今日港女同大家講個故事。港女間唔中都會出下去採訪，同啲公司傾下計咁。最近就同過一間做「提高網上廣告命中率」嘅公司創辦人 R 傾計，當日講講下，R 突然叫港女攞部電話出嚟，仲同港女講：「你真係好彩喇，用 iPhone。」
同一個做網上廣告 Targeting 嘅人傾計，少不免會分享下大家睇廣告嘅經驗：例如有咩廣告會吸引到你，點樣先令你停低睇廣告，睇完廣告會唔會去買產品等等。R 同港女分享咗個故仔，佢話自己當年去到美國想租車，估唔到自己睇睇下 YouTube 個陣，彈咗一個汽車公司嘅廣東話租車廣告出嚟，覺得好神奇。但港女聽完佢個經歷之後，第一個反應卻係：「唔係呀嘛，好恐怖喎。」
（唔恐怖咩？去到咁遠，竟然仲好似有人 check 住你咁，知道你要租車都算啦，仲要知道你講廣東話喎…）
R 因為受呢個廣告啟發，就開咗間做上廣告 Targeting 嘅公司喇。
（我諗就係呢個心態，決定咗點解而 R 開咗間公司賺緊錢，而港女就係港女囉…）
R 話，佢係靠收集大家手中各個智能裝置嘅數據嚟做呢壇生意。呢個時候，佢就叫港女攞部電話出嚟喇，仲話：「你真係好彩喇，用 iPhone！」
然後佢叫我開個 Settings 出嚟，睇下入面個 Privacy 係點 set。
▲ Setting ＞ Privacy ＞ 碌到最底嘅 Advertising ＞Limit Ad Tracking = Off
R 一句「多謝！」真係嚇到港女心都離一離！R 話，70％ iPhone/iPad 用家都唔知道 Setting 入面可以限制廣告追蹤，唔限制廣告追蹤嘅話，蘋果就會跟據裝置入面收集到嘅數據 feed 啲廣告畀你，佢亦可以將呢啲數據賣畀人，畀啲數據公司做分析，再派啲廣告畀你。
好似港女呢啲咁驚青嘅人，當然二話不說，即刻開著個「限制廣告追蹤」，等啲數據唔好流出啦。不過，R 同我講，一個半個數據係做唔到啲咩，得我一個 opt-out 都唔會有太大影響，因為分析係以一大班人嘅行為模式為準。如果我選擇 opt-out，睇到嘅廣告只會變得更加無意義。
「你算好㗎喇，有得揀，用 Android 係強制送出數據㗎！」
更新
好多謝讀者咁捧場，一直有睇港女的專欄，仲咁踴躍回應！
有唔少讀者留言講返畀港女知，如果你部 Android 機係用 Google Account（香港人個個都用㗎啦…），其實都可以 opt-out，「選擇不接收個人化廣告」㗎。
不過如果你部 Android 電話無 Google Account 就真係 mola mola… 如果大家日後仲發現到港女嘅專欄有咩問題或有任何意見，請繼續指教呀?
可能係港女有職業病，疑心重啦，我始終唔係幾信得過處理數據嘅人。同埋，港女咁窮，唔好再引我買嘢喇?
好在都叫做有得揀咋。你地呢？你地會點揀？
分享到 :
最新影片
