聽日就是 Nintendo Switch 港行的正式開賣日，唔知各位已訂機的 wire 民是否十分期待呢？相信各位 wire 民都知道，Switch 的其中一隻「護航作」，就是老牌大作《薩爾達傳說》的最新系列《荒野之息》。筆者拿到手後都玩了一晚通宵，究竟好唔好玩？難唔難玩？主角 Link 用咩手拿劍？係咪仲係咁易死？個地圖又大成點？而家就等 Edward 同大家分享一下啦。
（戴定頭盔：筆者都好多年無玩 Zelda，可能會唔太熟，講錯大家請多多包容。另外，此篇主要是畀新手或者以往少接觸《薩爾達傳說》系列的 wire 民睇，對於死忠支持者，大家不妨自行體驗吧。）
故事大綱
具體來講，今次 Switch 上推出的《薩爾達傳說•荒野之息》，時間軸大致上是位於差不多廿年前推出的《時之笛》之後，但具體是位於哪個位置？筆者亦不是太清楚。遊戲一開始時，只知道主角 Link（林克）已沉睡了 100 年，而醒來時整個 Hyrule 王國已經變成一片荒野，林克亦對以往（包括沉睡之前）發生過的事完全失憶，遊戲就隨著林克從貌似水床的東西（咦？！）中甦醒並從洞穴走回現實世界而開始。
▲一開始主角 Link 就身處類似墳墓的地方，並睡在一張極貌似水床的物體。之後先知原來主角已經沉睡了 100 年，睇來呢張床好好瞓播，唔知係邊有得買呢？LoL
▲起身後主角自然係「被剝光豬」啦 LoL，快啲去搵衫著啦。
地圖真～係～好～X～大！
有玩過 Zelda 的 wire 民，相信都知道這款遊戲既是動作 + 解謎遊戲，另一個特色就是採用開放式地圖設計，而今集的地圖真係超～級～無～敵～大！先唔講一開始的 Great Plateau 由東至西、南至北行是旦一邊路都已經超耐（用搖桿控制主角行捽到指頭痛），更重要是這只是第一關的版圖！真正整個 Hyrule 王國的版圖確實是無敵大，再加上之前提及的開放式地圖設計，確實是大家想一開始就直搗黃龍殺 Ganon 可以（製作人係咁講），想慢慢跟住劇情跑睇番 Link 無咗記憶呢 100 年係點亦得，耐玩度超高。
▲今集地圖超級大，單係第一關已經大到離哂大譜。
▲偏偏主角又唔係幾夠氣，跑兩步就要抖（瞓了 100 年唔夠運動係咁架啦），要係地圖一邊跑到另一邊都幾哂時間。
▲有時係咁大地圖，真係會搵唔到要去完成目標的目的地，呢個時候可以爬上高處（遊戲內的高塔係最佳位置），之後按下右搖桿開啟望遠鏡，再移左搖桿移動視點，當找到地方後在該處點按 A 鍵就可以在地圖記下該位置，之後開地圖照住個個方向行就無死了。
▲《荒野之息》採用開放式地圖設計，只要主角達到目的就得，點行經邊自己話事：想行大路得，想爬山經小路去亦得，小心唔好跌死就可以了（只要爬山時綠色 bar 唔好無哂就無問題）。
▲遊戲入面都會遇到唔少 NPC，對答時的答案大家隨心答就可以了，基本上對故事唔會有極大影響。
▲當然，時刻查住任務目標就唔會浪費時間啦。
另外，在地圖中大家基本上點行都得：想在大路走打怪可以，爬上高山亦得（留意體力，萬一無氣就會直跌山谷跌死，大家萬一唔夠氣可以跌緊個時按 B 制減慢跌速，亦可能會有機會回到氣繼續爬），確實十分自由，唔似一般 ARPG 咁有個劇情同路線限住大家點玩，真係幾正。另外提提大家，有些地方，例如：高塔、神廟等，如果成功征服，是可以開啟傳送門的，之後只要按「-」鍵開啟手上的 Skeikah Slate（平板電腦？！），就可以選擇其他傳送門，然後就即時去到該處，呢個方法真係可以慳番唔少腳骨力（尤其是從高塔落來，在未拿到滑翔風箏 Paraglider 前，絕對可以防止失足從高處跌下死亡……）。
