今年聖誕有 4日長假，各位姊妹 plan 好去邊旅行未呢？平日每朝要做空氣感瀏海同髮尾內捲都已經要左夾右夾，去旅行要保持同一個髮型真係一啲都唔容易。我依莉詩最近就發現到呢套 VS Pink Series 造型夾，粉紅襯色非常夢幻，而且細細隻好可愛，帶去旅行就夠晒方便！
為咗更快幫頭髮造型，好多時都會用啲陶瓷板比較大嘅造型夾，一下可以夾更多髮量，不過體積太大，帶去旅行就唔太方便。而呢套造型夾有兩隻，分別係用嚟夾直嘅13mm 陶瓷纖巧直髮器 同 用嚟夾彎 嘅 25mm陶瓷捲髮器，細小輕巧，放係背囊手袋都得。粉白配色亦散發陣陣少女感覺，相當可愛。此外，兩者同時備有環球電壓 (100-240VAC)，帶去世界各地都用得。
▲ 閃爍的銀色禮物盒包裝用嚟做聖誕禮物都好啱 feel。
▲ 盒內更附送實用隔熱墊，方便擺放預熱後嘅造型夾。
呢隻迷你版直髮夾嘅陶瓷板雖然只有 13mm，每次夾嘅髮量都唔多，不過都有 200℃，而且快熱設計，開啟後 10秒就夠熱可以造型。亦因為直髮夾體積輕巧，所以拎上手更易控制，無論拉直或捲髮尾都相當簡單，一下就得。不過因為熱力都幾強，直髮夾表面都幾熱，一個唔小心就會燙到呢！
▲ 預熱非常快速，開啟 10秒左右就夠熱造型。
▲ 雖然只有 13mm，每次夾嘅髮量都唔多，不過控制得更靈活。
▲ 除咗拉直，髮尾內捲同空氣瀏海都仲得到。
▲ 但因為夾嘅表面弧度比較細，夾出嚟嘅髮尾會比較唔自然。
至於捲髮器機身長度亦只有 16cm，相當迷你，因此每次夾髮量亦唔多，但電線可以 360度轉動，唔怕纏線，十分就手。捲髮棒直徑為 25mm，弧度比韓式大波浪細，會造出更豐盈細緻嘅波浪。因為採用陶瓷塗層，熱力平均分散至約 150℃ ，就算彎曲頭髮亦不會有太大毛燥感。
▲ 捲髮棒嘅小夾可以夾住頭髮單手操作，不過因為欠缺保護，如果唔小心碰到陶瓷塗層就有機會燙到。
▲ 電線可以 360度轉動，唔怕纏線。
▲ 開始 10秒左右就夠熱造型，好適合出街前分秒必爭嘅姊妹。
▲ 數碼港女見咁得意都嘗試夾彎頭髮。
▲ 用捲髮器夾髮尾始終比較自然。
▲ 細細支，就算反手夾後頸嘅頭髮都唔會太攰。
造型夾未必係大嘅好，呢兩支細細支收納方便，同時備有環球電壓 (100-240VAC)，帶去世界各地都用得。雖然每一下夾嘅髮量唔多，需要耐啲時間先完成整個頭，但亦因為比較輕巧更容易控制，減少出錯。重點係唔使 3百蚊就有兩支，CP值好高呢！
售價：$299
查詢：CONAIR 美康雅 (2751 4604)
