
Samsung 代表介紹手機功能：
▲Samsung 產品專員 Ivan 就為大家介紹 Galaxy S7 / S7 edge 嘅全新相機有咩特別，兩款新機採用咗 Dual Pixel 技術，除咗喺低光環境底下有更好嘅感光度同細緻度外，對於一班鍾意自拍嘅用家嚟講絕對係喜訊，事關佢有 f/1.7 大光圈功能，再加上屏幕補光燈，自拍都無難度。
▲Samsung Galaxy S7 / S7 edge 用上咗抗水防塵塗層技術，符合 IP68 等級規格，有時出街落雨都唔使擔心手機會因為入水而整壞部機。
▲ Samsung Galaxy S7 / S7 edge 立體顯示能力比上一代 Galaxy S6 高出 67%，遊戲嘅表現更加出色，而家佢係功耗控制上做得更好，更加慳電。
Unwire Edward 教你用盡 Galaxy S7 / S7 edge：
講完咁多 Spec，相信好多用家都急不及待想試下係日常生活入面可以點樣用盡部手機啦！今次繼續由 unwire 首席記者 Edward 與大家分享。
▲Edward 試用 Samsung 嘅 Galaxy S7 edge 去影鮮花，盛讚比起其他手機影出嚟更加清晰同層次分明，邊位亦更加銳利，唔會濛咗一堆色。好多用家都對呢項功能好有興趣喎！
▲ 佢仲非常欣賞 Galaxy S7 edge 打機時可以用封鎖通知、直播打機功能，仲有個鎖定功能鍵設定，可以避免平日唔小心「揩」到個掣而令到 Game Over！啱晒機迷！
▲因為機背用咗弧形玻璃設計，Edward 覺得就算好大力握落去都唔覺唔舒服，單手使用都非常容易！
Galaxy S7 / S7 edge + Gear VR 體驗部份：
兩位嘉賓講咗咁耐，大家都急不及待想拎機上手玩架喇，我哋即刻睇吓當日試玩嘅盛況啦！
▲各個參加者都好專心咁試用緊 Galaxy S7 / S7 edge 內嘅新功能同相機功能，好似好多人都對 Galaxy S7 edge 嘅側面屏幕好有興趣喎！
▲咦？點解會黑晒嘅？原來係想俾大家試真啲 Galaxy S7 / S7 edge Dual Pixel 相機嘅威力！大家可以留意右下角果部手機，即使係極暗嘅環境都可以影到非常明亮嘅圖像，好多參加者都認為 Galaxy S7 / S7 edge 能夠俾到驚喜佢地！
▲唔止主鏡頭，就連前置鏡頭嘅低光環境拍攝能力都非常強勁，全因為佢嘅 f/1.7 大光圈使吸光能力更強！睇下兩位美少女自拍得咁開心就知啦！
▲大家又做乜轉而影住個投影幕？原來係試緊第二個 Galaxy S7 / S7 edge 嘅另一個強項，就係強大嘅遠攝功能，小編都試過，離遠影出去投影幕度，即使 Zoom 近咗但字體依然清晰可見。
參加者訪問:
▲黃小姐 (左) 話好鍾意 Galaxy S7 嘅相機，因為估唔到連前鏡頭嘅感光能力都咁強！不過如果俾佢揀，佢會揀 Galaxy S7 edge，因為佢個曲面屏幕好實用；至於翁小姐 (右) 則表示佢都有用手機打機嘅習慣，因此覺得 Game Launcher 好有用，尤其係封鎖通知果項功能，令佢可以專心啲打機唔驚死咗要由頭玩過。
▲何先生就話兩部新機嘅 Dual Pixel 相機功能最令佢眼前一亮，用 Galaxy S7 系列手機影相真係唔錯嘅選擇。
▲同場當然唔少得試玩 Gear VR 啦！好多人都對呢部 Gear VR 好有興趣。曾先生就覺得 Gear VR 比想像中有驚喜，簡單易用，操控介面都係用頭嚟控制個指標，感覺好得意，而且戴上頭又唔覺得好重！
▲體驗日去到尾聲，亦設有獎問答遊戲環節，大家都爭相搶答問題！
▲最後恭喜上面幾位讀者搶答成功，能夠拎到我哋嘅獎品！睇到佢哋咁滿足嘅表情，相信佢哋都對今次 Samsung Galaxy S7 / S7 edge 體驗日都非常滿意！
▲只要喺 2016 年 3 月 11 日到 4 月 3 日期間，購買全新嘅 Samsung Galaxy S7 / S7 edge，即額外送多一年主機保養優惠，價值 HKD $399 架！
未完！想試玩仲有機會！
同大家回顧完 Samsung Galaxy S7 / S7 edge 體驗日，係咪都好想再有同類活動呢？嚟唔到嘅讀者朋友唔駛擔心，因為之後 Samsung 將會係銅鑼灣舉辦 Samsung Galaxy Studio 體驗館，並附設 Gear VR 4D 動感戲院，詳情如下：
日子：2016 年 3 月 11 日至 4 月 4 日
地點：銅鑼灣怡東廣場
Samsung Galaxy S7 / S7 edge 仲有好多唔同嘅功能，如果有興趣嘅讀者，不妨參考返 Galaxy S7 / S7 edge 嘅網站 或是我哋之前做過嘅評測啦！
