一個星期前，港女嘅好友突然同我講：「喂！我有飛呀」，港女以為佢搶到五月天演唱會嘅飛（誤），然後下一句佢就話：「佛誕一齊去慈山寺開放日囉！」
大家唔好誤會先！自從慈山寺兩年前起好，港女有幾次經過見到觀音像都講話想入去參觀下㗎喇，誠哥用咗 15 億起出嚟㗎喎，造價咁高，港女體內嘅好奇寶寶因子就自動啟動㗎嘛（講笑）。於是乎港女當然應承好友，去開放日睇下啦！
▲入寺有嚴格服裝規定㗎，上衣一定要有袖，下身嘅褲或裙長度就要去到小腿中間。
搭車入去嘅途中，好友問我有無下載個 App 一陣入去用。港女第一個反應係：吓！慈山寺有個私伙求籤裝香 App？佛門清靜地唔係黃大仙喎…
原來港女誤會咗，慈山寺個 App －「音聲聞法」係作導賞用途為主，似係博物館嗰啲 App 多啲。個 App 用藍牙偵測位置，去到就近嘅導賞點，就可以選擇睇文字介紹或者聽聲音導航。除咗介紹寺廟內嘅藏品，例如觀音像，佛像、壁畫等，另外仲有「心之導航」，帶領善信用心體會佛法。
▲寺內仲有免費 WiFi，用嚟即刻下載個 App 亦得。
唔試由自可，俾港女知道咗，又好奇寶寶上身。原來「音聲聞法」 App 入面嘅中英文語音導航係由顧紀筠同 Desmond So 錄製，配樂仲搵到趙增熹義務編曲，個個大有來頭。個 App 仲參加過 Marketing Magazine 舉辦嘅「Mob-Ex Awards 2017」 ，啱啱喺三月得到最佳手機應用程式（旅遊及款待類別）嘅銀獎。
▲ 自己去參觀可以自助導賞都幾方便。
講真，個 App 就唔係好特別，但就夠晒簡潔易用，非常配合慈山寺嘅風格。雖然慈山寺嘅定位唔係旅遊景點，而係教育用途，要入去參觀要早幾個星期預約，仲嚴格控制人流，但就因為咁先保持到優質體驗。港女喺開放日入去都完全唔覺得擠逼，行得舒服之餘，寺內嘅義工又十分熱心。加上慈山寺地理位置稍為偏僻，建築嘅設計及風格喺香港較少見，港女當日去到覺得自己尤如置身日本，都係多得好友有飛預埋我咋！
▲當日，有慈山寺嘅職員同我地講，寺廟設計有參考過日本。例如上圖呢個鐘樓咁，係咪好有日本 feel？
Leave a Comment