LINE FRIENDS 時不時都係朗豪坊搞 Pop-up Store，但遲遲都未有實體店令粉絲等到頸都長！今日終於有好消息啦！新嘅專門店開係前 G2000 個位，仲有大大隻 CHOCO 坐鎮添！就等我依莉詩帶大家睇下呢間專門店有咩特別啦！
如果係忠粉，大家睇到門口嘅佈置一定會覺得熟口熟面。無錯！呢度嘅公仔大部份都係來自朗豪坊 9月時嘅商場佈置。不過點都好，轉咗地方都係有另一番風味，如果上一次嚟唔切影，依家就一定要嚟打卡啦！大大隻 3米高巨型 CHOCO 係門口坐鎮，右邊就係浪漫粉紫色佈置嘅 CHOCO HOUSE ，左邊就有 CHOCO 緋聞男友 PANGYO 同 LEONARD 係睇鋪，出面更有熊大坐定定等你自拍，而最搞笑就係 JAMES 係度練習「壁咚」呢！
▲ 熊大坐定定等你自拍。
▲ JAMES 一定係睇得愛回家多，係度練習緊「壁咚」。
▲ CHOCO HOUSE 以粉色做主調超級夢幻。
▲ CHOCO緋聞男友 PANGYO 係到默默等緊 CHOCO。
▲ LEONARD 似乎笑得好開心。
專門店賣嘅精品同希慎店其實差唔多，不過就有幾款朗豪坊獨家發售嘅 CHOCO 精品，睇嚟會引來一大班 LINE Fans 搶購。
▲ 6款限定 CHOCO 公仔 ($620) 以唔同風格嘅造型示人，搖滾、運動、英倫等，你又鍾意邊款呢？
▲ 冬天就到，係時候換個暖笠笠電腦套了。
▲ 聖誕禮物送夜燈都唔錯波！
▲ 手機套都有好多選擇。
為慶祝新店開幕， 11月 18 至 20嘅一連 3日都會有慶祝活動，熊大同兔兔會不定時現身俾大家抱抱之外，每日更限售 100個福袋，每個 $300 嘅福袋入面都有價值 $500-$1000 嘅精品，相信係聖誕禮物嘅好選擇！
▲ 有緣的話，可能同到 CHOCO 抱抱添啊！
▲ 福袋入面點都會係 LINE 精品，所以點都唔會浪費吧！
可能佈置係用番上次展覽嘅公仔，所以新鮮感唔會好大，不過換咗位，作為粉絲點都要去一次！仲有新店開張嘅限定福袋好吸引， $300 福袋就可以買到 $500-$1000 嘅精品，入面點都會係 LINE 精品，所以點都唔會浪費，加上就快聖誕節，唔使為交換禮物而頭痛啦！
相關影片:
LINE FRIENDS 專門店
地址：旺角朗豪坊 3樓 301-302號鋪
