之前 HKT 旗下的 csl.，找來黃子華拍「大網絡•大時代」的廣告，相信各位 wire 民都好熟悉。今日 HKT 就進一步擴展「大網絡」版圖，宣佈推出「拍住賞」服務，令大家唔止係香港，就算去到外國，都可以用手機 NFC SIM 卡的 MasterCard PayPass 功能係超過 300 萬個商戶俾錢購物，超方便！
今次 HKT 係聯同大新銀行同埋 MasterCard 推出呢項新服務，每次交易最高上限為 HK$1,000（未來可支援付多於 HK$1,000，但需要在 APP 內輸入密碼才可交易成功），與現時 MasterCard PayPass 使用方法相同，用家只要在全球任何可以使用 MasterCard PayPass 的購物點就可以購物，十分方便！不過要留意的是，暫時所有交易均是以港元結算，日後 HKT 才會支援海外貨幣交易，但日期未定。
但大家可能會問：既然係信用卡，點解要增值？都唔係八達通！但實情其實佢同碌卡概念少許唔同，佢其實類似外國的 Debit 卡，分別係 HKT 今次的 Debit 卡，係內藏於 SIM 卡內，並非一般實體卡。所以，即使今次「拍住賞」係拍住銀行的信用卡來做，但大家必須確保戶口有錢先用得到，模式就好似八達通或者 EPS 咁。
而使用方法同而家 MasterCard PayPass 相近，不同的是現時的使用 APP 是由銀行及發行，但今次「拍住賞」電子錢包 APP 是由 HKT 自家擁有。另外，如果用家想更安全，亦可選擇設置密碼保護功能。除此以外，HKT 亦加入「Always-On」功能，當開啟後，只要付款時將手機 NFC 位對準 PayPass 付款器就可以，連熒幕都唔洗開，好方便。「拍住賞」亦支援網上購物功能，只要在 APP 內開啟相關功能即可，十分方便。
至於增值服務方面，用家可以設定預設自動增值，每日可最多增值一次，每日最多增值 HK$10,000，而預設增值額為 HK$500、HK$1,000、HK$3,000、HK$5,000、HK$8,000 或 HK$10,000，而用家可隨時關閉此功能。另外用家亦可以透過信用卡即時過 HK$10,000 credit 到預付卡，換言之用家每日最多可為「拍住賞」錢包 APP 增值 HK$20,000。此外，亦可以隨時透過香港電訊、csl.、1010 專門店增值，每次最少增值 HK$500 最多 HK$10,000（增值金額須為 HK$50 之倍數）。稍後此增值服務亦會擴展至 7-Eleven 便利店，而每次最少增值 HK$100 最多 HK$3,000（增值金額須為 HK$50 之倍數）。至於每個香港身份證持有人，可申請最多 5 張擁有「拍住賞」功能的 SIM 卡。
除了付款外，其實「拍住賞」APP 仲有其他功能，包括可以透過當中的「拍還拍」功能，與其他「拍住賞」用家透過手機 NFC 觸碰功能進行即時「轉賬」或透過雙方手機進行遙距轉賬。「拍住賞」APP 亦可讓用家查閱過去 3 個月的交易紀錄，就算去到外國購物，都可以隨時查閱碌咗幾多錢，唔驚碌爆卡都唔知。另外，「拍住賞」亦會為用家帶來不同的餐飲及購物優惠，用家亦可參加 MasterCard 樂遊賞獎勵計劃，每次付款交易均可獲得 HKT The Club 會員獎賞計劃的獎賞積分。
▲擁有多項功能，包括：網上購物、即時轉賬給朋友、可在任何 MasterCard PayPass 點付款、可用大新信用卡增值或透過 HKT、1010 專門店、csl. 專門店及稍後於 7-Eleven 便利店以現金增值。
▲只需要兩個同時有用「拍住賞」，就可以過數俾對方。
▲另外，HKT 還與 759 阿信屋合作，在 8 月 8 日及 9 日，「拍住賞」用家可以用半價購買正價及街坊價貨品！咁 so，唔係唔搶下話？（編按：唉，又要排長龍……）
分享到 :
最新影片
