港女科技一週：韓團 FMV 變裝揭秘

上個星期，港女見到有人分享咗一條 Fans 剪 Twice 唱 TT 嘅變裝 MV，仲引起唔少朋友討論。唔講你可能唔知，港女初中時期曾經係韓粉，韓流未成形嘅時候，港女已經中咗韓毒，其實對於呢啲 Mixed Stage MV 見慣不怪，不如等我又講下點睇呢啲變裝 MV 吖～

以前港女仲有睇大台的時候，曾經同朋友抱怨過大台的音樂節目唔好睇，歌手冇足夠時間唱晒成首歌，舞台唔會有為歌手而設的特別 setup，即便是運鏡都千篇一律，悶到唔想睇。當時港女私底下同朋友交流過韓國音樂節目的播法，講話人地有幾重視舞台的編排，就連直播都可以做到 MV 鏡頭的特效。幾年前喺香港搞的 MAMA（Mnet 亞洲音樂大獎），港女有睇直播，除咗感到驚訝，港女仲覺得香港電視業真係差到一個點。

你地睇下呢條直播片，個 CamMan 唔止要按劇情發展做一鏡過拍攝，仲要做埋第一視覺交戲，同首歌本身個 MV 係一樣咁滯。雖然佢成壇嘢喺香港搞，但港女都幾肯定背後全盤操作都唔係香港人，因為我地從來都唔會咁樣 train 啲 CamMan 及其他幕後人員咁做直播。

咁樣做當然有弊病啦，首先 MAMA 係一個現場舞台活動，佢地咁樣玩鏡頭，對於購票入場睇 LIVE 的朋友係好唔公平，因為成個表現就好似係做畀部機睇，唔係做畀人睇。但另一角度睇，佢地又好聰明。因為透過電視畫面接觸到的人數一定係遠超場館內，佢地將重點放喺鏡頭度又無可厚非。

扯得遠咗，講返轉頭 Twice 條 TT 變裝片，究竟係咪因為啲 Fans 太瘋狂，所以佢地先整到呢啲咁正嘅 FMV（Fans-made MV）呢？港女問過做剪接嘅朋友，佢不屑咁講，「要剪一條咁樣換衫嘅片其實唔難，最難係啲片源個個運鏡都一樣囉。」朋友一語道破咗個重點。

唔知大家知唔知，韓國歌手上音樂節目的表演真係一式一樣。港女嘅意思係，當佢地唱同一首歌／跳同一隻舞的時候，除咗妝髮同服裝會有唔同之外，電視台嘅運鏡／切鏡好多時係一樣㗎！原因係韓團編舞的時候，仲會設計埋運鏡，成員會識得望返相應鏡頭，亦令團隊入面個個都有平均嘅曝光率（又或者相反，故意捧團內某幾個成員）。咁樣係幾方便電視台操作，仲一定好睇，加上韓國有齊晒啲拍攝設備，想搞幾大都得。

但另一個重點仲「恐怖」，就係團體入面的成員每一次表演個表情都係一模一樣㗎，所以變裝 MV 先會顯得咁無蓬。但咁樣嘅意思咪就係個個成員嘅表演都勁機械，好似 set 咗 programme 照 run 咁，亦唔人性化。譬如話早兩年 GFRIEND 喺落雨濕濕嘅舞台度表演，有成員不停跣低，但就好似機械人咁不停爬返起身繼續直至完場，一方面你可以話佢地好敬業，但另一方面你地唔覺得真係好 T T （心酸／喊出嚟）咩？