動畫節 下星期先到，但一大班玩具迷已經急不及去左今日起一連三日係九龍灣國際展貿中心舉行既玩具節，而我依莉詩亦都去左一睹 TOMICA 合金車仔既演變，真係架架都各有特色呢！
必睇！
1) TOMICA & PLARAIL 巨型情景模型
一入到會場，小編就見到 10米 x 2米既 TOMICA 同 PLARAIL 巨型情景模型。火車沿住路軌係建築物同車站穿梭，旁邊仲有合金車仔同栩栩如生既動物、人仔，十足一個微型城市。
▲ 火車係動物園經過，入面既動物都好好奇呢架白色既巨鐵係咩呢！
▲ 唔同型號既火車係一層層既路軌氹氹轉，小編睇睇下都有 D 暈。
▲ 城市入面仲有好多合金車仔呢！
2) 經典 TOMICA 車仔
入到會場最值得睇既就係 400架由 1970年 到 2000 之間 40年間既 TOMICA 車仔。除左有由收藏家借出既巴士、跑車、警車 同 消防車等，仲有由日本 TAKARA TOMY 官方借出既經典絕版車仔。
▲ 好多限量既車仔平時都好少見的呢！
▲ 原來巴士都可以有咁多款。
▲ 每架警車都十分精緻啊！
3) 那些年懷舊玩具
會場外既那些年懷舊玩具展係由本地多位資深收藏家借出 6大主題既珍藏，包括：TOMICA、STAR WARS、LEGO、超合金、懷舊遊戲機 同 Barbie 等。無論係 70、80定90後都可以喚起佢地既童年回憶。
▲ 有番一定年資既 TOMICA 迷都應該知道，80-90年代香港發行既車仔都係用黑盒裝住。
▲ 到左後期先改用紅白盒裝住呢！
▲ 配合 Tiny 香港既消防局同警車場景，車仔都變得特別生動！
▲ 80年代既鐵甲萬能俠 同 90年代既勇者王聯同一眾超級機械人、變型金剛上演連場激戰。
▲ 部分有 collector coin 既 3.75吋 Vintage Action Figure，隻隻都係 70、80年代最經典既 STAR WARS 人物。
▲ 只係香港發行既限量版白兵 Figure 十分稀有。
▲ Barbie 向來都係時尚既標誌，但估唔到 1959年 – 1969年出產既 Barbie 衣著到依家都唔過時呢！
▲ 全球第一款既商業家用電子遊戲機唔知依家仲玩唔玩得架呢？
▲ 應該唔少 wire 民都曾經擁有過呢部紅白機吧！
▲ LEGO 見得多，呢套市值 $50000 既又見過未？
必玩！
4) PLARAIL 任砌任玩
大朋友懷舊完，到小朋友玩既時間。呢度有一個親子玩樂區， 1名家長同 1名小童 或 2位 10歲以上既人可以自由組隊入場砌 PLARAIL 路軌同火車 45分鐘，每場最多可以容納 10組。
▲ 唔少小朋友都玩得好投入呢！
5) 四驅車超速比賽
無論咩年代，四驅車都陪住大家成長。只需要帶自己既四驅車入場就可以參加比賽，跑得夠快就可以得到原裝盒車或者特別版電鍍零件。
▲ 想架車夠快，職員就話最先要換個夠快既摩打同注意車身既平衡。
6) 一定有獎攤位遊戲
除左親子遊戲區，等緊既時候可以去玩攤位遊戲。憑入現券票尾既遊戲券可以參加遊戲，無論成唔成功過關都有車仔送，相當抵玩。
▲ 30秒內夾到既車愈多，獎品就愈吸引。
▲就算泊唔到車都唔緊要，都會有架車仔送比你番去練習。
必買！
7) 多款限定 Figure + 車車
嚟得玩具展，一定要買番 D 限量版 Figure、玩具番去。今次除左有限量 300隻既光澤版大鐵人 17號 外、限量 96架既 Minichamps x Tarmac Works B<W Z4 GT3 會場特別版，仲有 TOMICA香港小巴會場限定套裝。
▲ 大鐵人 17號只係得今日同聽日有得賣咋，每日仲只賣 120個，難怪咁搶手。
▲ 只要即場加入 T Club 做會員就可以得到呢兩架逼真既小巴模型。
8) $100/3件 玩具大特賣
對父母嚟講特別版可能未必岩，但 $100/3件既玩具就一定岩！每件都只係三十幾蚊，買多幾件比小朋友都唔心痛啦！
▲ 電子既植物，放係枱頭好似唔錯。
▲ 夏日炎炎，呢部自製雪糕機好似幾岩用。
▲ 一次過買幾盒彈珠人就可以對戰啦。
9) 抵買 LINE 公仔
雖然話 LINE 公仔唔只呢度有得賣，不過小編就發現呢度平過海洋公園間 pop-up store 啦。買一隻原價 $699 既巨型熊大仲可以加 $200換埋隻巨型兔兔添。
▲ 係就係混亂左 D ，不過都幾多公仔揀架！
分享到 :
最新影片
