轉眼就到暑假，上半年的大廠旗艦機都出得七七八八。不過，近日有舖頭就返了 docomo 2015 年夏季新機 AQUOS ZETA SH-03G，雖然外觀同之前 SH-01G 好似差唔多，但賣點係換了 Qualcomm Snapdragon 810 處理器，而且仲要唔熱！想知點解就記得留意喇！
Snapdragon 810 竟然「唔熱」？
今年咁多旗艦機評價都麻麻地，唔少都係因為用了 Snapdragon 810 處理器令手機容易發熱。不過，日系機總會有「驚喜」（Sony 除外），正如這次試的 SH-03G 就係罕有「唔熱」的 Snapdragon 810 機種，即使玩了「白貓」約 15 分鐘，機背都係微暖（微升約 5 度），究竟機內係咪有「水冷」呢？不過，迷團係執行 Antutu 後就揭開了，因為成績只有約 36,000 分，可見 Sharp 把 Snapdragon 810 速度大幅下調，但玩「白貓」又唔覺有「窒機」情況（CPU 快唔更於唔會慢）。由此可見 Sharp 寧願放棄性能都為用家體驗著想，這點比其他大廠更值得讚。
▲ 機內搭載 Qualcomm Snapdragon 810 處理器及 3GB RAM，無花無假！
▲ 玩了約 15 分鐘「白貓」機背發熱位置僅微升 5 度。
▲ 於 Antutu 測試成績竟然只有約 36,000 分，成績比其他旗艦低一半，估計低分同處理器被大幅降速有關。
▲ 內置 3GB RAM 閒置時大約有 1.5GB Free RAM。
▲ 內置 32GB 儲存空間大約有 21.2 GB 可用。
▲ 屏幕維持 5.5 吋 1080p，顏色稍偏藍，灰階較高，背光非常充足。不過，可視角度就不及 S-AMOLED 屏幕。
媲美 RX100 IV？2,100fps 超高速拍片？
之前 RX100 IV（相機）賣點之一係拍攝 960fps 超高速短片，好叻咩？小編 今次試果部 SH-03G 一樣都拍到，而且最快可達 2,100fps 係 RX100 IV 快 2 倍有多！當然大家會質疑 2,100fps 有冇 1080p 先？答案係冇！但 1,000fps 就同 RX100 IV 一樣係 1080p，而分別就係 SH-03G 拍攝時間可長達 30 秒，而 RX100 IV 就只有 2-4 秒，彈性上係完勝，但留意 SH-03G 須配合後製才達成，實際其實係 120fps vs 960fps。至於 2,100fps 實際短片規格為 864 x 480，最慢可把短片放慢約 80 倍速，拍攝高速公路上的車都變特好似靜止了，但缺點係轉片都須一段時間。如果諗住玩高速相機，話唔定 SH-03 可能好玩過 RX100 IV 喎！
▲ SH-03G 都有 RX100 IV 類似的高速相機（Slow Motion）模式。
▲ 短片只展出慢動作效果，而非短片品質。（* RX100 IV 片段 Zoom 果）
▲ 錄製短片後須經內置軟件把短片後製，最終可令影片有等同 1,000fps 及 2,100fps 效果，但一等就可能要十數分鐘。
▲ 提供多種拍攝場景，最基本 Auto 就好似 LG 般冇任何設定，而手動模式就可更改 ISO 及白平衡等（不設調快門）。
▲ 相機對焦反應都算快，但問題係相片放大比較「油畫」。（按下可收看原圖）
手感差唔多 側邊提示燈
這部 SH-03G 外觀跟 SH-01G 有幾分相似，屏幕都係 5.5 吋 3 條窄邊框，主要分別係機背多了指紋掃瞄器，同時機兩旁亦設 LED 提神燈。前者，好透過指紋進行解鎖及 App 保安功能，後者可透過不同顏色顯示提示訊息，而且握住機邊更可控制屏幕背光，令手機可以更省電。
▲ 手握時跟 SH-01G 感覺差唔多。
▲ 同樣採用 3 條窄邊設計，但邊框就不及 Crystal X 咁窄。
▲ 機背多了指紋掃瞄器，透過指紋可設定成解鎖及鎖 App 功能。
▲ 機旁 LED 可顯示手機提示之外，還具備手握時啟動背光的功能。
小編 ：售價唔平 但保證唔辣手！
試玩完 SH-03G 部機主要賣點係唔「辣手」同「慢動作」拍片，前者代價係處理器降速，但講真打機「唔窒」問題都唔大；後者，有趣！但真正用得著的機會唔多，加上售價成 $6,580，我覺得起碼回落到 5 字頭才說算合理，如果想要類似設計，可能 SH-01G 會更適合你。
售價：$6,580 （紅、白色）
查詢：三禾電氣（2374 0618）
