昨日串哥問過晒咁多家行家 Galaxy S3，連鎖店都係話要訂貨，而且要 6 月中先到，而尋日只有百蘆薈話冇得訂。今日終於真相大白！百蘆薈唔係冇貨，只係利字當頭，原來係要大家食骨先真！
中午經過百蘆薈旺角一帶分店，都有 GS3 現貨供應。不過又再次重施用於蘋果產品之故技，要大家連一款名不經傳之藍牙耳機先俾買，盛惠 $6,288！叫做比其他細鋪的 6,800 炒價稍有良心…
但我串哥同大家講，如果心急要買機，千祈唔好特登去食骨，查實大把地方有現貨。連鎖店計蘇寧鐳射就有現貨，唔使食骨賣 $5,598，但一定要用中銀信用卡，唔用的話收你 $5998，送返一張 16GB MicroSD 安撫返你。之前話一定要訂的馮宅都有現貨，不過就加價到 $5,688，唔使食骨。
不過，雖則話第一批好少貨，但串哥發現其實好多個體戶都有現貨未賣完。例如頭先走去電訊數碼，就可以無條件 $5,598 即買。所以如果買機意志夠強，就可以掃細鋪，就有機會唔使俾人屈錢。
分享到 :
最新影片
