港女接觸科技嘢都有好一段日子，淨係呢個小小專欄都已經寫咗兩年，而家的確有返啲 sense，唔再係好似當初咁迷迷糊糊。全因為日日夜夜都睇住呢啲資訊，唔識又有好多人可以請教咋！唔知係咪成日都諗住呢啲嘢，港女對於科技應用嘅敏感度高咗，就連一啲唔係咁需要呢方面觀察嘅 moment，我都自動開著感應，朋友話我有初期「職業病」徵狀呀！
事源係咁嘅，對上一個周末，港女同朋友去咗睇一齣圍繞酒吧入面發生嘅事嘅舞台劇。齣劇入面有大量科技元素，例如男女朋友之間的 Whatsapp 對話；比喻唔成熟嘅愛情就好似換電話咁，兩三年轉一次；仲揶揄經常換畫嘅愛情就好似計時炸彈 LOVE 7 咁。
對於智能電話、Apps、社交網站呢啲港女經常討論嘅話題，竟然喺一齣文青味極濃嘅舞台劇入面頻頻出現，港女完全係覺得「開正我嗰瓣」！咁當然，佢成個表演嘅訊息、表達手法等所有嘢結合都做得好好，先令港女係咁「讚好」啦！
完 show 之後，少不免會同朋友討論劇情，港女興高采烈咁講「你頭先有冇 get 到佢咁咁咁攞個電話/App/社交網站嚟做比喻呀？」嘅時候，朋友竟然話，我無留意到喎（但佢有留意到其他內容），跟住就話我係咪返工返到傻咗，睇舞台劇都掛住留意呢啲科技元素。
OMG！
港女真係唔係特登留意㗎，亦都唔係為咗寫呢篇文而故意去做呢方面嘅觀察，真係十分自然咁，就吸收咗呢啲資訊… 死喇！咁樣係咪會埋下咗成為「老海鮮」嘅種子㗎？Oh no…
唔怕靜雞雞話埋畀你地知，其實最近煲劇，我啲職業病又發作。港女嘅女神－結衣 BB 嗰套《逃跑可恥卻有用》入面，男主角津崎平匡（星野源飾）咪做 Programmer 嘅（以下有少少劇透）第一集入面就講佢因為啲麻煩客臨時要人改嘢， 要 OT 好多日趕工揼 Code，跟住好打得嘅津崎病咗。
其中有一幕，鏡頭影住個揼 Code screen，港女問朋友，佢揼緊咩 Code，朋友笑三聲同我講，唔識 programming 真係好，識咗就知個 screen 就好似 TBB 啲劇用 C Drive 上網咁，哈哈。然後，竟然仲真係有台灣媒體報道引述日本 Twitter 上都有人講呢個穿崩鏡頭！
其實有呢個職業病港女係覺得幾好，起碼足以證明我呢幾年有努力過，同埋其實個嚴重程度暫時仲可以接受嘅…好似係。不過，都係時候擴闊下眼界，睇多啲唔同領域嘅嘢喇。