自從肥媽介紹過用電飯煲可以焗黑蒜之後，就有唔少人特登買個飯煲番屋企 DIY，奈何飯煲嘅設計唔係俾人長開，要佢開住 10幾日，好多時焗一兩次個飯煲就會壞，最後變用平買貴用。最近伊瑪牌推出咗部黑蒜機，針對性設計可以開足 12日，於是我依莉詩就借咗部番嚟試下，睇下飯煲定黑蒜機整出嚟嘅好食 D。
一日一粒黑蒜抗氧化
雖然黑蒜個樣唔太靚，不過就係好有益嘅健康食品，抗氧化能力係普通蒜頭嘅 39 倍。佢不但保留咗蒜頭嘅成份，而且味道酸甜，又無咗濃烈嘅蒜味，每日一粒可以改善睡眠、便秘，針對腸胃寄生蟲有緩解作用，所以近排先咁流行。
▲ 雖然話每人一日只可以食 1-2 粒，不過為咗測試，我就一次過買咗百幾粒大蒜同獨子蒜番嚟填滿兩個煲。
週期調節溫度唔怕長開
因為整黑蒜要連續焗 12日，所以黑蒜機可以長開係好重要，而伊瑪牌呢個採用3D立體保溫技術，而且會自動隨時間及週期調節溫度，咁就唔擔心焗壞機。另外，佢有一個專用雙層製蒜架，可以分隔多層蒜頭，唔洗額外買竹架隔住，非常方便。
▲ 而排氣閥就比飯煲大，唔洗自已加工或拆卸都可以有效排出蒸氣，控制鍋內濕度同氣溫。
▲ 黑蒜機旁邊同樣有個裝倒汗水嘅隔。
▲ 打開黑蒜機，睇落其實同普通電飯煲內膽無乜分別。
▲ 專用雙層製蒜架非常堅固，可以令製蒜效果更穩定，不過亦佔咗煲內唔少位置。
▲ 如果用飯煲制蒜就需要額外購買 3-4個竹架以分隔蒜頭，不過焗完之後竹架會變黑，焗 2-3 次就要更換。
▲ 根據黑蒜機說明書指示，每次大概可以放 58粒獨子蒜或 15粒大蒜，而我今次就放咗 4粒大蒜同 48粒獨子蒜。(因為我覺得獨子蒜好味 D。)
▲ 而飯煲就放咗 2粒大蒜同 82粒獨子蒜。
12日後新鮮出爐
同飯煲最唔同嘅地方係黑蒜機上有一個倒數計時器，按掣開始焗就會自動倒數 288小時 (12日)，並顯示出嚟，等你唔洗記住幾時先焗好。
▲ 只需按一次開始鍵就會自動倒數 288小時，操作簡單。
▲ 12日之後直接將製蒜架取出，再吹乾 3-5日就食得。
▲ 根據經驗，用飯煲製蒜要焗 16日先夠香甜。
黑蒜機成品顏色均勻
黑蒜機會自動隨時間同週期調節溫度，所以成品睇落明顯較均勻 同 乾身，而飯煲焗製嘅黑蒜放置中間嘅會較黑，旁邊嘅會較淺色。
▲ 黑蒜機嘅成品睇落明顯較均勻 同 乾身。
▲切開獨子蒜會發覺飯煲製成嘅比較似栗子，而黑蒜機製成嘅就非常幼黑。
▲ 但切開大蒜，無論用飯煲定黑蒜機製，睇落每一瓣都非常黑。
黑蒜味道差唔多
至於味道方面，我覺得黑蒜機製嘅比較特別，甜得嚟唔會太糯，而用飯煲製嘅有較多水份，食落似栗子。另外，我找來 3位勇敢嘅同事試食，睇睇佢地又覺得點。
▲ 數碼港女原來第一次食黑蒜，覺得有 D 似豉油味。
▲ 而唔鍾意食蒜頭嘅小明就覺得用黑蒜機製嘅比較酸，而用飯煲製嘅似西餐配菜比較好食。
▲ Unwire Pro 嘅同事就覺得兩粒係大分別，而用黑蒜機製嘅較乾身比較好味。
依莉詩：「操作簡單零失敗！」
今次要特別鳴謝姑媽借出飯煲同地方俾我做呢個測試，起初我都擔心放咗部黑蒜機係佢屋企 10幾日會唔會中途有咩問題，好彩佢預你長時間插電，而且有自動調節溫度，感覺安全好多。雖然成品嘅味道差唔多，只係顏色上有分別，不過佢有倒數計數器，可以知道仲有幾耐先焗好，操作簡單，幾乎零失敗，長遠嚟講黑蒜機的確比較化「蒜」。
售價：$699
查詢：伊瑪牌 (2422-1244)
分享到 :
最新影片
