今時今日,智能電話已經與大家生活息息相關,基本上無帶一日,已經好似以前「無電視睇」咁嚴重。但究竟呢個係大家已經上癮所以覺得無咗智能電話唔得?定係實際生活上真係已經夠用?為咗玩死自己,筆者決定放低手上面部 Android 電話,拿番屋企櫃桶底部 Nokia 8210,實行來個「無網生活」,究竟筆者可以頂到幾耐?而家就同大家分享一下個「心路歷程」同埋感受啦。
首先要做的,自然是要將聯絡人抄到 SIM 卡之後再抄到 Nokia 8210 入面啦,唔係邊個打來都唔知。首先第一步,就等 Edward 教教大家點樣將聯絡人抄入去 SIM 卡儲啦。有一點大家要留意:就是此方法只支援在 Android 電話上進行,如果是 iPhone 的話,是沒有正常方法將聯絡人備份到 SIM 卡的(除非大家將 iPhone JB……)。
Step 01
首先進入聯絡人,然後進入設定再選擇「匯入 / 匯出」,如果是用緊雙卡雙待電話,又入了兩張 SIM 卡的話,就要揀匯出至哪張 SIM 卡。
Step 02
之後就選擇匯出哪個聯絡人來源,然後就選擇想匯出的聯絡人。要留意的是 SIM 卡可放入的聯絡人數量只有最多 200 個,如果你的台有些預設的服務「連絡人」的話,更可以已佔了數個,即係得番 190 個甚至更少;更要留意的是有些人會在同一個聯絡人中放入多過一個電話號碼,當匯出至 SIM 卡時會自動一分為二的。所以如果大家像筆者般擁有過千個連絡人的話,就要作出取捨,只放入較常聯絡的親友或工作伙伴了。
Step 03
匯出後,將 SIM 卡放入 Nokia 8210,之後開機,可以運作時按下「下」按鍵,就可以見到匯入了的聯絡人了。
Step 04
之前提過如果一個聯絡人入面有兩個號碼,系統匯出至 SIM 時會幫大家一分為二,筆者在 Nokia 8210 入面就見到了。
相信對電手提話有一定「年資」的 wire 民,應該都記得當年的手提電話都是用傳統的大 SIM 設計(當然當年沒有細 SIM 自然沒有所謂大細之分啦),而今日的智能電話,絕大部分都是採用 Nano SIM,少量仍然在用 Micro SIM,還使用大 SIM 的已是絕無僅有了。所以大家如果要將自己的 SIM 卡放入 Nokia 8210 度用,一定要用卡套,呢類卡其實市面唔少電話舖都買得到,一般都有幾蚊雞,有啲質量好少少就幾十蚊左右,同埋唔少都包埋 Micro SIM 轉大 SIM 及 Nano SIM 轉大 SIM 兩種卡套,大家自行入手就可以了。
▲市面其實好多地方都有呢類卡套套裝買,一個有齊 Nano 轉大 SIM、Micro 轉大 SIM 同埋 Nano 轉 Micro SIM,仲有埋支針,價錢都完全唔貴。
▲買番來後只要將 SIM 卡放入對應的卡套,再放入 Nokia 8210 機內的 SIM 卡槽,就可以了。
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Apple 承認 iPhone 鬧鐘無聲問題 將推系統更新解決
今時今日已是 4G 網絡普及的年代,可能大家會問:Nokia 8210 只係收到 GSM 900 / 1800 2G 網絡,究竟我用緊個網絡商仲收唔收到 signal?筆者就拿來香港現時主要幾個網絡商的 SIM 卡,包括:csl(1o1o 屬同台)、3HK、SmarTone 及中國移動香港來試試,測試地點為觀塘市區,而計時就由按下開關鍵起計到畫面顯示出網絡商名稱為止。究竟結果係點?大家睇睇就知道了。
結果:需要長達 59.35 秒才成功收到訊號,而且一開始顯示出 csl,但之後就轉為 SUNDAY,很懷念的網絡商名稱哦!不過訊號接收就只屬一般,只有 2 格。
結果:3HK 連接快一點,只需要 45.25 秒就可以完成。至於接駁完成後,顯示的並非 3HK,同樣地是極懷念的 Orange!!訊號接收同樣是最好,滿格!
