唔駛驚濕身！辛尼地獄測試防水 Hoodie：豉油、辣椒油、偈油照倒落娜姐度！

天有不測之風雲，相信各位 wire 民無論出街定在室內，都應該試過被雨或咖啡等液體淋濕身，市面上有不少聲稱防水的衣服，但實際防水效果就相當參差，加上大部份都以「風褸」款式推出，未必適合任何時候穿著。今次介紹來自日本的眾籌防水褸 One Swing Parka，就聲稱無論水、咖啡、茶或奶等日常生活最常接觸的液體，都可以有效隔絕，就連最易入水的拉鍊位都一樣無問題，實際是否一樣咁勁，就試俾各位 wire 民睇！

Made In Japan 返工出街都著得

想必各位 wire 民出街食飯，都試過不小心而「倒瀉」餸汁，女士們就今次介紹的防水樓 One Swing Parka 除以防水功能作為主要賣點之外，另一個相當吸引買家就是日本製造，設計師木村昌史本著 Life Spec Wear 理念，以先進科技加入日常著用衣物上解決日常生活問題，平平無奇既外套都做到風褸級防水效果，相信不少 wire 民都會因此而感興趣。用料方面，根據標籤上顯示，有超過 90% 都是棉，因此著上身就會更加舒適透氣，長時間穿著沒有任何焗促的感覺。另一個賣點就是拉鍊位都同樣做到防水功效，防止液體經拉鍊位滲入，比起市面上同樣功能的衫，在設計時真正考慮到實際情況。這款防水外套同時有男/女裝及童裝，全家大細一齊著就最啱！

▲平凡中見不平凡，件外套唔同你講都真係睇唔出可以防水!

▲外套還有兩個袋，就可以放入手機等保護。

▲這件外套由設計到製造均是 Made In Japan，相信都可以吸到買家。

▲外套超過 90% 的物料都是棉，因此著上身都相當舒適亦不會覺得焗促。

真係咁勁定「吹水」？

講到防水功能衫，不少產品其實只可以防一般的清水或牛奶，一旦遇上像豉油或餸汁等較深色的液體，就即時現形。今次，就等辛尼為各位 wire 民對這件外套作出不同的測試，當中分為「初級」、「中級」及「地獄級」，究竟這件防水褸又捱唔捱得過呢？

「初級」測試

所謂的初級測試，就會用上清水、牛奶和咖啡這類大家較日常接觸到的液體作為測試，而結果亦都相當滿意，基本上全部液體都會直接流走，並不會殘留在外套之上。同時測試拉鍊位的防水功能亦同樣成功，就連外套的「袖口位」位甚至內裡都同樣達到防水效果，這點令小編有點意外。

「中級」測試

來到中級測試，則會用上一些顏色較深的液體，例如豉油和辣椒油，尤其是辣椒油為油質，因此有機會被外套吸收。經測試發現，頭油同樣會快速流走並不會殘留在外套之上，至於辣椒油雖然會有水珠狀殘留在外套之上，但只需要用紙巾快速吸收都不會留下太明顯的痕跡。

「地獄級」測試

最後的地獄級測試，就會用上非液體狀態，當中包括茄汁、女士用到的化妝液、唇膏和汽車用的「偈油」。當 One Swing Parka 遇上這些非液體的物質時，由於並未能快速流走的關係，就會被外套所吸收，就算用紙巾清潔都會殘留相當明顯的痕跡。但對於「偈油」其實倒在外套上都會變成水珠狀，其實只要快速「揈走」就能防止停留在外套上而被吸收。

辛尼評論：日常防水絕無問題

其實以各位 wire 民日常遇到的問題，大部份都是水、咖啡或食飯時的豉油餸汁等，又或者外出時突然落大雨，One Swing Parka 都能達到相當出色的防水效果。至於，像這今次測試部份中用到的化妝液和「偈油」其實都較少會直接倒到身上。

建議售價：$999

查詢：Backers（網址）