講咗差唔多 3年，Marvel 英雄粉絲期待以久嘅鐵甲奇俠 Iron Man 遊樂設施終於有消息。今日香港迪士尼宣佈，「鐵甲奇俠飛行之旅」將會係 2017年1月11日正式啟用。係遊樂設施啟動之前，Marvel 英雄嘅精品同美食已經陸續登陸明日世界，就等我依莉詩率先帶大家睇下啦！
小型體感遊戲化身 Iron Man
雖然大型遊樂設施未有得玩，不過係明日世界入面嘅「史達科技旗艦店」有一個小型互動體感遊戲俾大家透過模擬效果穿上盔甲，成為 Iron Man 係香街道親身撃退邪惡勢力。「鐵甲奇俠模擬裝甲」遊戲玩法好簡單，只要跟住指示做出相應動作就可以穿上盔甲，並出招擊退敵人！5分鐘嘅體驗唔算刺激，不過用嚟做熱身都唔錯！
▲ 電腦會一邊錄底玩完嘅過程，你可以購返自己化身成「鐵甲奇俠」嘅照片組圖同一段約35秒嘅遊戲體驗短片。如果係遊客可能會捨得買嘅。
精品陸續登陸明日世界
既然「史達科技旗艦店」已經開業，除咗小遊戲，當然有 Marvel 英雄嘅精品賣啦！超過 70款香港迪士尼獨家嘅 Iron Man 精品以及超過 250款 Marvel 主題已經登陸。當中包括：Figure、玩具、發光鎖匙扣、紀念品與服裝配件，更有部分服飾以香港景色及「史達科技展」為主題。無論大粉絲定小粉絲都隨時荷包大出血呢！
▲ 明日世界嘅「史達科技旗艦店」已經開業，入面完全係大小男孩嘅世界。
▲ Figure、玩具、發光鎖匙扣、紀念品同服裝配件都有，只要夠彈藥，放到全屋都係 Iron Man 完全無難度。
▲ Figure 除咗 Iron Man 仲有雷神等 Marvel 英雄。
▲ 部分服飾更以香港景色及「史達科技展」為主題，夠晒特別。
▲ 小朋友都有自己嘅 Iron Man 套裝架！
▲ 買個立體匙扣掛係書包，就無人唔知你係粉絲啦！
▲ 唔少外國朋友都鍾意儲迪士尼襟章。呢度就有香港獨有嘅 Marvel 英雄襟章。
主題食品 食 Iron Man 落肚
有精品又點少得美食，樂園同兩間主題酒店嘅餐廳亦會推出超過 25款「鐵甲奇俠」主題美食，包括：超級英雄窩夫餅、「鐵甲奇俠」紀念杯、米奇廚師餐廳的多款「鐵甲奇俠」甜品及酒店內的英雄特飲等。玩完買完，梗係要食埋落肚啦！
▲ 火箭餐廳嘅漢堡由黑武士變咗 Iron Man 呢！
▲ 小鎮大街嘅 pancake 都變咗 Iron Man 嘅嘜頭呢！
▲ 酒店都由有多款 Iron Man 嘅造型甜品，超級有型！
與 Iron Man 飛越香港上空
講返明年 1月先有得玩嘅遊樂設施，「鐵甲奇俠飛行之旅」加入香港元素，大家坐上 45座嘅巨型飛行車，透過飛行模擬器、立體影像、環迴立體聲及各種特效，可以穿梭仿似西九龍及香港鬧市，置身係 Marvel 英雄與 Hydra 嘅正邪對決。聽落已經夠晒刺激！
▲ 登上「鐵甲號」飛行車，就可以近距離欣賞由「弦反應能源器」推動 嘅香港史達大樓，同「鐵甲奇俠」穿梭仿似西九龍及香港鬧市，並飛越多個香港特色景點，例如：青馬大橋、維多利亞港及本地的連綿山脈等。
史達科技展
另外，科技天才東尼史達決定於香港設立「史達工業」亞洲總部，將「史達工業」最新、最強的創建呈獻賓客眼前。「史達科技展」設有多個大型展廳，包括：「歷程展廳」、「防禦展廳」、「能源展廳」及「動能展廳」。大家可率先探索「史達工業」最創新的科技發明，包括：「弦反應能源器」、「鐵甲奇俠」MARK I和 MARK III戰甲 及 MARK V手提箱，粉絲們一定要睇啦！
▲ 科技天才東尼史達決定於香港設立「史達工業」亞洲總部，聽到都興奮。
▲ 連雷神個鎚都有呢！
▲ Iron Man 仲會隨時出現係明日世界同大家合照呢！
地點：香港迪士尼樂園
相關影片:
分享到 :
最新影片
