一向採取高階定位嘅相機貴族品牌 Leica，真係少啲錢都未必玩得起，但幾個月前竟然宣佈推出即影即有相機 Leica Sofort，而且並沒有開天價，引起唔少攝影愛好者注意。最近呢部神機終於抵港，就等我依莉詩幫大家掀開面紗，睇下夠唔夠「奶味」啦！
紅點加持「奶味」濃
Leica Sofort 由 Leica 自家設計，同樣採取簡約風格，四四方方，同 Fuji Instax Mini 90 頗為相似。不過機身用上平面嘅膠料製成，而且顏色上採用了橙色、白色同大熱嘅 Tiffany blue，多了一份時尚，但略嫌少了一份古典味。幸好四邊包了黑色仿皮，加強手感之餘，隱約滲出 Leica 感覺。如果細心留意，其實機身都更咗唔少細節，增加「奶味」。當中最明顯就係前方嘅紅點 Logo ，而顯示屏就用上 Leica 專屬字形，背後嘅「DESIGNED BY LEICA CAMERA GERMANY」字句亦加咗唔少分呢！
▲ Leica Sofort 包裝簡約，隨送相機帶同充電器。
▲ 單單前方嘅紅點 Logo 已經令相機散發貴氣。
▲ 機背簡單一句 「DESIGNED BY LEICA CAMERA GERMANY」就已經加唔少分。
▲ 仿皮包邊，加強手感之餘，隱約滲出 Leica 感覺。
轉 Mode 簡單有顯示
Leica Sofort 外型同規格其實與 Fuji Instax Mini 90 十分接近，Auto-Kektor 1：12, 7/60mm 鏡頭，配以 0.34x 的光學取景，而快門範圍則為 1/8s 至 1/400s，同樣支援 Fuji Instax mini 相紙，而且電池相同。不同的是， Leica Sofort 鏡頭外圈用作轉換焦距，一扭可以轉換成標準 (60cm-3cm) 同無限遠對焦，而微距則需要轉換拍攝模式。另外，更可以按需要選擇多個拍攝模式 (全自動、自拍、人物合照、運動、微距、多重曝光及 B 快門)，選擇是否開閃光燈 及 增加曝光補償。以上嘅設定同相紙剩餘數目都會係顯示屏清楚顯示，操作簡單易用。
▲ Leica Sofort 支援 Fuji Instax mini 相紙，可以輕易係市面買到。
▲ 選用嘅電池同 Fuji Instax Mini 90 一樣，而非 AAA 或 AA電。
▲ 顯示屏會顯示剩餘底片數目、拍攝模式、閃光燈設定、倒數計時 以及 曝光補償，只要按下按鈕就可以轉換，非常簡單。
▲ 扭動鏡頭外圈可以轉換焦距成標準 (60cm-3cm) 或無限遠對焦，而微距則需要轉換拍攝模式。
▲ Leica Sofort 唔使自己轉換鏡頭或觀景器，只要轉換拍攝模式，觀景器亦會自動轉換，但觀景器睇到的同實際拍攝範圍仍有一點距離，近攝時就特別明顯。
▲ 唔似 Lomography 嘅即影即有相機，Leica Sofort 沒有無限次多重曝光，按下兩次快門就會自動出相，所以創作空間比較有限制。
▲ Leica Sofort 有 B快門功能，長按快門就可以拍攝車軌等特別效果。
機輕自拍夠就手
即影即有相機唔多唔少都會用嚟自拍， Leica Sofort 前方嘅自拍鏡比較平，而且呈長方形，可以清晰看到自己，而且真係做到睇到塊鏡喺咩，影出嚟就喺咩，減少咗好多自拍失敗嘅機率。而且機身唔算很大，無論直向橫向自拍都可以單手按下快門，非常就手。
▲ 同其他即影即有開閃光燈自拍好多時都會出現面部過曝，Leica Sofort 嘅過曝情況都不算太嚴重。
▲ 機底嘅接駁孔可以連接腳架及神棍，咁就可以隨時自拍。
邊緣細緻測光準確
要背上 Leica 呢個品牌，相片質素當然亦要番咁上下。雖然即影即有質素無可能媲美菲林相片，但以即影即有來說，顏色同對比度處理得唔錯，人像背景亦相當銳利，質素比較比較 Instax mini 70 或是 Lomo’Instant Automat 更高更清晰。而且 Leica Sofort 嘅全自動功能亦相當準確，就算唔識光圈、快門都可以影到靚相。
▲ 無論背光或是昏暗嘅環境，拍出嚟嘅影像都相當細緻。
▲ 同富士即影即有相機相似的是，Leica Sofort 擁有自動測光等功能，基本上單純按下快門就可以拍到清晰影像。
依莉詩：「唔係品牌效應，畫面一樣高質」
有「紅點」加持當然重要，不過 Leica Sofort 嘅相片一樣高質。以即影即有來說，顏色同對比度處理得唔錯，人像背景亦相當銳利，而且全自動功能亦相當準確，就算唔識光圈、快門都可以影到靚相。最重要係定價唔算太驚人，都只係貴 Fuji Instax Mini 90 $800左右。如果一直希望成擁有 Leica 相機朋友，不妨從呢一部開始啊！
Leica Sofort
相關影片:
售價：$2480
銷售點：只限 LOG-ON 時代廣場分店
分享到 :
最新影片
