今日 Canon 於香港一口氣推出三部機，包括固定式鏡頭的 G9X 及 G5X 與 可換鏡入門無反 EOS M10。G9X 及 G5X 依然具備高像素的 1 吋感光元件，機身外型方面更帶點復古味道。想知多啲以下有更多詳情。
▲Powershot G 系列加入兩個新成員，滿足不同用家需要。
G9X 滿足需要輕便的用家，而 G5X 則為唯一一部內置 EVF 的 G 系列相機。
PowerShot G5X 
復古味道 新增機面轉盤
G5X 外型擁有近年相機常見嘅復古味道。方方正正嘅外形，加上黑色機身，令全機散發專業嘅感覺，即使有人會話「依個年代仲用 DC？！」，但 G5X 專業硬朗嘅外型絕對唔會俾人話係「DC仔」。相比起入門級嘅 G9X 及 M10， G5X 係比較多實體按鈕及轉盤，除咗常見嘅曝光值轉盤、Mode 轉盤、鏡頭控制環 等，今次仲特地增加一個機面轉盤，用家可以自訂用途，例如用作調教快門、或者快圈等，快速調校拍攝設定。今次 G5X 雖然機仔細細，只重 337g，但手感都唔差，歸功於個手握位，令機仔揸起上黎更貼手。
▲今次仲特地增加一個機面轉盤，用家可以自訂用途，例如用作調教快門、或者快圈等，快速調校拍攝設定。
▲相比起入門級嘅 G9X 及 M10， G5X 係比較多實體按鈕及轉盤
高解像度 高畫面更新率 EVF
頭先講過，G5X 係唯一一部有內置 EVF 嘅 PowerShot G 機，當然個 EVF 一定唔係弱。依個236萬點嘅 EVF 算係好高解像度，並且提供約100%覆蓋率，即是見到啲乜就影到啲乜，唔會見到被 Crop 嘅情況。籮文用 EVF 取景時發現佢嘅畫面更新率比好多其他 EVF 都順暢，用得耐都唔會唔舒服，原來觀景器最高有120fps流暢更新率（啓用後會比較食電），提高捕捉時的精準度，而且色彩表現同光暗對比度都幾好，有返少少用單反光學觀景器嘅感覺。
▲有 EVF 同時亦有熱靴
Touch Screen 任你扭
另外，PowerShot G5 X 配備3吋104萬點 Touch Screen，螢幕可向機側外翻並旋轉約270°，方便高低不同角度取景之餘仲啱晒用黎自拍添！而且支援多點觸控操作，除咗用黎㩒 Menu 教 Setting 外，亦可以督一督螢幕黎對焦及拍攝，亦可以用 Multi Touch 黎放大縮細照片，或向左右橫撥黎睇前後影像，就算係 Smartphone 升級上黎嘅用家都唔會覺得太難操控。
▲螢幕可向機側外翻並旋轉約270°
一粒制搞掂 Share 話咁易
機身右側又見到依粒制，依粒制喺 G9X 同 M10 上都可以搵到。見粒制個標誌係一部手機，就知依一個係分享相片到手機或其他 Device嘅快捷鍵，當然亦唔少得 NFC 連接，對於喜歡第一時間 Share 相片上 Facebook、Instagram 嘅靚仔靚女的確方便得多。講開方便，依部嘢原來可以用 MicroUSB 叉電，用家只要將叉手機嗰條線插入去叉就得，插尿袋亦得，輕便程度大大提升！
像素唔高 但有大光圈與 FullHD 60p 短片
今次 G5X 搭載1吋嘅2,020萬像素高感光度CMOS(背照式)影像感應器，老實講，依家啲手機都有2千幾萬像素，G5X 像素真係唔算高，但勝在有高感光度CMOS、f/1.8大光圈24mm超廣角4.2倍光學變焦鏡頭，就好似要話你知「像素唔代表一切」，因為G5X有高感光嘅優勢，喺昏暗地方影相亦有良好表現，而且有大光圈，要影淺景深效果就非常容易。不過得 4.2 倍光學變焦，籮文就覺得少咗啲，如果要影雀仔影遠嘢嘅朋友仔就可以考慮返25倍光學變焦嘅G3X。除咗影相之外，不少朋友都會用相機拍片，全高清就唔少得，但今次加入60fps短片拍攝，拍出黎更順暢，影運動短片都得，而且後製空間亦更大。
▲2,020萬像素話大唔大，話細唔細，都夠晒用啦。放大連每條頭髮每條眼睫毛都可以清楚數到。
▲動態範圍好大，逆光下拍照仍然保留到細節
籮文：「便攜性行先 DC 再堀起」
要講性能，當然唔會係最 Top，但講便攜性與性能嘅平衡，PowerShot G5X 絕對做到。除咗機身本身嘅便攜性，最貼心嘅配套設計終於出現，USB 叉電對現代用家實在十分方便，本來要帶相機火牛手機火牛，依家一個火牛甚至係一個尿袋搞掂！
同場加映：PowerShot G9X（以下照片以 PowerShot G5X 拍攝）
Powershot G 系列另一個新成員就係 G9X。G9X 打住「最輕巧」嘅旗號，滿足需要輕便的用家。G9X有黑色及銀啡色作為主色，機身尺寸為 98 x 58 x 31mm，重量只有 209g。值得留意雖然 G9X 機身細小，但卻與 G5X 同樣會採用1 吋 2,020 萬像素 CMOS 感光元件及配備 3 吋 104 萬點顯示器，至於鏡頭則為 24-70mm f/2.8-4.9。最值得留意是 G9X 及 G5X 同樣有 USB 叉電功能。
▲按制轉盤都較少，比較似 M10。
▲最值得留意是 G9X 及 G5X 同樣有 USB 叉電功能。
▲G9X有內置閃燈但冇熱靴
▲見粒制個標誌係一部手機，就知依一個係分享相片到手機或其他 Device嘅快捷鍵
分享到 :
最新影片