▲主角腰間的 Skeikah Slate 開啟後就可以看到地圖，而要用傳送門亦要用到佢。
▲只要大家身處任一傳送點，之後開啟 Skeikah Slate 內的地圖，再將遊標指去想去的藍色點點（這些為已開啟的傳送點），再選擇「Travel」。
▲大家就可以瞬間移動到另一個地方了。
▲用這方法移動除了節省腳骨力，亦可以有效避免從高處爬下時不慎失足跌死。
▲當然，完成第一關地圖獲得 Paraglider 滑翔傘後，就唔驚從高處落來啦，只要跳出空中再按一下 X 鍵，就可以打開它，慢慢並安全地滑翔到地面了。
畫質以老任水準已超靚
在講 game 評之前先講講畫質啦。雖然，老任的遊戲講畫質，好多人會覺得是「傻的嗎」？（包括筆者在內都係咁諗）但玩過《薩爾達傳說•荒野之息》後，筆者真係忍唔住要講講。事實上，幾年甚至十幾年前筆者玩過的《薩爾達傳說》，多數也是 2D + 俯視視點 + 卡通化的設計，而今集《荒野之息》畫質已經是幾何級數的提升，如果同一系列內，相信只有去年推出，《薩爾達傳說•曙光公主》的重製 HD 版的畫質可以與之媲美。另外，亦採用了多角度斜視視點，加上更似動畫電影般的設計，玩起來視覺效果已經很正了。當然，筆者絕對建議大家駁上大電視玩，因為之前的文章都已提及，與在手提模式上玩，TV 模式的畫質更好，玩起來會更爽。
▲單係個幾款進入遊戲時的桌布，已經覺得超華麗（以老任遊戲質素而言）。
▲遊戲一開始由墳墓（咦？！）走出來時的畫面已經是極震撼。
▲之後的遊戲內風景畫面及過場畫面，同樣是十分華麗漂亮（同樣是以老任遊戲質素而言）。
▲即使是遊玩時的平常畫面，筆者都覺得已經十分滿意了。（值得一提，今集 Link 繼續是用右手拿劍……）
繼續好易死！唔好亂用箭
以往的《薩爾打傳說》系列，都有一個大挑戰：難打！難打在不是解謎難，亦不是對手特別勁，而是主角特別「薄血」，好容易死。在今集《荒野之息》，情況繼續如此，筆者試過畀敵人隻騎住馬的怪獸衝過來，即使有 4 個心心命都被「秒」，確實無奈。所以，大家一定要睇住 Skeikah Slate（按 – 制）內的地圖，對住目的地搵方向，萬一遇到強勁敵人（例如：藍色怪獸、騎馬怪獸等）就離遠要跑，或者利用炸彈或在高地射箭將他們 KO，這樣才會比較安全。講起射箭，大家其實都唔好亂射，因為數量極其有限，最多試過都係得十幾廿支，尤其是火箭、冰箭呢類有特殊效果的箭種，用完就唔知幾時先可以再執到，所以在仍擁有時，請慳住用。
▲今集繼承了《薩爾達傳說》系列的「優良」傳統：主角極薄血好易死！！
▲唔止打怪易死，之前提及從高處失足跌下易死，即使游水時如果綠色 bar 耗盡，又會浸死，唉……
▲唔止呀，第一關地圖入面有一個區域係超凍的，主角走進去基本上每幾秒就扣半個心，又係超易死，唉……
▲ 想唔易死就唯有想辦法了，例如：在寒冷區域，只要坐在火旁，又或者拿住以怪獸殘肢點起的火把，就可以驅寒。至於山上或水中，就唯有小心一點了，前者盡量在氣力耗盡前找到落腳點抖氣，後者就盡量沿住淺水地方游，亦不要在河流又闊水流又急的位置游水過河。
▲至於對付敵人，有時可以用弓離遠攻擊（當然敵人都會識咁做！！）。但如果有弓無箭，都係無用……
▲遊戲入面有唔少地方（例如：怪獸聚集的地方）都好大機會會執到箭，另外離遠對住企在高台的敵人吹口哨引誘他們以弓箭攻擊你，只要射唔中你就可以去執番起支箭射番他們了。
▲另外，弓箭都要保留來打獵，因為只要射殺到隻動物，就可以獲得生肉，之後用來煮食就可以獲得補超多心的食物（後文會詳講）。
▲有時真係無哂箭，就唯有用 R 鍵離遠對住敵人掟武器攻擊啦。
