要成為一個稱職嘅新手爸爸媽媽一 D 都唔容易，唔好講換片、沖涼，只係沖樽奶都好有學問，無論水溫、份量、奶粉同水嘅比例都要好準確。有時覺得，如果沖奶好似沖咖啡咁易就好啦！最近就俾我發現呢部 BabyNes 智能沖奶機，一按就可以沖到 BB 啱飲嘅奶，於是就借咗部番嚟試下。
60秒即沖啱溫度嘅奶
每次沖奶，除咗要量奶粉同水嘅份量，並且仲要校啱水嘅溫度。過程本身已經複雜，如果 BB 仲一路喊住要食奶真係忙到手忙腳亂。而呢部智能沖奶機就好似膠囊咖啡機咁，只要入個奶粉膠囊入去，襟個掣 60秒就可以沖到一支奶粉同水嘅比例適中，而且啱水溫嘅奶，唔怕 BB 燙到。我就試沖過一杯，D 奶都幾滑，唔會唔溶，溫度都易入口，但就有一層泡，而且一個可沖 240ml 嘅膠囊，沖出來只有 230ml 左右，唔知 BB 會唔會唔夠食呢？
▲ 按鈕可以每次調校沖調溫度，根據個 B 喜好可選擇室溫至最高 40℃，唔怕 BB 燙到。
▲ 每個膠囊背後都有條碼，沖奶機可以由此識別各款配方奶粉膠囊嘅份量，以使用準確嘅水量沖調。
▲ 水箱容量約 0.8升，夠沖幾奶，而且水箱可以移除，方便沖洗同消毒。
▲ 底座有個防滑墊可以拎出嚟方便清洗。
▲ 沖出嚟嘅奶口感順滑，無結塊，但就有一層氣泡。
使用惠氏香港代理奶粉 成本一樽約 $20
平時一罐奶粉食成兩三個星期，每次沖都要打開個罐再量適當份量嘅奶粉，撇除眼矇矇倒塌奶粉嘅問題，日日開嚟開去好易會潮濕或者入咗塵。而用奶粉膠囊就可以避免呢個問題，密封包裝，每次一粒膠囊唔洗量份量，而且每個都有過濾器可以過濾水中細菌。另外，沖奶機嘅設計可以令奶粉直接從膠囊流入奶樽，唔會接觸到沖奶機，咁就唔怕部機成為細菌溫藏。
雖然膠囊比較衛生同方便，而且已經以 BB 週歲分咗 6種，每種量好足夠份量嘅奶粉同營養成份，唔洗新手爸媽慢慢研究，不過就差唔多廿蚊一餐，生之前唔儲定 D 奶粉錢，真係好難擔得起。
▲ 沖奶機底座高度有5個選擇，可以因應奶樽高度進行調校。
▲ 沖嘅過程中，奶粉會直接從膠囊流入奶樽，唔會接觸到沖奶機，咁就唔怕部機成為細菌溫藏。
▲ 膠囊以 BB 週歲分咗 6種，包括 1個月、2個月、3-6個月、7-12個月、13-24個月、25-26個月，每種都有唔同營養成份同份量，符合一般 BB 嘅需要。
▲ 每個膠囊都係密封設計，而且有過濾器過濾水中細菌，比罐裝奶粉更衛生。
只支援 iPhone App
雖然話係智能沖奶機，支援 Wi-Fi 功能，不過 App 版暫時只支援 iPhone ，如果用 Android 就要經 Wi-Fi 連線上網先可以收到餵哺提示、查看 BB 成長資訊、瀏覽成長小貼士 同 購買奶粉膠囊，而且要先輸入 BB 生日、地址、信用卡資料等之後先用得，步驟都幾繁複。基本上只有餵哺提示比較實用，我就覺得如果可以做到用手機一按就即刻沖就更好，咁就可以睡到支奶沖好先再起起餵奶嘛！
▲ 要先輸入 BB 生日、地址、信用卡資料等之後先用得，步驟都幾繁複。
▲ Android 要上網先睇到，字非常細，唔太易讀。
外出都係要靠自己
沖奶機始終係家電，如果要帶 BB 外出，都係要自己沖奶。幸好沖奶機附送咗個輕便開啟器可以幫你打開膠囊，然後直接將奶粉倒入奶樽，手同樣唔會接觸奶粉，確保衛生。
▲ 輕便開啟器入面有兩個尖角可以界開膠囊。
▲ 放入膠囊後，將開啟器上方左右扭。
▲然後倒轉將奶粉倒入奶樽，再加水沖泡。
依莉詩：「60秒即沖啱溫度嘅奶！」
對於未有小朋友嘅我嚟講，呢部沖奶機真係好方便，就算咩都唔識都可以沖到啱 BB 飲嘅奶，而且密封膠囊外出就唔洗將奶粉倒嚟倒去，衛生好多。不過對於有個女嘅小明嚟講又有另一種睇法，佢覺得沖奶沖多幾次就熟手，未必要花二千買部機係屋企用，而且操作時都幾嘈，怕會嘈到 BB。另外，如果沖奶機有埋暖奶同出暖水功能就更好，咁 BB 飲唔晒 D 奶或者要飲水都可以用得著。
售價： $2,288.00
查詢：惠氏(香港)控股有限公司 (2599 8199)
相關影片﹕
分享到 :
最新影片
