唔知有幾多人留意到呢～上個星期新任財政司司長陳茂波宣讀財政預算案嘅時候，Siri 咪突然亂入，講咗一句「Is there anything I can do for you?」嘅，如果港女無聽錯，波叔個 Siri 係男人聲嚟㗎喎！點解嘅？原來 Siri 只有於 4 個語系的語音預設性別入面係男性，嗰 4 個語系分別係阿拉伯文、法文、荷蘭文同英式英文。假設波叔搞過 Siri 的 Setting，咁好大機會，佢部 iPhone 的預設語言就係英式英文，因為 Siri 只有喺英式英文的介面預設為男聲。
（圖片來源：蘋果日報）
Siri 的語音性別喺部分的語系入面其實係可以轉換㗎，例如英文（除了愛爾蘭口音只有女聲）、普通話、日文、法文等，廣東話、韓文、泰文等就冇得轉換性別，再且大部分都係只得女聲。
至於點解英國 Siri 會預設係男聲，而其他語系入面大部分都係女聲呢？幾年前，有人問過蘋果，其發言人就冇特別回應。最近華爾街日報就有一個有關語音助理的報道，佢地估計，係同社會文化有關，例如可能係因為科技業大部分從業員都係男性，也不排除因為較多女性從事秘書工作，令佢地聯想到 Siri、Cortana、Alexa 等呢啲語音助理係女性會比較好。其實如果大家有留意，淨係講香港，其實好多語音錄音都係女聲，例如地鐵廣播、電話語音系統、GPS 導航系統等等，原因係因為用家聽得順耳。
報道隨後引述美國印第安納大學嘅調查，發現原來唔止男性鍾意聽女聲，女性都鍾意聽女聲㗎喎。調查指出，語音助理聲調由女聲表達，會讓男性或女性使用者有友善、溫暖及被照顧的感覺（welcoming, warm and nurturing）。但報道就質疑，語音助理預設為女聲可能有「性別偏見」的情況出現，鼓勵用家試下轉換下語音助理的性別。
唔知大家個 iPhone 預設用咩語言㗎呢？港女個 iPhone 介面就係用英式英文，但由於工作關係 Siri 就係用廣東話召喚。過時過節，我地公司就一定會同 Siri 打招呼：之前叫 Siri 唱 PPAP，新年同佢講下恭喜發財，情人節問佢可唔可以陪我過等等。如果廣東話版 Siri 有男人聲，港女都想試下用喎，你地又有冇興趣呢？
Leave a Comment