作為一名死忠利迷，小編近年睇到利記的戰績，心情實在似坐過山車。有人講係領隊問題，有人話「最衰都係蘇 7 離隊」，又有人話主力不停傷病都無計。但這些「工作」，其實都同領隊羅渣士有關。如果你覺得做得好過羅渣士？其實 SEGA 今日凌晨就推出了正宗 PC 移植版的 Football Manager Classic 2015。究竟玩落同電腦版差幾遠？而家 Edward 同大家講講。
最接近電腦版本！終於有香港聯賽玩（笑~~）
其實 SEGA 之前都有推出 mobile 版的 Football Manager Handheld（下簡稱：FMH）系列，係就係節奏明快，同埋好爽，不過就有以下缺點：
- database 細得可憐，而且要買其他聯賽的球員，一般只係搵到「著名」球員
- 球賽出現極多 mission impossible 進攻 / 防守場面（例如：明明前面空哂都可以傳番後或者射到唔知去左邊……）
- 聯賽選擇好少
- 球探得兩個用，而且搵親番來的人都係……唉
- 比賽個時得一堆寫住數字的圓圈郁來郁去，好悶……
整體來講，FMH 可以講係專為 mobile 裝置而設的另一款遊戲，如果玩開 PC 版的玩家，應該會好似小編咁，愈玩愈無癮，最終每集都買但都係玩兩玩就放棄，買只係為了支持一下而已……
而今次 SEGA 推出的 Football Manager Classic 2015（下簡稱：FMC），就可以講得係真真正正的電腦 version 移植版，雖然仍然有些功能沒有了，但整體來講點都似番 PC 版 FM，最少聯賽國家個度唔止 10 幾個，而係可以玩到 51 個，就連中國、香港聯賽都有，鍾意支持港甲或者中超、又或者其他冷門聯賽（例如：捷克、波蘭、北愛等）的玩家，就唔洗愁無嘢好玩了。
▲終於有港甲玩囉！仲有唔少冷門聯賽俾大家挑戰。
▲Tablet 版始終有限制，雖然可以最多揀盡三個國家聯賽入面所有級別玩，但唔建議大家好似小編咁揀到 game speed 得番半粒星，會窒到玩唔到的！！
觸控體驗不錯‧唔開太多聯賽就唔窒
今次的 FMC，主打是在高階平板上遊玩 PC 版 FM 的體驗。但大家都知道 PC 版一向慣用鍵盤及滑鼠操控，來到 tablet 上，總不能玩個時駁鍵盤滑鼠玩吧……所以在操控上，就改為觸控模式，例如：點一下為選擇項目、點二下為顯示工具貼士、長按會顯示副目錄、點按並拖拉就可以拖放項目等。玩了一晚，感覺整體體驗算是不錯。
▲遊戲內所有功能都是用觸控模式的，大家當自己的手指是平時電腦版的 mouse 就對了。
▲觸控功能其實得 6 款，上手唔難。
不過要同大家講講，FMC 雖然可以俾大家揀最多 3 個國家或地區的聯賽，但小編建議大家唔好揀太多聯賽，最好右下角 Estimated Game Speed 能維持 2 星或以上，咁就可以保證遊戲中觸控體驗順暢。小編試過在 iPad Air 2 上，選擇了英格蘭、意大利及西班牙的所有聯賽（星數得番半粒……），結果入到 game 窒得要死，最後要重開遊戲。所以都係建議大家為了操控體驗，唔好太貪心了，始終 tablet 性能仍然同 PC 差一截的……
保留主要元素‧想做「戰術大師」無問題！
另外，前文都有提及，今次的 FMC 雖然講係 PC 版 FM 的移植版，但不是所有功能都有被移植的，最少記者會、與球員溝通、賽前 / 中場球員訓話、網絡對戰等元素都無咗。但主要元素，例如：擬定買人預算、購買 / 出售球員、更詳細洽談球員轉會費 / 合約細節（終於可以分期付款買球員，以及買新人時加入借回母會一年的條件等）等一一都被移植，而最令小編印象深刻的，除了球探終於有番 6 個，可以按需要設定不同地區或比賽搵明日之星之外，就是整個戰術設定，除了保留 PC 版 FM2015 內的所有戰術外，還可讓用家設定細節，例如：兩翼側擊、短傳為主、推前壓迫對手、使用越位陷阱、用較快比賽節奏等，同電腦版是沒有兩樣！所以，玩 FMC，就算在 tablet 上，都無礙大家做真正的「戰術大師」！
▲所有戰術均保留了 FM2015 的元素，做唔做到戰術大師就考大家的功力了。
▲所有介面基本同 PC 版無大分別。
▲買球員同簽合約相比 FMH 有更多細節，點玩都得。
▲最開心係球操終於有番幾個玩，唔洗用來用去都係得兩個唔知咩人來 scout。
比賽中球員終 3D 化‧跳出跳入都幾煩……
