聖誕仲有幾日就到大家唔知諗好節目未呢？之前講咗咁多睇燈飾的好去處，今日我依莉詩就幫大家總結下 10個必去景點，同情人、家人、朋友一齊過番個暖笠笠聖誕啦！
講到浪漫嘅聖誕燈飾又點可以唔提沙田新城市廣場。今年星光花園再接再勵，以迷人燈飾吸引情侶同人像高手拍攝。當中的 300呎嘅璃光星河，水面泛著七色斑斕彩虹嘅光影變奏，非常浪漫。 只需於場內即日消費任何金額，戀人們就可以放下星願球許願，讓璃光星河印證一個又一個的幸福故事！而星河旁嘅「聲」光幻鏡屋由多角度玻璃鏡面組合而成，光影有如銀河星雲瞬息萬變。就算無女朋友，只要你有攝影技巧，帶個囡囡去影輯靚人像，一定冧啦！
日期： 2016年 11月29日 至 2017年 1月 15日
地點： 新城市廣場 1期 7樓星光花園
IQ 博士不經不覺間已經陪伴 35 個年頭，不過動畫中嘅無厘頭情段到依家都仍然帶俾人唔少歡樂。今個聖誕小雲、小吉同 IQ博士就去咗 The One 開生日 Party，台中央準備了一個印有「35」數字的生日蛋糕慶生辰。現場配合迷幻、閃爍燈光，大家都興奮得狂歡熱舞，把整個派對氣氛推到最高。而露天廣場特意設置了 3.5 米高巨型小雲於冰天雪地上奔馳，特定日子更有漫天飄雪特別效果,營造迷人雪景，使大家彷彿與小雲置身雪地之中，為煩囂的鬧市增添一份浪漫。
日期: 2016年 11 月 19 日至 2017 年 1 月 2 日
地點：The ONE 地下露天廣場、UG2、L2
LEGO 可以砌出大人小朋友嘅夢想，係聖誕節呢個俾人發夢嘅節日，樂高專業認證大師 Andy Hung 同佢嘅團隊就係朗豪坊砌出佢地心目中嘅白色聖誕。整個王國由 100萬粒 LEGO 砌成，係 LEGO 微景模型嘅 20倍大，而且有別於過往LEGO色彩繽紛的風格，顏色以白色及灰色為主，所以零件都相當罕見。而中間 10米高嘅城堡更加係全場焦點，白色配藍色嘅外牆，配以燈光就好似置身異地一樣。
日期： 2016年 11月 17日 至 2017年 1月 2日
地點： 朗豪坊4樓通天廣場
蛋黃哥出名 hea ，聖誕凍冰冰嘅日子就更加唔會郁。今次佢就去到銅鑼灣等大家找尋佢嘅蹤影，無論巨型金黃奶黃噴泉、薑餅屋 定 聖誕禮物車都隱藏住蛋黃哥。而東角亦有趣緻梳乎蛋鹿車同兩隻破蛋而出嘅聖誕版 GUDETAMA 係半空中大賣萌樣。除咗影相位，另外，仲有兩個互動小遊戲，玩完仲有機會免費得到蛋黃哥小禮物。蛋粉們仲可以去薑餅屋購買日本官方 GUDETAMA 精品，部份精品更係首次於香港率先發售。
日期：2016 年 11 月 6 日 至 2017年 1 月 2日
地點：皇室堡、東角
近年《變形金剛》系列電影瘋魔世界各地無數大人與小朋友，其實 1984年誕生嘅第一代變形金剛 G1，早於 80年代紅遍全球，成為最受歡迎的變形機械人玩具，幾乎每個男孩子都夢想擁有，可謂創造了一代經典。博派領袖柯柏文與狂派領袖麥加登係今個聖誕展開基地保衛戰。3個 3米高 3D 立體雕塑，完美展示出博派領袖柯柏文由貨櫃車變型成機械人嘅過程。另一邊廂，狂派領袖麥加登亦以機械人型態登場，隨時準備好與柯柏文一較高下。除了影相位，仲有 2個互動遊戲可以免費試玩。場內更集展覽、pop-up store於一身，讓大小朋友一同全情投入於變形金剛 G1世界之中。
