相信留意開 Tesla 電動車的讀者都大約知道呢部 Model X 的性能表現和 Model S 相若，而今次 Duncan 測試的為最頂級的 P100D 型號，配備 100kWh 電池及雙摩打四輪驅動、最高續航距離(NEDC 標準) 為 542 公里，在 Ludicrous 模式 0-100Km/h 僅需 3.1 秒，雖說 Model X 是一款 7 人車，不過它的加速力已屬超跑之列，而且 Model X 可以提供 5 / 6 / 7 座位的 Option 選擇，如果大家只談性能不論外形，Model X 的靈活性同實用性都比起 Model S 更加之高。Duncan 同娜姐早前就揸住部 Model X 環遊香港，究竟試揸呢部馬力超晒班的七人車有咩感覺呢?
Tesla Model X 基本介紹可以 按此
車身又闊又長 睇位泊車要小心
雖然 Duncan 平時已經揸開一部算係幾闊身的 7 人 SUV，不過見到 Model X 後仍然忍唔住講咗句:「嘩，架車咁闊既」，因為 Model X 摺左鏡闊度都有成 2.07 米，打開埋後鏡仲闊到 2.27 米，除左闊過 Model S 之外，仲闊過晒市面常見的豪華 7 人車例如：Toyota Vellfire、Audi Q7 SUV 又或者 Hummer H3 Jeep 等等、當然亦都闊過 Hiace 類似的貨 Van 啦，上網搵返資料原來連大家成日搭既紅 Van 闊度都只係有 2.09 米，即係話你揸部 Model X 差唔多揸住部小巴咁上下，要睇位的確有返一定難度，幸好係 Model X 前座比一般日系七人車例如: Stream、Wish、StepWeagon 較高，所以坐係駕駛席上面睇位比較一般七車人容易而且全天幕玻璃視野亦較廣闊，相信好快就可以適應到。
由航拍機拍下的 Top Shot 大家可以清楚睇到 Model X 有幾大部，左側的 Hyundai H1 貨 Van 雖然比起 Model X 略長一點，不過論闊度仍然是 2.2 米的 Model X 車身較闊， 而旁邊其他七人車款就顯示更加纖巧。
由於車身太長，即使成功泊位車頭或車尾難免會伸得較出，一般約 5 米長的公共咪錶車位大家要有心理準備會泊得非常辛苦，而且若泊 S 位更要睇前後車合唔合作，否則都幾難泊得入。
▲由於前排座位坐姿較高，車頭睇位並不算困難，加上一入 R 波後鏡即會自己調低角度，要睇車身兩邊的盲點就輕鬆得多。
而 Duncan 雖然上車之前覺得 Model X 車身幾闊，不過實際係路面上行駛又覺得不至於太笨重，但係就要留意小心將車行正自己條線，否則係橫制窄巷時一對後鏡好容易會過線，同其他車平排轉彎時就一定要加倍小心！而係隧道入面，例如三線的大欖隧道因為路面比較闊，揸住 Model X 都好輕鬆，不過如果要行返紅隧、獅隧之類的舊式雙行車線隧道，如果隔離有大車、巴士一齊行就要留心啦！
▲在元朗的市區行駛，若果遇到左右泊滿車而且有對頭車，那就會對司機的駕駛技術有點要求了。相反在3線隧道內行駛，Model X 仍然顯得相當靈活，司機無需擔心會隔離的大車太貼。
泊到落唔到 無謂挑戰地獄停車場
可能大家都想 Duncan 挑戰一下用 Model X 去泊出名嘅地獄停車場，不過老實講，如果揸住一架 4/5 座私家車都覺得個場好窄好難泊的話，建議最好都唔好搵部 Model X 挑戰了！ Model X 除左車身闊，車長亦超過 5 米(長過 Hiace)，即使比你揸到入停車場再塞到入個車位，先不論開唔開到 Falcon Wing 中門，隨時連前座的門都開唔到又或者攪到要爬出車，揸住部靚車就有失身份啦。另外，即使閣下技術好成功泊到位，亦難免會同其他車泊得太貼，萬一遇到開門Ｌ整花整凹隻門，咁就真係欲哭無淚了。
此外，Model X 前後設有多達 12 個感應雷達，螢幕既有紅/黃色提示，仲有咇咇聲響，其實揸住部 Model X 泊車真係好容易。