結果:連接速度介乎 3HK 及 SmarTone 之間,需要 55.99 秒完成,而且接收都算不錯,只是比 3HK 差一點。
▲連接速度不算太慢。
結果:連接簡直可以用光速來形容,只需要 12.61 秒就完成接駁,不過訊號仍然沒有 3HK 穩定,與 SmarTone 相若,長期維持 3 格左右。
好啦,收到訊號之後梗係要試下電話基本操作仲 work 唔 work 啦,而多數人當年用 feature phone,最重要自然是通話及 send SMS,究竟各網絡商的 SIM 卡放在 Nokia 8210 入面,呢兩方面的表現又如何呢?而家就同大家試試!
結果:打電話係成功的,接收都算清晰,沒有太大問題。至於 SMS 方面,接收就似乎一般般,多次都是要 send 兩個 SMS 對方先至一次過收到,唔算穩定。
結果:同樣地,打電話及傳送 SMS 都無問題,通話接收都清晰,send SMS 另一邊立即收到,十分理想。
結果:可成功打電話及傳送 SMS,不過表現就比上面兩個台差點,通話間或會窒窒下,而傳送 SMS 亦需要大約 10 秒左右才收到。
結果:同樣可以成功打電話及傳送 SMS,表現都算理想,話音清晰,SMS 雖然沒有 3HK 般即時,但都與 SmarTone 差不多,未至於像 csl 般不穩定。
好啦,大家都知道時下流行 send emoji 畀朋友,就算 send SMS 都會有時收到。但大家都係用智能電話自然睇到啦,但究竟一邊係智能電話,一邊係 Nokia 8210 呢類黑白熒幕 feature phone,收到 emoji 後又會變咗乜?而家就同大家實試,兩邊均是用了 csl / 1o1o SIM 卡,而採用的 emoji 會是最普通的「?」笑臉 logo。最終結果是:在 iPhone 上見到的 ? 笑臉,在 Nokia 8210 上就變了兩個長方格(即是代表顯示不到),換言之大家在 Nokia 8310 上,就見不到朋友傳給你的 emoji 了。
▲在 iPhone 上面都見到個 emoji,去到 Nokia 8210 上面就讀唔到了。
相反,當年在 Nokia 8210 上,最威水已經是將預設的圖片 embed 在 SMS 內變為類似 MMS 的訊息,這樣就可以令對方收到有圖片的 SMS 了,但筆者試過從 Nokia 8210 傳送這種圖片 SMS 到 iPhone,卻完全收不到。換言之,如果你真係同筆者一樣,轉用 Nokia 8210,就要有與親友「純文字溝通」的覺悟了。
▲在 Nokia 8210 上面可以在 SMS 附加圖片,但係傳咗個 SMS 去 iPhone 就跌咗落百慕達三角,完全消失……
好啦,而家大家都會拿住部智能電話無時無刻「禁禁禁」,好多時都係用來聽歌、打機。當然,換了 Nokia 8210 後,無得聽歌是常識吧,那麼還可以有咩娛樂呢?而家就同大家講講啦。
▲貪食蛇,相信大家都識啦掛?靠 2(上)、4(左)、8(下)及 6(左)操控條蛇前進,食得好長個時小心個口撞落蛇身呀!最得意係仲可以雙打,用紅外線連線同朋友一齊玩,不過而家要搵到個同樣用緊 Nokia 8210 的朋友應該都幾難吧?
▲邏輯猜圖,用最短時間帶對答案就贏,不過到今時今日筆者都唔係咁識玩……。
▲蘋果棋,絕對是筆者當年在貪食蛇以外最沉迷的遊戲!
