東京築地市場話搬又唔搬，反而店家就紛紛係香港開分店，先前嘅 山貴水產市場 同 豊洲水産海鮮丼専門店 唔知大家食咗未，但最近又有一間築地場內人氣壽司店登陸海港城。以後唔使過海都可以食到新鮮又肥美嘅刺身同壽司，為食嘅依莉詩當然要第一時間去試食啦！
同灣仔兩間「港版築地」唔同，うまい鮨勘係築地市場內其中一間人氣壽司店，而非一家水產批發商，所以除了每日由日本築地直送海鮮外，更會提供世界各地嘅時令食材，價格上亦沒有那麼親民。
▲ 極上鮪魚丼($350)
鮪魚丼使用由長崎縣產嘅鮪魚製成。每天原條直送到店先解體，所以味道鮮甜。而丼中嘅大鮪魚腩、中鮪魚腩、赤身，連香葱鮪魚蓉也都係來自同一條鮪魚，感覺就好似將整條鮪魚都啖落肚。
▲ 特大香蔥鮪魚腩蓉壽司 ($50)
店內大部份壽司都係一啖一舊，為顧及「相機先食」嘅需要，うまい鮨推出了比一般壽司大三至四倍嘅特大香蔥鮪魚腩蓉壽司，鮪魚腩蓉好似小山丘般堆係軟硬適中嘅壽司飯上賣相相當吸睛。
▲ 特大三文魚親子壽司 ($50)
唔少港人都愛食花之戀，呢個特大三文魚親子壽司就可以滿足你！4片三文魚圍住大大粒魚籽，每粒魚籽都充滿鮮味，係口度爆完一粒又一粒！
▲ 超滿海膽手卷 ($80)
坊間一般手卷都係雪糕筒形，雖然好似好豐富，但食到中間好多數只係得飯同紫菜，而呢款外形就無咁靚仔，不過整條手卷都填滿加拿大海膽，鮮甜嘅奶油口感，食到最尾仍然好滿足。
▲ 新鮮築地壽司盛 ($488)
建議有選擇困難嘅朋友最好就食壽司盛。呢度壽司嘅價格偏高，單係鮪魚腩、海膽軍艦、三文魚籽軍艦，單點價錢已經差唔多 $200。
▲ 特色甲羅燒 ($188)
未必個個都想食刺身，甲羅燒就係唔錯嘅送酒小食，蟹膏嘅鮮咪混合蟹肉中，真係啖啖都係蟹味！
始終うまい鮨勘並非水產批發商，而且係海港城租金貴，所以普遍定價都比較高。至於食物款式方面同一般壽司鋪差不多，不過就夠新鮮。如果想食到築地嘅味道，又唔想過海，不仿試下吧！
相關影片:
うまい鮨勘
地址：海港城海運大廈地下OTG04
電話：2115 9956
