香港行貨 iPad Pro 開箱 + 手感重量分享

大家等咗好耐部 iPad Pro，終於宣佈會係香港時間今日稍後時份正式發售。呢部機價仲貴過部 MacBook Air 嘅平板，今日凌晨就神秘到咗 unwire 編輯部！而家就等 Edward 係大家未瞓之前，新鮮滾熱辣同大家來個開箱文同埋初步手感分享先啦！

巨！包裝盒仲大過新 MacBook

首先 Edward 拿到包裝盒，第一時間嘅感覺：好巨！巨到即刻拿部新 MacBook 包裝盒來比一比。唔比猶自可，一比真係嚇一跳，原來 iPad Pro 連盒都大過部手提電腦！認真誇張。筆者手上呢部係 iPad Pro 4G + Wi-Fi 128GB 版本，盒入面除咗部機，仲有啲乜？一開都係個啲 basic 嘢啦：說明書、SIM 卡匣取出針、火牛同埋 Lightning 線。值得留意嘅係，iPad Pro 條 Lightning 線比 iPhone 同埋其他 iPad 跟機嘅 Lightning 線足足長咗起碼一半！果然唔止機身夠巨，連條線都長過人呀下！

▲呢部就係大家等咗好耐嘅 iPad Pro 啦！

▲香港行版 iPad Pro，型號為 A1652，筆者手上呢部係 4G + Wi-Fi 128GB 太空灰版。

▲上番官網睇，iPad Pro 有太空灰、銀色同金色選擇，而容量方面，只係 Wi-Fi 版先有 32GB 同埋 128GB 兩個容量選擇，而 4G + Wi-Fi 版就只有 128GB 版本，即係筆者手上面呢部。

▲咁啱公司有部新 MacBook 嘅包裝盒，一比見到 MacBook 包裝盒仲比 iPad Pro 嘅細，認真誇張！

▲好啦，開盒！見到部 iPad Pro 真身了。

▲先拿起部機，見到下面有火牛插頭，上面就有個信封。

▲入面不外乎都係 SIM 卡匣取出針同埋說明書等等。

▲拿起信封，下面就係個火牛啦。

▲今次呢個火牛輸出電壓有成 12W 2.4A，應該係特別為 iPad Pro 而設啦。

▲仲有，盒下方仲有條 Lightning 線，驟眼睇已經長過一般 iPhone / iPad 跟機嘅 Lightning 線。

▲一度，果然長起碼一半！

以呢個尺寸算輕囉

好啦，講番部主角：iPad Pro 啦。其實佢個設計同 iPad Air 2 同埋 iPad mini 4 都係一樣，只係尺寸特別大唧，呢度筆者就唔多講啦。唯一唔同嘅係佢唔似 iPad Air 2 / iPad mini 4 咁只係機底有對喇叭，而係機底機底都有，夾埋有 4 個喇叭單元，仲要唔係集中係中間，而係分散係機身四角。究竟咁嘅設計會唔會好聲咗？稍後嘅測試再同大家玩盡佢哋！

▲iPad mini 4 喇叭位於機底，而且集中係中間 Lightning 插槽兩側。

▲而 iPad Pro 喇叭有 4 個，分別係頂部兩個同埋底部兩個，而且較接近角位位置。

▲iPad Pro 同其他 iPad 另一唔同地方，就係機身左側有 3 點金屬點，係用來接駁 iPad Pro 專用鍵盤嘅。

唔好諗住單手用

講番手感，一部 12.9 吋（姑且當佢 13 吋啦）嘅平板，其實大家都唔預好輕，官方表示佢嘅重量為 723g（4G + Wi-Fi）/ 713g（Wi-Fi），尤其是如果大家拿慣 iPad Air 2、甚至 iPad mini 4 嘅話，一定會感受到佢有一定「份量」。不過筆者當年都有用過第一代 iPad，雖然官方話重量相同，但可能 iPad Pro 真係比第一代 iPad 薄好多，所以感覺好似輕咗少少咁，當然單手拿住來用肯定好快會手累啦，但如果雙手捧住用，都仲叫唔算太重嘅。

▲iPad Pro 其實都有一定份量，尤其是用開 7.9 吋 iPad mini 系列嘅 wire 民，感受會係最深。要單手長時間拿住 iPad Pro，睇來大家要練大隻啲個手瓜先得了，筆者率先投降！

▲兩隻手拿住來用，舒服好多！

▲最好就係配埋個專用鍵盤，座係檯面用啦。（鍵盤試用感稍後再同大家分享。）

▲如果講薄，iPad Pro（左）其實比 iPad mini 4（右）厚，前者為 6.9mm，而後兩部都係 6.1mm，厚咗 0.8mm 咁啦，不過機身大咗咁多，都合理嘅。

連埋 Keyboard 其實成部 MBA 咁重

可能有 wire 民會問：咁佢可唔可以取代部 MacBook Air 咁拿出街做嘢用？功能上可唔可以，因為筆者都係啱啱拿到，所以未有時間試，不過如果單純以重量去計，以 11 吋 MBA 都去到 1.08kg，咁 iPad Pro 嘅 713g / 723g 又真係唔算得啲咩。咁當然啦，就算佢夠輕，都要佢功能上可以取代到部 MBA，先至可以俾大家取代手提電腦，單係拿住部 iPad Pro 出街做嘢。呢點大家就等筆者一等啦，轉頭就同大家試盡佢！