日期：2016年 11月19日至 12月 27日
地點：東港城一樓展廊
全球期待的《俠盜一號：星球大戰外傳》將在12月15日上映，一班革命軍英雄要從帝國奪取死星（Death Star）藍圖，阻止黑暗勢力陰謀。「死星」外圍以 LED 燈組成，以黃、藍色的光影營造獨有燈效，特定日子更會以 4色幻彩燈匯演登場，隨著這套新電影主題曲及經典聖誕音樂節奏發放繽紛燈效。同場更展出 Chirrut Îmwe (由甄子丹飾演)和 Baze Malbus (由姜文飾演) 兩個1:1比例極像真電影造型雕像、兩組1:6比例電影場景及多款1:6 比例珍藏人偶，以及全新角色 Death Troopers (死亡特種兵) 的1:1 原大雕像。
日期：2016 年 11 月 19 日至 2017 年 1 月 1 日
地點：MOKO 新世紀廣場 MTR 樓層中庭
大家一直以為熊大同兔兔都係一對，點知原來 Kitty 同 熊大一路玩地下情。今個聖誕， Kitty 係 MCP新都城中心嘅盛大舞會中，成為咗 熊大 嘅舞伴，「熊貓戀」亦正式浮面。舞會中，佢哋嘅好友Dear Daniel、Cony、Mimmy、James、Fifi 、Leonard、Tiny Chum 和 Sally 亦以雍容華貴的造型現身。除了舞會現場讓大家可以無限selfie外，更有期間限定「華麗舞會賀卡收集點」製作獨一無二嘅電子聖誕卡及「華麗舞會互動照相館」，讓大家拍下開心一刻，留住美滿回憶。
日期：2016年 11月 14日 至 2017年 1月2日
地點：MCP新都城中心2期 L1天幕廣場
每逄聖誕，女神嘅數目就會忽然曝升，大家都會著得靚靚咁係商場佈置自拍同影女神相。今年華麗嘅城堡空降屯門市廣場，白雪公主（Snow White）、灰姑娘（Cinderella）、艾莉奧（Ariel）、睡公主（Aurora）、貝兒（Belle）及長髮公主樂佩（Rapunzal），齊齊於經典場景現身。中間 8米高聖誕樹，配以象徵每個公主故事嘅閃耀掛飾，分外搶眼。另外，大家可化身公主參與互動遊戲及係期間限定店選購各式公主精品。
日期：2016年 11月 14日至 2017年 1月 2日
地點：屯門市廣場一樓中央廣場
唔知大家 plan 好咗聖誕假去邊未呢？未都唔緊要，大口仔就將成個東京帶咗嚟荃灣。唔使搭飛機都可以到東京鐵塔、六本木燈海、新宿商店街等景點自拍。仿照六本木聖誕燈海，係兩排樹中穿過可以見到 4.5米高嘅迷你東京鐵塔。塔除了掛上大口仔笑臉，外牆更會亮燈，照耀全場，成為整個佈置嘅地標。再行前就係新宿商店街，街內有多個攤檔，大口仔同佢嘅朋友都忙於擺檔，可愛爆燈！
日期 ： 2016年 11月 18日至2017年 1月 8日
地點 ︰ 荃灣廣場1樓長廊
部長 Kumamon 搭飛機嚟咗鑽石山荷里活廣場預早同大家過聖誕。為咗增加港人親切互動，部長仲將中庭設計成熊本縣 5個特色景點，包括： 立體展示熊本縣 Kumamon 當地物產、人氣黑川溫泉、水前寺公園及神社鳥居、熊本縣市區列車、球磨川木橋，同大家齊齊 Selfie。另外，Kumamon精品店入面有數十件香港優先發售嘅 Kumamon精品。當中更係聖誕義賣活動，扣除成本、開支後，將撥捐贈給日本熊本縣政府支持振興發展用途，令 shopping 都更有意義。
