iPhone 變身 360 全景相機！依莉詩試玩 Insta 360 Nano

2016-10-13

Published by

依莉詩

影相除了要留住回憶，最想日後睇返都猶如置身當時嘅環境一樣啦！而 360相機就可以完完全全做到呢點，不過近年推出嘅 LG 360 Cam、Samsung Gear 360 等等，對 iPhone 用家嚟講都未必啱用，而今次我依莉詩就借咗部 iPhone 專用嘅 360 相機返嚟玩，可以邊拍邊睇效果，好方便架！

簡約設計與 iPhone 一體化

講明係 iPhone 專用，呢部 Insta 360 Nano 由包裝到機身都採用 Apple 嘅簡約風格設計。白色嘅包裝盒中間印有產品嘅相，同 iPhone 嘅包裝盒似到十足十，而用色更加跟足 iPhone ，有黑、灰、銀、金同玫瑰金 5種顏色選擇，襯埋 iPhone 一齊用都唔會有任何違和感。不過咪以為樣樣參考就唔使花心思，包裝盒其實係副類似 CardBoard 嘅 VR 眼鏡，放 iPhone 入去就可以睇返用 Insta 360 Nano 所影嘅相或片，立即置身拍攝現場，個盒即時變得好實用呢！至於，Insta 360 Nano 機身輕巧，只有大約 70g ，外型同 Ricoh Theta S 一樣呈長方形，兩側用上圓邊設計，簡約時尚，而且手感圓滑，不過機殼以塑膠製造，用得耐好易刮花。

▲ 白色嘅包裝盒中間印有產品嘅相，同 iPhone 嘅包裝盒似到十足十。

▲ 除 360相機外，包內仲有 USB 充電線同收納袋。

▲ 包裝盒本身係一副 VR 眼鏡，只要插入 iPhone 就可以睇返用 Insta 360 Nano 所影嘅相或片。

▲ Insta 360 Nano 呈長方形，兩側用上圓邊設計，簡約時尚，而且手感圓滑，不過機殼以塑膠製造，用得耐好易刮花。

▲ Insta360 Nano 接駁 iPhone 嘅位置貼合 iPhone 6 系列嘅圓弧邊框，則面睇已經一體化。

▲ 因為用色跟足 iPhone ，插上 iPhone 6S 唔會有任何違和感。

▲ 機底有一個 microSD 記憶卡槽，插入後可以拍攝 10秒以上的 360影片，而 microUSB 則用作充電。

一插即用即睇效果

Insta360 Nano 雖然唔似其他 360 相機以藍牙或 Wi-Fi 連接手機，而係用 Lightning 直接插入手機，不過靈活性並無因而減低，同樣可以單手使用。只要喺手機安裝專用 App ，再插入 Insta360 Nano 就可以立即拍攝，同時仲可以睇到前後鏡畫面，比起無線接收嘅 360相機更流暢同穩定，唔會有起格同延誤呢！

▲ 不過 iPhone 6S 嘅 Lightning 插孔係機底，所以插入 Insta360 Nano 後就需要倒轉使用。幸好專用 App 嘅介面同樣係上下顛倒，唔係一定會好怪。

▲ 除了插入 iPhone 使用，其實 Insta360 Nano 可以獨立使用，只要長按按鍵開機，再按一下就可以影相，按兩下就開始拍片，同時鏡頭旁嘅燈會轉成藍色或綠色，操作簡單。

自動合成即時上傳

談到拍攝質素， Insta360 Nano 採用了兩個 210 度超廣角 F2.0 嘅魚眼鏡，可以 360 度 x 360 度拍攝出解像度高達 3,040 x 1,520 嘅全景相片及影片，畫質尚算清晰，沒有太大雜訊，而且拍攝後會自動合併 360度全景相片或影片，拼接效果非常好，幾乎無接痕同光差問題。拍攝後嘅相或片都可以即時儲存到手機相簿，比起無線連接嘅 360相機更快，仲可以直接上傳到 Facebook 及 YouTube 作 360 度相片或影片播放。如果想更特別，仲可以係 App 加入濾鏡同美顏效果，甚至加入水印。由拍攝、剪接、加工同上載都一 App 搞掂，非常方便呢！

▲ 拍攝後嘅相或片可以直接上傳到 Facebook 及 YouTube 作 360 度相片或影片播放。

▲ 仲可以係 App 加入濾鏡同美顏效果，甚至加入水印。

▲ 拍攝嘅影像不但會自動合併成 360度全景相片或影片，仲可以係手機中揀不同嘅模或觀看，而我最鍾意小星球模式，好似變咗大頭狗呢！

▲ Insta360 Nano 所拍攝嘅相片都算清晰。