另外之前提過 FMH 系列中，球員全部都係一個個寫住數字的圓圈郁來郁去，唯一知的只係入咗波、邊個入等等，睇得耐都無癮，所以小編會較到最快速度等比賽盡快結束；相反電腦版唔止可以睇到球員的膚色、髮型等，仲有埋球員動作，例如球員係頭槌定遠射、甚至倒掛入波，以及入波後的慶祝動作，都睇得一清二楚。最過癮係場邊球迷都會郁下郁下，唔似 FMH 咁剩係球場 top shot 咁望住一堆圓圈。而今次 FMC，就正式用番電腦版的比賽介面，而且飛走哂之前 FMH 入面唔合理的傳球、射門，對於玩開 PC 版的小編來講，份外有親切感呢！
▲FMC 比賽前的唯一版面，會展示雙方的陣容及戰術，這是最後機會因應對方戰術而作出針對改變。
▲終於可以係 tablet 上玩番 3D 比賽介面啦，yeah！
▲每段 highlight 之間都有個 box 顯示雙方攻勢及己方球員狀態。
▲臨場變陣等 FM2015 元素，在 FMC2015 都仍然被保留。
▲亦可以按個人需要，開啟不同的訊息 box。
不過唔知係唔係 tablet 始終效能上不及 PC，所以進入及跳出比賽介面時，時間都幾耐（在 iPad Air 2 上每次都大約 10 秒至 15 秒左右），唔似電腦咁一禁然後一、兩秒後就 load 完，長時間玩呢方面都幾煩。希望 SI 在之後的更新，可以改善一下吧。
▲每次進入及離開比賽都要 load 十幾秒，有時真係覺得幾麻煩……
球員特別容易傷‧電腦版戰術不能匯入
不過 FMC 始終剛剛推出，有 bug 始終不能倖免，小編玩了一晚，發覺最大問題是球員特別容易受傷，小編試過未開季已經傷了 1/4 隊球員（好彩唔係主力……），真係慘無人道！另外，如果大家覺得 FMC 是電腦版 FM 2015 的移植版，打算想將電腦版內的「長勝」戰術匯入到 tablet 版的 FMC 內，sorry 是不可以的，因為 FM2015 的戰術是 FMF 格式，而 FMC 支援的是 TAC 格式，所以一定不能支援。那麼大家可能會問：FM2014 或以前的戰術檔格式也是 TAC 格式，不就可以在 FMC 上用了嗎？對不起，小編試過，好似都係唔得，因為根本唔似可以將檔案用 iTunes 同步去 tactic 個文件夾入面，在戰術介面自然不能匯入。未知這是否 bug，還是電腦版及平板版本的檔案格式完全不同，這方面唯有等待 SI 方面解畫了。
▲超多傷病問題似乎是 SI 需要解決的 bug……
而最後一個問題，亦是 PC 版都有的問題，就是有些國家 SEGA + SI 都拿唔到版權，所以就唔可以出真正隊徵同隊名，就好似上圖，擺明就係史浩克 04，但球隊名就變了 Gelsenkirchen。呢啲方面，如果有玩開 PC 版，應該唔難適應。
總結：仍然係咁難玩，但值得粉絲入手！
其實去到 PC 版的 FM2015，隻遊戲已經去到擬真度極高，正如小編的一位朋友所言，玩呢隻遊戲直頭好似「打多份工一樣」，因為要做的工作，同真實領隊要做的，真係分別不大（唯一分別係去比賽或者觀察某位心儀球員的狀態唔洗搭飛機囉）。所以去到 FMC 2015，其實遊戲難度都仲係好高，雖然遊戲中可以選擇是 Beginner 還是 Expert，如是前者每項功能均有解釋，但始終 FMC 是屬於「文字類」足球經理遊戲，熱愛玩的都是因為愛上 Sports Interactive 的 FM 數據庫（前身其實是 CM），所以如果習慣玩 GUI 類遊戲的 unwire 讀者，要上手可能要較長時間。
▲雖然對於新手有協助，但對於玩慣 GUI 遊戲的朋友，應該都需要點時間上手。
▲今次 FMC 2015 除了有一般模式外，亦移植了不少挑戰模式，玩一般聯賽模式玩到悶悶地大家不妨試試。
▲有些項目大家可以付錢，或者達到指定目標而 unlock。
不過如果你同小編一樣，是 FM 的長期粉絲，FMC 就十分值得入手，至少係街度捧住部 tablet，可以玩到媲美 PC 版的 FM 體驗，真係此刻無價！加上它的售價只是 $158，相比 PC 版超過 $300 的定價，絕對超值！所以粉絲們，你們是時候課金了。
iOS 版：https://itunes.apple.com/hk/app/football-manager-classic-2015/id944235778?l=zh&mt=8
Android 版：https://play.google.com/store/apps/details?id=sportsinteractive.fm15&hl=en
分享到 :
最新影片