日期： 即日起至 2017年1月2日 (中午12時至晚上9時)
地點： 鑽石山荷里活廣場一樓明星廣場
每年1881 Heritage 都係聖誕的打卡熱點，今年就以雪人為主題，帶大家過一個白色聖誕！廣場中央站立著高達15米嘅巨型雪人，大家更可走入雪人肚內中欣賞漫天飄雪特效，而指定日子巨型雪人手中嘅權杖將發放 20米高冷煙花，係冬日黑夜中欣賞，非常浪漫！
日期：2016年 11月10日 ‑ 2017年 1月8日
地點：1881 Heritage
無論小時候一家大細睇燈飾，長大後成班朋友一齊除夕倒數，或是同伴侶放閃打卡，聖誕嘅回憶入面唔多唔少都係尖沙咀發生。海運大廈已經有 50年歷史，亦可以話係香港商場佈置嘅先河。今年海運大廈露天廣場化身成「小雪翁」聖誕派對。雖然香港沒有白色聖誕，但大家都可以在海港城找到屬於自己嘅「小雪翁」，讓大家渡過既溫馨又開心嘅聖誕節！
日期：2016年 11月 11 日 至 2017年 1月 2日
地點：海港城海運大廈露天廣場
聖誕亦係一個關於「愛與分享」嘅節日，利園區今年以「Christmas Galleries at LEE GARDENS聖誕藝術村」為主題，邀請來自日本的川島小鳥（Kotori Kawashima）、蜷川實花（Mika Ninagawa）、來自英國的Rebecca Louise Law，與及來自韓國的Chang Hwan Kim，以自己擅長的創作媒介，帶來四組精彩嘅藝術裝置作品。透過觀賞藝術作品，每個人都可以將自己藝術潛能展現，發放愛與關懷嘅能量。Hysan Place 嘅小木屋「小確幸寫真館」更展示日本攝影藝術家川島小鳥擅長嘅人像攝影作品，洋溢著愛與溫情。
日期：即日起 至 2017年 1月 2日
地點：Hysan Place、利園一期地面、利園二期、利舞臺地下
雖然香港無白色聖誕，但一樣可以玩雪。白雪覆蓋著時代廣場嘅聖誕室內雪場，搖身一變成為白皚皚嘅聖誕雪樂園，大家可以盡情係雪中滚動，任意躺於綿綿雪地上感受柔細輕涼嘅雪感覺，仲可以玩雪地活動如掟雪球、溜滑小山坡、滑雪、砌雪人等，過一個難忘有趣嘅白色聖誕。
日期：2016年 11月 22日 至 2017年 1月 1日
地點：時代廣場 露天廣場
上年嘅「聖誕雪感玩樂園」深受大眾歡迎。今年【冰雪奇妙樂園】嘅規模及驚喜度倍增，打造四條各長23呎「Let’s Slide冰雪滑梯」，讓小朋友安坐水泡瀡滑梯，歡呼尖叫聲響遍全場！體驗冰雪快感外，小朋友亦可與友伴置身於場內鋪滿仿真雪嘅「Frozen冰雪場」堆雪人、起堡壘，在如真雪般柔細而輕涼的雪地上創造出屬於自己的作品，感覺特別滿足！另外，黃埔新天地「黃埔號」更打造成「聖誕樹湖之鏡」，係光影聖誕樹及繽紛叢林嘅襯托下，讓你拍下被照得閃閃發亮嘅「黃埔號」。而「時尚坊」則有由瑰麗水晶燈及閃石打造達 6米高嘅「仙鏡萬花筒」，你可把多元切割鏡面設計作拍攝背景，盡情「放閃」！
日期：2016年 12月 17日 至 2017年 1月 1日
地點：黃埔新天地時尚坊地庫