其實又咁講，有時大家在荒野遇到的強勁怪獸，未必一定是任務指定要消滅的，萬一真係打唔過，盡量走（按 B 制可以快衝，但唔可以係咁按，因為會無氣），當離開怪獸的視線範圍，他們就會退回去，大家就安全了。
▲至於選擇武器方面，雖然重量級武器（例如：斧頭）攻擊力會較強一點，但攻擊速度比較慢，相比之下筆者更愛使用劍，一來攻擊較快，二來可以同時用盾，阻擋敵人攻擊。
初期加心為主！拉長戰線避免被圍
另外，每一個新版圖都會有幾個洞穴，只要大家能夠解開當中謎團，每個洞穴通關後都可以拿到一隻 Spirit Orb，當集齊 4 個後再到神殿，就可以獲得獎勵，通常一係就加心心（加命），另一個就係加氣（跑耐 D、爬山爬高 D 或者游水游耐 D 等），但初期其實 3 個心心都唔係太夠用，筆者建議大家先以加心心為主，加到 5、6 個時，之後再加氣，可能會比較實際一點。另外，當攻擊對手時，盡時不要同時一個打幾個（被圍好痛，同埋又轉視點又要顧住打人，一陣武器壞埋又要轉真係 GG），大家可以善用左邊 Joy-Con 的下鍵「吹口哨」引誘敵方來打，盡量拉長一點戰線，咁就可以輕鬆逐個擊破了。至於在高台上的怪獸：唔需要用番箭射他們，只要將地面敵人全解決後，再衝去台位置然後爬梯上去，再近戰 KO 他們就可以了，呢個方法係最有效同埋最慳箭的。
▲只要征服了神廟，就可以獲得一個 Spirit Orb。
▲當集齊 4 個 Spirit Orbs 後，就可以去到神殿（記住，唔係神廟！！），對住神像 Pray，之後就會問你是想加心定係加氣力，初期絕對建議大家加心至 5 個或以上（選擇第一個選項），咁樣先可以有效解決主角薄血的問題。
▲另外在攻擊敵人時，盡量避免被包圍，尤其是營地中的敵人，可以先向敵人掟個炸彈（如果未有此技就用吹口哨吸引注意），一來可以炸傷對手，二來可以吸引對方追你。之後就乘住回氣時不停往回跑，拉長戰線，如果追至近身就一個「回馬槍」用武器攻擊對手，通常對手此時會無乜氣，好難阻擋大家的攻擊。之後當掟炸彈回完氣後又向對手再掟，如此反覆做就可以消滅一整隊敵人了。
煮食、採礦好重要！
除了打怪、完成任務外，大家平常可以做的，還有不少事，最少煮食已經係好重要！點解？因為唔少食物經煮熟後，補的心心可以差好遠，例如：蘋果為例，未煮之前一個只可以補到 0.5 個心心，但如果在鑊內放入 5 個蘋果（本來合共可補 2.5 個心心），就可以補到 5 個心心，足足多了一倍！所以大家明白「食物要煮熟先好食」的重要性嗎？
▲有些食物是不能煮的，例如：一開始就會遇到，在大樹樹根生長出來的 Hylian Shroom 菇。
▲至於好多地方都摘到的蘋果，未煮之前只可以補到半個心，煮完之後會變為 Baked Apple，一個都已經可以補多 1/4 個心。
▲如果只係想逐個蘋果烤，用呢類火堆就已經做到。但火堆就唔可以用來煮菇，如果大家咁做會將菇燒成灰的，到時就屎都無得你食。
▲要煮更好的食物，又或者煮菇，就要搵呢種有鑊的爐來 BBQ。
▲例如：3 隻綠色菇就可以煮成回到 3 個心心的菇菇串燒了，比原來一隻菇只補到半個心有效好多。
▲至於蘋果，之前在火堆只可以燒成 5 個 Baked Apple，但用呢種鑊就可以煮成 Simmered Fruit，一份可以補成 5 個心心，真係救命用都得。
▲用來燒魚，直頭可以補成 11 個心，都咪話唔勁！
▲至於食譜，就要靠大家自己發掘了，有時都好大機會會變身「地獄廚神」，煮咗味唔知係咩的食物出來，但都叫做補到一個心心，好過無啦。
