之前 Google 終於為 iOS 用家推出 Android Wear APP，令各位用 iPhone 的 wire 民可以唔洗得 Apple Watch 一隻智能手錶選擇咁慘。不過用落究竟又係點？筆者就借來一隻 LG Watch Urbane，同部 iPhone 5c 進行配對。究竟 iPhone 配對 Android 智能手錶好用啲？定係配合 Apple Watch 較體貼？而家就同大家分享一下。
配對步驟同 Android 手機一樣
首先先同大家介紹點配對啦。其實步驟同與 Android 手機配對差唔多，都係開啟 iPhone 藍牙並安裝 Android Wear APP，之後按住步驟去安裝就可以了。不過要留意的是，如果你的 LG Watch Urbane 仲係同部 Android 手機配對緊，就要係手錶的設定中進入「Factory reset」format 咗隻錶先，然後先可以同部 iPhone 進行配對。
▲Step 01：首先係 App Store 下載 Android Wear 程式，完成後開啟它並點按箭咀按鍵。
▲Step 02：開啟藍牙並進入配對，配對前要 make sure 手錶並非與其他手機配對中。
▲Step 03：此時手錶上會出現一組密碼，將它輸入到 iPhone 中，然後按指示進行餘下設定，並等待完成就可以了。
Android Wear @ iPhone 5c 全面睇
好了，配對了，究竟又有咩功能可以用呢？而家就同大家講講。
可換錶面但有限
首先就係可以換錶面，不過就同 Apple Watch 一樣，都係得內建款式可以揀，唔可以好似係 Android 咁，下載第三方設計的錶面。據聞呢個係 Apple 的限制。
▲iPhone 上的 Android Wear，可供用家替換的錶面只是有限。
▲相反係 Android 手機上，唔止內建錶面選擇更多，亦可以下載第三方程式選用其他設計師設計的錶面。
收到提示但得個睇字
提示方面，接收係無問題的。而且不限內建 APPS，就連第三方程式（例如：WhatsApp），當有訊息傳入時，就會係手錶收到提示，而且都幾快，唔洗 1 秒就收到。不過呢，好似 Gmail 呢類 Google 官方 APPS 就可以 reply（使用語音輸入文字或以 emoji 回覆），不過用語音輸入文字，一般都好難回長信息，想回長啲始終都要拿番部手機出來；至於第三方 APPS，以 WhatsApp 為例，就連回都唔得，只可以睇，想覆機就要係手機度搞。
▲Google 本身的 APPS（例如：Gmail）是可以係手錶上面回覆的，不過就只可以選擇以語音輸入文字，或者直接以 emoji 顏文字回覆。
▲相反係 Android 手機上，唔止有上述兩種回覆方法，仲有預設一大堆短訊息俾大家揀，用落方便好多。
▲至於第三方程式，Android Wear @ iPhone 係可以睇到訊息內容的，而且接收都幾快。
▲不過就唔可以回覆囉，睇來同 Apple Watch 初推出時一樣，要等待程式開發員為軟件推出新版本時才能做到。
健身狀況不能與 Health 程式同步
唔少 Android 手錶都有健康管理功能，好似筆者手上呢款 LG Watch Urbane，就唔止可以計步數，仲可以量心跳。不過收到的數據，就無得好似 Apple Watch 咁俾內建「Health」APP 或者第三方程式使用，以監察運動進度，皆因 Android Wear 同 iOS 內建的 Health APP 係唔相通的，而用家係 iPhone 上又唔可以裝 Google Fit（暫時未有掛……），所以用落真係無 Android 手機 x 手錶或 iPhone x Apple Watch 咁方便。
▲本身 Android Wear 是有 Google Fit 功能的，就算與 iPhone 配對後都可以做到運動監察。
▲不過就唔可以同 iOS 的 Health APP 同步資料，另外 App Store 內 Google 亦未提供 Google Fit APP 俾大家用，所以得到的數據可以講係無乜用。
都有資訊提供
雖然如此，Android Wear 手錶 x iPhone 仍然提供不少常用資訊，例如：天氣、股票等，亦可以用到手錶的內建功能，例如：碼錶、翻譯等，亦可以用廣東話進行語音指令，不過筆者試過好多次，連設定個鬧鐘都做唔到，就算說出指令都變咗搜尋互聯網上的內容。未知是否 Google x iPhone 的語音操控上未夠完善？筆者未能確定。不過整體使用感受一定無 iPhone x Apple Watch 咁好。
▲都有提供唔同資訊功能，例如：天氣、路程、股票等。
▲Android 本身都有唔少功能，例如：碼錶、翻譯等，就算配對了 iPhone 都用得到。
▲語音指令支援廣東話，不過操控上就比較難用（感覺無 iPhone x Apple Watch 咁好）。
無得裝 APPS 擴充性好低
如果有用過 Apple Watch 的用家，都知道如果係 iPhone 入面安裝的 APPS 有提供 Watch 介面的話，就會同步到 Apple Watch 上，令大家係手錶上面都可以裝 APPS 用 APPS。呢一項功能如果配對 Android Wear 手錶就唔得了，只可以用上文提及的手錶內建功能。
▲本身透過介面可以設定的功能，Android Wear 的 iPhone 版真係好少。
▲相比 Android 版更加係相形見絀……
▲而且 Android 版先有得支援第三方軟件操控，係 iPhone 版上就無咗呢個功能。
總結：始終無原廠嘢咁好囉
對於鍾意用 iPhone，但又鍾情於選擇夠多的 Android Wear 智能手錶陣營的 wire 民來講，Android Wear 終於可以支援 iPhone 確實係一件好興奮的事。不過興奮過後，當筆者一配對就知「瀨嘢」！因為功能上唔止比 iPhone x Apple Watch 更少，而且訊息回覆上就同 Apple Watch 初推出時一樣：齋睇無得覆！呢樣嘢真係令筆者感到十分無奈。當然，Android Wear 的 iPhone 支援才剛開始，不排除之後 Google 會加回回覆功能，令 Android Wear @ iPhone 功能上更完善，不過現階段如果講使用體驗，Android Wear 手錶 x iPhone，肯定無 Apple Watch x iPhone 咁好，呢個都係事實。
