串哥偏見 : 中文輸入法，透露你人格

串哥唔係電腦人，但生活上總係離唔開電腦。我份人一直有少少執著，見工時會留意人用乜野中文輸入法，去俾自己一個初步的印象。可能讀者第一時間就剷我，話我呢D係偏見，係，我認我係偏見，我就將我呢一份偏見同大家分享一下。唔o岩聽的可以直接跳過無謂閣下勞氣。

香港人學打中文，真係好鬼煩，同普遍的語文輸入法有好唔同。例如日文用字母方式組合，又可以用五十音去拼，台灣／大陸人呢又係用拼音同注音，都係用字的讀音去輸入，直接型態唔需要點學。香港人學打中文，廣東拼音又騎騎呢呢，所以要多數用一D字型的輸入法，例如倉頡、速成、九方，都係要諗下個字型又或是個字係點寫，你先能夠打出來，係一件非常奇怪的事，有時你唔記得個字點寫，你就打唔出。

不過打中文真係一項終生受用的技能，有D人成日用「只係文員先要學打中文，我地呢d將來做高層，比晒d文員仔打文件啦，洗鬼學打字」黎話無需要學。我串哥覺得除非果時諗住係做政府官員大粒佬，如果唔係做得高層要識得考慮大局，就算唔打文件呀，今時今日同朋友通訊，打番中文係會親切D ，咁簡單的道理都睇唔到，點做人高層？

提起心肝學打中文的人，串哥都好敬重的，因為至少係為自己的終生技能，付出時間同花精神去學習，唔似得上面果類咁，怕辛苦講一大堆廢話為自己辯護

至於學速成的人，串哥的偏見係：「佢地有遠見，但捱唔到苦。」，因為當年學打字時，倉頡的而且確係非常難上手，好想放棄，身邊好多人中途放棄，自甘墜落改用速成，仿佛向生命說一句「我輸了」。不過串哥好堅持，理由係，點解一項終生受用的技能都要懶呢? 都唔會用多你好多時間掛?

學九方的人，我的偏見係覺得佢係有遠見、不過捱唔到苦、甚至唔好同其他人好難妥協，簡單D講係自私。點解呢? 因為九方輸入法賣點係易上手，不過當商業環境下，好多時公司唔會因為你一個人，而去安裝一套只係 suit for 你的輸入法，況且好多電腦都控制晒上面有咩 software。還記得當年串哥出黎做 IT 的時候，老闆叫我幫個新人裝套九方，因為佢要黎 interview。

我同老闆講，先唔講套野要錢買，出面全部人見工都係用速成同倉頡，點解公司要為佢一個人有特權可以比佢用九方呢? 會唔會對其他為咗有更好事業前途，而學速成／倉頡的應徵者唔公平呢? 咁將來如果出十方呀，水立方咁的輸入法，公司係咪又個個人都買一套比佢地自己一個人用呢?呢d 人第日唔做喇，套野又點呢?

最後，我當然無為呢個人裝九方輸入法，佢最後亦都無被列入interview list  。我知道呢一種偏見，好多人都會第一身企出黎話，喂我點點點，你又唔見我今日點點點，right 你無錯，今日呀 + x 哥都唔識打中文又如何，但世界有幾多個人好似佢咁呢? 所謂偏見，呢份感覺係心入面係好直接，唔需要經過任何審判，也許世界上有唔少人都係同串哥一樣存有呢份偏見。

無錯，任何野都係熟能生巧，論打字速度，好多人用其他輸入法都快過倉頡，不過串哥就真心建議，如果有心學，堅持一陣學倉頡，唔好比咁多借口自己懶，係某程度上係一種表面評分黎。

分享到 :

最新影片