「2016 年，全球用 App 的時間接近 1 兆小時。」好難明呀！1 兆即係 1,000,000,000,000，數字大到唔想數。如果要將呢個 13 個位嘅數字變做大家睇得明嘅意思，即代表 2016 年每個 Android 用家每日平均用咗約兩小時去玩 App，而呢個數字仲會繼續攀升。
專門分析 Apps 數據嘅公司 App Annie 最近公佈咗一份有關全球 Apps 使用調查報告，除咗發現到上述驚人嘅 App 使用時間，仲有不同平台用家嘅習慣、App 呢個行業嘅發展等等。一齊睇下份報告嘅重點啦！
1、用家平均每月用 30 個 Apps，每日則用 10 個 Apps
哈哈，港女想話，淨係通訊類別嘅 Apps（Whatsapp、LINE），港女一日都用 3－4 個，仲未計社交媒體 Apps（Facebook、Snapchat）、打機、小工具等等。一日點止用 10 個 Apps 呀。
2、中國 Apps 於 iOS App Store 中收入大幅上升
報告指，由於 Apple 大力發展中國市場，令到區內 App 收入迅速增長，而絕大部分收入來自遊戲 Apps。其中《夢幻西遊》就成功為開發公司賺到超過 8 億美金（折合約港幣 62 億 5 千萬），其他類別嘅 Apps 收入都不容忽視。報告強調中國市場具發展潛力，叮囑 Apps 發行商注視這個市場。
3、Pokemon GO 全世界瘋行
Pokemon GO 係咩我諗唔使解釋喇，到而家港女仲有唔少小精靈訓練員朋友，喺街都時不時見到有人仲捉緊精靈，真係好長情嘅玩家！報告指 Pokemon GO 破紀錄地只用 110 日就突破 8 億美金收入大關，快過晒其他著名遊戲類 Apps，如 Candy Crush Saga、Puzzle & Dragon 及 Clash of Clans 等。
5、最多人課金玩日本 Game
港女完全唔感到驚訝。報告話，RPG 類係最成功「吸水」嘅遊戲。同時，中國嘅遊戲 App 收入增長係最快，直逼日本。而中國開發嘅 MMORPG 遊戲（即多人線上角色扮演遊戲）亦都係好重要嘅收入來源。大家有冇玩過呢？
6、最多人用嘅 App：Facebook 及 Whatsapp
全球嚟講，不論係 Android 定係 iOS，最多人用頭兩位都係 Facebook 及 Whatsapp，同香港係一樣。而香港頭 10 位嘅最多人用嘅 App 仲包括有 Instagram、天文台、LINE、OpenRice 及 WeChat 等。
7、收入最高嘅 Apps：Spotify 及怪物彈珠
綜合 iOS 及 Android 兩個平台，全球收入最高嘅非遊戲類 App 係 Spotify，頭 10 位仲包括有 LINE、Netflix、Tinder、愛奇藝等；而遊戲方面，全球收入最高嘅係怪物彈珠，頭 10 位仲包括有 Pokemon GO、Puzzle & Dragon、夢幻西遊、Candy Crush 等。
香港方面，收入最高嘅非遊戲類 Apps 係騰訊嘅 JOOX，頭 10 位仲包括有 LINE、KKBOX、Spotify、MOOV、陌陌等，大部分為音樂平台 App；而遊戲方面，最多人課金嘅係 Pokemon GO，其次係 Clash of Kings 及 Game of Dice。
中國嘅 Apps 都值得留意，佢地收入最高嘅非遊戲類 Apps 頭 10 位入面有一半都係影視娛樂嘅 Apps，例如愛奇藝、映客、騰訊視頻、Youku 等，大部分都提供直播功能，可見中國對呢方面嘅需求的確很大。
8、Android 用家大多來自未成熟市場
報告同時從 Apps嘅下載量、使用及收入方面分析了市場狀況。報告發現未成熟嘅市場中，有較多入門用家，他們多會下載「必用 Apps」，例如通訊類、保安類等，而這個情況多出現於 Android 平台用家。而在 iOS 平台上，可反映用家較多處於成熟嘅市場，他們較傾向下載一些專門類別 Apps，如財經類、旅遊類等。
詳細報告：App Annie
分享到 :
最新影片