由於 Duncan 係荃灣 Tesla 門市取車，於是就去了就近地鐵站上蓋的一個大型商場停車場試下。官方資料顯示 Model X 車身高度 1.68 米(配備 20″ 輪呔及標準避震設定)，而 Tesla 則建議停泊的停車場高度不低於 1.8 米 (減少 Falcon Wing 出現問題的機會)。當駛入停車場時，由於 Model X 車身較闊，基本上全程都會聽到前後雷達的「叮叮噹噹」提示聲，而錶板上面雷達亦不斷出現黃及紅色警示，提醒駕駛者車身和牆壁之間尚有多少空間 (以顏色和厘米顯示)，Duncan 就覺得雖然煩少少，不過就唔駛擔心「High」花架車，反而要留意一對伸到最出的倒後鏡，再加埋入 R 波可以係大屏幕上面睇到後鏡頭畫面，其實有咁先進的電子裝備輔助，比較傳統汽車黎講已經一 D 都唔難，只要停車場的大小屬於正常，慢慢泊一定無問題。
▲其實 Duncan 泊的停車場已經算是寬闊，不過大家只要睇睇地下的線便估計到如果兩邊都泊咗車，司機要落車都可能有點辛苦。而測試中的 P100D 雖然配備 22 吋輪呔，不過係SET 低左 suspension 情況下一樣泊得入去 1.7 米高度的停車位。
Falcon Wing 中門其實設有多個 Sensor，所以基本上冇可能撞到隔離車隻門(可能開緊門自動關上)，而係 Safe Mode 最細既開門角度下，娜姐都可以輕輕鬆鬆喧咁側身上落車。不過由相片可見，開門時 Falcon Wing已經進入隔離車位的空間…..
操控靈活 加速力和 Model S 睇齊
係測試當日 Duncan 同埋同事們都遊走了新界西、西九龍及東九龍一帶大約 100 公里，試駕 Model X 的感覺係轉向明顯不如 Model S 般利落，不過以七人車而論又算是十分靈活，電子式軚盤路面感雖然不及機械式車種，不過 Model X 勝在在可以自由設定 Steering 至 Comfort / Normal / Sport 等模式，駕駛者可以自行選擇不同的軚感反應，而氣壓式 Suspension 亦可以隨意調節由 Low 到 Very High，除了可以調高避震防止上落斜、過路膊時刮底的機會。雖然理論上 Model X 車身較高應該不利過彎，不過由於它的電池置於車底降低重心，加上懸掛調較得宜，高速轉向的穩定性亦相當高，沒有出現一般高重心七人車連續過彎「拋拋下」的感覺，係出晒各名路爛的龍祥道仍然可以開得十分平穩。
另外加上 Model X P100D 的動力輸出亦絕對唔可以睇小， 0-100Km/h 同樣只需 3.1 秒，如果開埋彩蛋模式 (詳情留意老板 Elon Musk 的 Twitter)，仲可以加快到 2.9 秒，基本上可以同 Model S 睇齊。Duncan 就曾經係滿座情況下試試加速能力，強勁的直線加速力就好似坐緊橫向跳樓機一樣，即使一些 3500cc 級別 7 人車的加速力仍然難以和 Model X 相比，而上斜爬頭更加絕對唔會好似一 D 細 cc 七人車咁因為坐滿人而唔夠力，即使要上將軍澳隧道、薄扶林道大斜路，只要你肯踩油 Model X 都會比幾多去幾去，可以話係「大把貨剩」，爆車坐滿 7 個人隨時仲可以快過隔離架超跑，都咪話唔過癮！
▲因為冇左引擎聲，上斜時坐唔坐滿乘客基本上都好難分辨，唔似傳統電油車冇力時 Engine 會叫救命咁，馬力絕對話黎就黎。
氣壓懸掛 舒適媲美歐洲房車
至於舒適度方面，Duncan 認為 Model X 的座位高度適中，上車後不會覺得好貼地或者要爬上車，姿勢算是相當自然，坐得耐亦唔覺好易攰。而由於 Suspension 可以自由調較由 Low 至 Very High，Duncan 認為 Model X 懸掛表現不下於高級的歐洲房車，而且由於避震相當舒服，加上部車馬力大、速度高，好容易就會唔小心超速，加上電軚將路面狀態模糊化，即使係比較差的路面仍然唔覺路爛，絕要小心不自覺地「開快咗」！另一方面，Duncan 亦發現 Model X 的耗電明顯地較 Model S 為高，由剛取車時全滿電量大約可行 500 多公里，到還車時約剩下 250 多公里，比起上次測試 Model S 時略為「大食」，不過 Model X 車身比 Model S 重，而且測試全程基本上都是滿座進行，而且又多次進行加速測試，耗電表現都算合格。
