自從 Facebook 有直播之後，唔少女神都愛上用手機拍片。但派軍糧嘅同時，拍到手震震咁，啲兵未見娘娘已經暈晒大浪啦！最近我依莉詩就搵到支娘娘專用嘅 Hello Kitty 手機拍攝穩定器，賣萌之餘又實用，各位兵仔識做啦！
對女仔嚟講，科技產品真係一件起兩件止，特別係手持雲台呢啲咁機械嘅產品，未開嘅時間搖嚟搖又驚整斷，開著咗又會唔受控制突然墜機，連我出去採訪都好怕用。不過見到呢支 HelloKitty 版手機拍攝穩定器感覺就好多了。雖然本人對 Hello Kitty 無太大好感，不過呢支造型都幾精細，無老翻嘅感覺，手機擺放位置以 HelloKitty 頭設計，而平衡組件設計得好似玩具相機。開著嘅時候就好似 HelloKitty 用相機影緊相，都幾得意。而每個關節位都有一定厚度，睇落似玩具，無平時啲雲台咁機械，少女們應該無咁抗拒。
▲ 包裝盒以粉紅配白色設計，一睇就知係少女專用。
▲ 每個關節位都有一定厚度，睇落似玩具，無平時啲雲台咁機械，少女們應該無咁抗拒。
▲ 手機擺放位置以 HelloKitty 頭設計，而平衡組件設計得好似玩具相機。用嘅時候就好似 Hello Kitty 用相機影緊相，都幾得意。
▲ 平衡組件背面貼了玩具相機背面的圖案，設計十分有心思。
▲ 另一個平衡組件則貼有 Hello Kitty 貼紙。
既然外型係主打，功能當然無 DJI 等大牌子咁強。呢支只有 2軸防震，所以運動幅度太大的話拍攝都未必清晰。不過都可以前、後、左、右旋轉操作，45度角自拍或是平行前拍都無難度。整支雲台約重 272g，單手拎都唔算太重，可以靈活擺動，不過要放入手袋都幾大舊，未必個個都願意帶多樣嘢出街。
▲ 俯仰軸可以由 -45 到 +225 度，而水平軸係 +/- 45 度，45度角自拍或是平行前拍都無難度。
▲ 放手機嘅位置用強力彈簧夾住，似乎有喲化學，不過 iPhone 6s Plus 同 Samsung Note5 都勉強用到。
▲ 手柄按鈕可以調整拍攝角度，前、後、左、右旋轉操作都得。
雖然我對 HelloKitty 無咩好感，不過呢支 HelloKitty 版手機拍攝穩定器總算令我克服對手持雲台嘅恐懼，似玩具嘅外型感覺更易用。當然啦，主打外型嘅產品，功能上無 DJI 等大牌子咁強，只有 2軸防震，運動幅度太大的話拍攝都係會矇，工作上就未必夠用。不過以入門級嚟講已經唔錯了！
SwiftCam Hello Kitty特別版
售價：$998
查詢：Winner Concept International Ltd. (24071118)
相關影片:
