曾經睇過一個有關生日日期的調查，發現最多人生日的月份係九、十月。有人嘗試解釋點解九月十月咁多人生日，於是 trace back 返轉頭，發現可能因為入冬凍冰冰，戀人／夫妻就要多啲互相取暖，再加上聖誕加上年尾，好有情調氣氛，同埋唔少打工仔要「清假」，又放假又去下旅行咁，嗯嗯，大家明嘅！
講起放假，作為公司存在率 25% 的人，假梗係唔可以亂放，更何況識放一定唔會節日放假：節日去旅行，機票酒店咩都貴；留係香港行街 shopping 又要同人逼同人搶，今年的中秋就連塔門都逼爆。放假時候個個都不甘寂寞，搵朋友食飯去玩，放個兩日假，分分鐘仲攰過返工。
如果大家認同，但又真係因為年尾不得不清假；想遠離市區的繁囂，但又唔想宅係屋企咁霉，我介紹一個地方俾你：我公司 office 哈哈哈～唔係講笑，我真心覺得如果假日需要搵個靜靜地的地方同戀人或朋友渡過，數碼港真係好 ok。
▲ 唔覺意透露左聖誕電影心水添！
第一，有戲院，仲要大部份出面全院滿座的電影，係數碼港係空空如也～我睇過兩次，兩次都係睇熱門電影，第一次睇差啲包場，不過係有啲空虛有啲寂寞有啲凍；第二次睇，朋友話：嘩！我成個人瞓低伸直，對腳都掂唔到前面張櫈呀。可能係佢腳短XD 可想而知間戲院有幾寬敞！早幾個月之嘛，陳豪同佢老婆都特登入黎睇戲，仲唔係貪呢度偏僻，少啲狗仔隊？！
▲ 其實可以係有全港十大日落靚景的地方返工係一大樂事
唔睇戲有咩做？第二，數碼港有片大草地，可以放狗，野餐，或者學啲歐洲人咁 sunbathing。上次有位法國朋友入黎數碼港搵我，佢一見到個草地就不斷讚嘆我的工作環境，仲提議我同同事：既然你地都係用 laptop 做野架啦，不如搬埋個電腦落去草地晒住太陽做啦，人都開心啲架。Er…其實個時係夏尾，有啲熱同真係好曬，哈哈。言歸正傳，個草地最好的地方係咩呢？就係隔離有個海，仲遠眺南丫島添。咁即係代表咩呀，大家開一開個地圖，數碼港望南丫島＝一路向西＊，係呀西斜有海，即係睇日落好靚囉！同三五知己又好戀人都好，放聖誕假可以咁浪漫一齊賞日落，其實都幾開心丫。
▲ 酒店啲野真係有返咁上下水準，
仲有第三，數碼港有間五星級酒店，HOHOHO。反正節日都係要使錢，又其實數碼港冇咩好食，做戲做全套，食自助餐好，西餐好，中餐好，日本野好，酒店真係有返咁上下水準，梗係book 埋張枱（當然你覺得數碼真係咁唔方便 or 咁～方便嘅，可以book埋間房），食餐好的，慰勞自己，同身邊人慶祝慶祝。
利申：以上資料絕對純粹係個人經驗分享，冇廣告費收架。所以如果你問我真心放假會唔會入數碼港，我好老實答你：傻豬黎嘅，日日返工仲睇唔夠咩，放假就梗係要遠離工作架啦 😛
祝大家有個快樂聖誕Merry Merry Christmas!
＊補充資料：數碼港直望南丫島其實向西南，冬天則更有利看日落。因為北半球在冬季，太陽會較早於西南方落下，見證太陽落山 😉
分享到 :
最新影片