▲Suspension 可以手動隨時調較，由相中可見避震升起的幅度算幾大，有效減少刮車底的情況發生。
▲Duncan 非常喜歡視野超廣闊的全天幕車窗，不過坊間沒有任何替代品，若要修理一定要回 Tesla 進行。不過後鏡 Size 太細，如果中排坐滿人，根本不能看到後方情況，需要依賴兩邊車門的後視鏡。值得留意是 Model X 太陽擋採用隱藏式設計，使用時需要由 A/B 柱伸出，此舉有效解決了太陽擋阻擋全天幕擋風玻璃的問題。
中排上落夠方便 後排座位較窄
Model X 採用 232 座位佈局，中後排座位究竟好唔好坐呢? 有份坐車的 unwire 同事們就覺得尾排比較窄，以娜姐 1.6 米左右的身體亦差不多頂膝頭，尾排比較適合小朋友或者寵物乘坐，而中排的 3 座位由於不能調較背部的角度(只可作前後移動)，靈活性一般，幸好中排座位闊度仍然充足，3 位成人排排坐亦不會覺得逼，乘客的舒適度同事們亦算滿意。不過只有最後的排座位可以收起變做儲物空間，未能做到「瞓平」埋中排放野，未必適合需要大量載貨的人士使用。
▲Falcon Wing 中門其中一個好處就是任乘客再高(姚明另計) 上落車都唔會撞到頭，而且中排座位只要一按盲會自動向前/後移，方便後排乘客上落。
Falcon Wing 方面，大家可以留意返娜姐的測試片，相信已經可以回答大家大部份疑問，而 Duncan 係泊停車場時就留意到雖然中門設有多個感應 Sensor 避免撞門，但係仍然有幾個「死穴」，就好似好幼身的電線、水管，測試時 Model X 的中門都未能成功停止車門繼續打開。如果閣下泊車的停車場天花設計比較複雜，最好還是利用屏幕的 Control Panel 手動打開比較安全，否則好大機會可能會刮花車門…..
▲Falcon Wing 備有多個感應雷達，要偵測如旁邊的汽車、大型物件、天花板等有大面積平面可信性極高，而車內的顯示幕亦會有相關提示。
▲測試當日 Duncan 發現 Falcon Wing 的雷達仍有不少漏洞，例如由於車頂沒有SENSOR，所以對於一些較不顯眼、體積較小的物件如: 電線、水管未能成功偵測到，建議用戶最好手動打開車門，避免刮花車身呢。
測試當日 Duncan 遇到一點小意外，由於 Model X 尾部的擾流器(定風翼)在熄車時便會自動關上，因為這裡沒有任何感應器，Duncan 在泊車時一不小心在關上尾門時把手指放在定風翼的凹槽，兩隻手指被定風翼夾住，要待關上尾門後著車方能再次打開定風翼，印象十分深刻…….
Duncan: 家庭車隨時變身辣跑
Tesla Model X 對於各位未「飛」夠的車主嚟講肯定會係一款愛不釋手的玩具，因為佢既係一款 7 人車屋企人無得投訴，另外同時又比到 Model S 的瘋狂加速感，絕對一物二用！平時一家大細慢慢揸要舒服冇問題，得返自己一個想要快亦肯定可以滿足到你，Duncan 就認為 Model X 的駕駛樂趣比起 Model S 仲要高呢！去年在香港公佈的Model X 入門型號 60D 已被 75D 取代，而 Model X 75D 基本配置 / 5 座位版本售價約為 $70 萬起(至截稿前2017年2月21日市價，未連首次登記稅)，最頂級的 Model X P100D( 7 座位版本) 現時售價則約為 $132 萬(至截稿前2017年2月21日市價，未連首次登記稅)，售價比起中、高階的歐洲 7 人車還要高出不少，不過如果想享受速度感和 7 人車的實用性，再加上超低的電費 (自行在家使用三相 32A 充電費用約為 $110(官方提供參考資料)，比起動輒要入 $800 至 $1000 電油費經濟得多。
鷹翼門實測片段﹕
實測Model X泊位片段：
售價:
Model X 75D（基本配置 / 5 座位版本） 約 $70 萬 (至截稿前2017年2月21日市價，未連首次登記稅)
Model X P100D( 7 座位頂級版本) 約 132 萬(至截稿前2017年2月21日市價，未連首次登記稅)
於2017年3月31日當天或之前成功交付的車輛
查詢： Tesla (3974 0254)
分享到 :
最新影片
