山寨機抄乜機都夠膽，但原來唔係鋪鋪抄到足都有著數。就好似早排先面世o既 F8，佢原本係扮日本網絡商 au 同卡西歐o係 08 年出o既 800 萬像素手機 W63CA，仲要扮到十足十，連機背都刻埋「CASIO」同「EXILIM」Logo，但咁做竟然反而令部機唔賣得。
紅色呢部就係新版o既 F8，唔知有冇朋友認得出上面果個係咩簽名呢？
聽先達班大佬講，呢部 F8 衰就衰在揀錯模仿對象，原來香港好多人唔知 Casio 有o係日本出手機，覺得佢亂咁抄，於是唔想買，費事拎出街用果陣俾人笑，令人以為係亂印 Sony 筆電「VAIO」Logo 果類九唔搭八機款。部機o係大陸o既反應同樣麻麻，山寨廠睇見咁，於是出多個版本補鑊，整走左 Casio 個名，原本刻「EXILIM」個位，亦改為刻一個唔知乜人o既簽名，將成部機變到同 Casio 冇關係。
當然，亦有人話係因為 D 廠同舖頭驚俾 Casio 告，先至唔再賣抄到十足o既山寨 W63CA。點都好，有先達舖老細話自從出現左新版後，部機真係多人買左，所以而家多數舖頭都轉左賣新版，而無論新版定舊版，都係賣 $780 左右。
舊版 F8 機背上面有「CASIO」同「EXILIM」Logo。
真 W63CA 出廠時有日文貼紙貼o係機面同機背，呢部舊版 F8 連呢點都扮埋。
真 W63CA 個鏡頭有 800 萬像素，但 F8 只有 200 萬。
分享到 :
最新影片
