影相除了要留住回憶，最想日後睇返都猶如置身當時嘅環境一樣啦！而 360相機就可以完完全全做到呢點，不過近年推出嘅 LG 360 Cam、Samsung Gear 360 等等，對 iPhone 用家嚟講都未必啱用，而今次我依莉詩就借咗部 iPhone 專用嘅 360 相機返嚟玩， 可以邊拍邊睇效果，好方便架！
新 iPad 發佈活動今晚舉行 預料時間僅 35 分鐘 首款 Apple 可摺疊屏幕產品 未來 2 年有望推出 Tim Cook：中國是全球競爭最激烈市場 但仍看好 AI 能回復消費者信心
講明係 iPhone 專用，呢部 Insta 360 Nano 由包裝到機身都採用 Apple 嘅簡約風格設計。白色嘅包裝盒中間印有產品嘅相，同 iPhone 嘅包裝盒似到十足十，而用色更加跟足 iPhone ，有黑、灰、銀、金 同 玫瑰金 5種顏色選擇，襯埋 iPhone 一齊用都唔會有任何違和感。不過咪以為樣樣參考就唔使花心思，包裝盒其實係副類似 CardBoard 嘅 VR 眼鏡，放 iPhone 入去就可以睇返用 Insta 360 Nano 所影嘅相或片，立即置身拍攝現場，個盒即時變得好實用呢！至於，Insta 360 Nano 機身輕巧，只有大約 70g ，外型同 Ricoh Theta S 一樣呈長方形，兩側用上圓邊設計，簡約時尚，而且手感圓滑，不過機殼以塑膠製造，用得耐好易刮花。
▲ 白色嘅包裝盒中間印有產品嘅相，同 iPhone 嘅包裝盒似到十足十。
▲ 除 360相機外，包內仲有 USB 充電線同收納袋。
▲ 包裝盒本身係一副 VR 眼鏡，只要插入 iPhone 就可以睇返用 Insta 360 Nano 所影嘅相或片。
▲ Insta360 Nano 接駁 iPhone 嘅位置貼合 iPhone 6 系列嘅圓弧邊框，則面睇已經一體化。
▲ 因為用色跟足 iPhone ，插上 iPhone 6S 唔會有任何違和感。
▲ 機底有一個 microSD 記憶卡槽，插入後可以拍攝 10秒以上的 360影片，而 microUSB 則用作充電。
Insta360 Nano 雖然唔似其他 360 相機以藍牙或 Wi-Fi 連接手機，而係用 Lightning 直接插入手機，不過靈活性並無因而減低，同樣可以單手使用。只要喺手機安裝專用 App ，再插入 Insta360 Nano 就可以立即拍攝，同時仲可以睇到前後鏡畫面，比起無線接收嘅 360相機更流暢同穩定，唔會有起格同延誤呢！
▲ 不過 iPhone 6S 嘅 Lightning 插孔係機底，所以插入 Insta360 Nano 後就需要倒轉使用。幸好專用 App 嘅介面同樣係 上下顛倒，唔係一定會好怪。
▲ 除了插入 iPhone 使用，其實 Insta360 Nano 可以獨立使用，只要長按按鍵開機，再按一下就可以影相，按兩下就開始拍片，同時鏡頭旁嘅燈會轉成藍色或綠色，操作簡單。
談到拍攝質素， Insta360 Nano 採用了兩個 210 度超廣角 F2.0 嘅魚眼鏡，可以 360 度 x 360 度拍攝出解像度高達 3,040 x 1,520 嘅全景相片及影片，畫質尚算清晰，沒有太大雜訊，而且拍攝後會自動合併 360度全景相片或影片，拼接效果非常好，幾乎無接痕同光差問題。拍攝後嘅相或片都可以即時儲存到手機相簿，比起無線連接嘅 360相機更快，仲可以直接上傳到 Facebook 及 YouTube 作 360 度相片或影片播放。如果想更特別，仲可以係 App 加入濾鏡同美顏效果，甚至加入水印。由拍攝、剪接、加工同上載都一 App 搞掂，非常方便呢！
▲ 拍攝後嘅相或片可以直接上傳到 Facebook 及 YouTube 作 360 度相片或影片播放。
▲ 仲可以係 App 加入濾鏡同美顏效果，甚至加入水印。
▲ 拍攝嘅影像不但會自動合併成 360度全景相片或影片，仲可以係手機中揀不同嘅模或觀看，而我最鍾意小星球模式，好似變咗大頭狗呢！
▲ Insta360 Nano 所拍攝嘅相片都算清晰。
Insta360 Nano 相對輕巧，成像質素亦唔錯。雖然唔似其他 360 相機可以無線連接手機，不過靈活性並無因而減低，同樣可以單手使用，而且觀看所拍攝嘅畫面更加流暢同穩定，唔會有起格同延誤呢！ 呢個價格比大部份 360 相機都平，我覺得幾抵玩。(可惜我無 iPhone)
Insta360 Nano
售價：$1,699
查詢：Vast World (3520 3538)
新 iPad 發佈活動今晚舉行 預料時間僅 35 分鐘 首款 Apple 可摺疊屏幕產品 未來 2 年有望推出 Tim Cook：中國是全球競爭最激烈市場 但仍看好 AI 能回復消費者信心