▲記憶遊戲,更加唔洗講啦?記住唔同牌係邊個位,揭到一對就可以消除直至所有牌都無哂為止,同樣按2(上)、4(左)、8(下)及 6(左)移動遊標,並按 5 選擇。
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Apple 承認 iPhone 鬧鐘無聲問題 將推系統更新解決
好了,睇來去到最關鍵的部分:大家都知今時今日,身邊絕大部分親友都係用緊智能電話,而溝通都由以前打電話 send SMS,轉為今時今日用 email、WhatsApp、Facebook Messenger 或 WeChat,甚至打電話都用埋呢啲 APPS 入面的通話功能。筆者放下智能電話轉用 Nokia 8210,究竟可以一日少收幾多個 WhatsApp、Facebook Messenger 等的訊息及來電,以及少收幾多個 email 呢?對方見到無覆 WhatsApp、Facebook Messenger 訊息或者 email,又會有幾多人打番電話來問點解呢?筆者為免影響工作,所以選擇了星期六來進行測試,時間為早上 8 時左右開始,直至晚上接近 9 時結束,大約都有近 13 小時。
▲短短一個星期六,已經漏睇了 142 個來自不同社交平台的訊息……
▲電郵方面都有 63 個未閱讀,當中公司電郵佔了 41 個……
13 小時過去了,結果筆者合共少收了 36 個 WhatsApp 訊息、98 個 Facebook 提示、1 個 Facebook Messenger 訊息、7 個 LINE 訊息及 63 個 email,撇除廣告訊息都仍然有 3 分之 2,相信如果是平日工作天的話,情況會更嚴重。另外,整日接到的電話,合共只有 3 個….而且致電的亦並非因為無覆 WhatsApp、Facebook Messenger 或者 email 而來電,而是直接會打電話來的親友。甚至見到有些公關、工作伙伴見到唔覆 message,都只係繼續 send messagesssss 問幾時覆,而唔會簡簡單單打個電話來問。睇來,今時今日的對外溝通模式,真係變哂……
試了一日(其實都唔夠一日),筆者已經頂唔順回歸十幾年前用 Nokia 8210 的日子,正式回歸智能電話的懷抱。先不說當年的電話不能影相玩 selfie、打機、睇戲、睇地圖搵方向等,單是對外溝通,今時今日唔少人都習慣了只是透過社交平台更新個人狀態或與別人溝通,他們會選擇打篇「萬字」訊息,但卻不會考慮直接打個電話來問(事實上星期六打個電話來都唔係咁難吧?)。這個現象,筆者確實不太理解,畢竟有時筆者都會將電話靜音,變相有 message 來時真的可能會 miss,但反而電話最少都會震機,反而未必會 miss,如此直接的溝通方法不用,反而大家倚賴了所謂的高科技……究竟科技是以人為本?還是人已經被新科技寵壞?這是筆者最百思不得其解的地方……
但無論點都好,筆者只能講今時今日人與人之間的溝通模式,已經與十幾年前有極大分別,為了令自己不會與這個世界失去連繫,唯有無辦法繼續用 Nokia 8210 應付日常生活所需,而要轉回使用智能電話(最少 Nokia 8210 不能當作與外間溝通的主力機……)。這樣可悲嗎?確實有一點,但世界就是這樣,天天都在轉變不等人,如果你不能改變自己迎合轉變,就只有被淘汰一途,就如同當年的 Nokia 8210、8310 等機款,只能在歷史鴻流中被沖沒……
不過如果大家真係想用番 Nokia,又可以點?據聞下星期香港會有網絡商令 Nokia「重出江湖」!究竟係咩機?唔通今時今日出番個部復刻版 3310?留意我們 unwire.hk 就知道了!
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Apple 承認 iPhone 鬧鐘無聲問題 將推系統更新解決