呢個聖誕請 3日假就可以放 10日咁多，相信唔少人已經計劃好出國去旅行。動物就話會托朋友照顧，但植物又無可能等佢自生自滅。今次我依莉詩就介紹個智能花盆俾大家，唔單止會自動淋水，仲會因應所監察嘅泥土養份、水份等資料調節灌溉，啱晒經常唔係屋企嘅朋友！
呢個 Parrot Pot 智能花盆睇落雖然似一個垃圾桶，不過內藏 4個感應器，可以實時評測影響植物健康生長嘅關鍵因素，包括土壤濕度、肥料濃度、環境溫度 及 光照強度，當分析到需要灌溉時，花盆會轉成紅色提示你，甚至按照大多數植物適用嘅中間數值來自行管理灌溉。
▲ App 內可以即時見到土壤濕度同花盆水槽中嘅剩餘水量，提醒你幾時需要加水。
▲ 盆內有水量感應器，監測花盆水槽中嘅剩餘水量。
▲ 肥料濃度、環境溫度及日照強度會以儀表形式顯示，同時中間會顯示植物品種建議嘅數值，令你清晰知道現實同理想嘅差距。
▲ 盆內藏有感應器，監測土壤濕度、肥料濃度及環境溫度。
得到數據，當然未夠。應用程式提供 8,000 種植物嘅資料，每種植物都配有資料簡介，包括相片、來源、基本需求、實用意見和建議等，只要設定好所種嘅植物品種，並將花盆透過藍芽連接手機，應用程式仲會發送意見，提你植物嘅需要，更會根據植物需求自動調整澆水。
▲ 花盆會根據植物需求自動調整澆水，就算唔係屋企都唔怕無人打理了。
花盆可以自動淋水係因為植物下有個 2.4L 嘅儲水位，所以高度有 298 mm，比一般花盆高。如果要出門一個月，只要校省水模式，就會自動調節給水量，確保長達一個月嘅供水所需。
▲ 花盆使用 ABS 樹脂及抗紫外線保護塗層，容易保養。
▲ 4 顆 AA 電池可以使用 1年左右， App 亦會顯示電池狀態，提你換電。
▲ 同一般花盆一樣，有兩個出水位。
▲ 花盆主要有 3層，分隔盆栽同儲水位。
種植物最怕就係唔記得淋水，對於種薄荷葉同仙人掌都會種死嘅我，呢個花盆真係好有用。不但有數據了解植物狀況，仲有該品種嘅所需提示，最重要係會自動淋水。呢盆聖誕花一定可以健健康康過到聖誕嘅！
相關影片:
Parrot Pot
售價：$1,188
查詢：Parrot