▲進入目錄後點按食物再選擇「Recipe」，就可以看回用甚麼食材將這種食物煮出來。
除此以外，煮食物還可以有其他用途，有時只要加入指定食材，煮出來的食物既可補心之餘亦可在指定時間內禦寒、跑快點等，十分好用。此外，有些怪獸被打死後，會留下一些殘肢，只要按照文字介紹，將這些殘肢與指定物料放入鑊入面煮，仲有機會獲得不同功能的藥水！
▲有時不同配搭的食材，又或者在指定食材混入動物殘肢，都可以製作出有特別效果的食物或者藥水，大家不妨自行發掘一下不同配搭。
除了煮食外，筆者玩了 8 小時《薩爾達傳說•荒野之息》，另一個重要的事就是採礦。相信大家都知道當完成第一個地圖之後，就會去到遊戲入面第一個有人有商店的村落：Kakariko Village，當中有不少商店，亦有衣服、武器、食物等買，但全部當然都要用遊戲內的貨幣：盧比付款的，而要獲得盧比，不像其他 RPG / ARPG 遊戲中，打完怪獸會跌錢（最少筆者玩了 8 個鐘未見過有跌錢的怪獸），而是要靠大家賣走手上的服裝、武器等獲得。當然，大家在野外打贏怪獸時獲得的武器等，都一一可以賣到錢，但實際上唔多，而最有效的就是透過採礦方式，採得較名貴的寶石或礦石，從而獲得大量金錢，這是最有效在短時間內獲得大量盧比的方法。而且大家不用等太久，只要去到 Kakariko Village 之後，就可以開始採礦石了（事實上在第一個地圖中，除了一個老人家〔唔係普通老人家咁簡單，係邊個大家自行發掘啦〕之外，就完全渺無人煙，更加唔洗講有店舖了，所以亦無機會用得著盧比）。這些煮飯、採礦等事，令筆者覺得有少少在玩 MH 的感覺，真係有點奇妙……
▲要採礦，梗係首先要把鋤頭啦。
▲對住山上面或者山腳的黑色石頭「一嘢轟落去」，轟多幾次就可以發現寶石了。
▲之後拿寶石去店舖，就可以用來換取盧比，之後就可以購買食材或者衣服、武器了。
▲在荒野行走時，在貼近村落附近的道路，亦有機會遇上可買賣物品的 NPC。
▲採礦並不一定會採到寶石，有時亦會採到像石鹽這類煮食時用的調味料。
解謎成份唔太難
至於解謎成份，一直都是《薩爾達傳說》系列的頗重要部分，去到今代《荒野之息》，暫時去到第二個地圖，都未覺得好難解，因為解謎的地方全部都集中在神廟（Shrine），而廟內都唔算太大，加上第一個地圖中的神廟，只是讓大家（尤其是新手）熟悉如何使用各種技能，只要用到就可解到廟內謎團，所以真係唔難。筆者始終未係玩好耐，可能之後劇情的解謎會有難度也說不定，但暫時來講，係容易的。
▲絕大部分要解謎的地方，都是在這些神廟內。如果門口顯示為橙色，就代表仍未征服；如果顯示為藍色，就代表已征服。
▲通常入到去再將 Sheikah Slate 放入指定裝置，就可以獲得在此神廟通關用得著的資訊或技能。
▲之後運用這些資訊或技能就可以有助通過障礙物。
▲有些神廟中亦會在寶箱發現武器或者道具，這些武器或道具配合技能，亦可以用於整走障礙物完成通關。
總結：真係欲罷不能之作！
總括而言，今次推出的《薩爾達傳說•荒野之息》，稱之為老任 Switch 的最佳護航作，絕對是有過之而無不及！當然，如果你是《薩爾達》系列的支持者，相信不用筆者介紹你都會衝去買番來玩吧？但即使之前從未接觸過這個系列的任何作品，玩落都一樣會令大家極度沉迷，當中的挑戰性、要用腦的程度、甚至故事性，都會令大家由夜晚玩至天光都唔捨得瞓！難怪外國不少遊戲評論網站，都為這款《薩爾達》系列新作評為最高的 10/10 分，即是滿分！原本覺得有點誇張，但玩落真係覺得值呢個分數。無怪乎有些外國評論都會講：玩過《薩爾達傳說•荒野之息》，大家在三月內還有時間玩其他（Switch）遊戲嗎？
