坐完人都高啲！依莉詩試坐 INADA稻田按摩椅

低頭族經常對住手機、電腦，頸背酸疼經常出現，如果屋企有張按摩椅放工之後日日鬆一鬆你話幾好呢？上星期 INADA 稻田體驗中心開幕，我依莉詩就第一時間去試坐按摩椅瞓個晏覺啦！

左右獨立加壓按摩

相信唔少人都好似我咁，平時拎手袋或者做運動都習慣一邊身發力，所以其中一邊身特別繃緊，而今次試坐嘅第一張按摩椅叫 W Engine，外觀上同其他按摩椅差唔多，都係大大份，軟淋淋，未算太時尚，但特別在雙引擎設計，「8軸智慧按摩滾輪系統」令左右兩側滾輪可單獨運作，可以針對上半身嘅左右疲勞程度分別加壓按摩。按嘅時候唔怕一邊身太大力、一邊身唔夠力了，按完之後身體兩邊感覺更加平衡，肩頭鬆晒！而下半身使用「循環式深層按摩系統」，六個旋轉指壓球按壓施力，按摩腳底穴位，下下到肉。

▲ W Engine 按摩椅體積都幾大，有 86cm x 140cm x 108cm，外觀上同其他按摩椅差唔多未算太時尚。

▲ 上半身左右兩側滾輪可單獨運作，方便分開調校適合自己嘅力度。

▲ 前臂可以放係兩邊，氣袋會輕柔地握住消除手臂繃緊，加上「手部溫熱器」令手部溫暖，達到全身放鬆作用。

▲ 下半身使用「循環式深層按摩系統」，六個旋轉指壓球按壓施力，按摩腳底穴位，下下到肉。

▲ 遙控器可以放喺椅旁嘅遙控器存放袋，不過遙控器嘅線唔係自動回捲，收納有啲麻煩。

重整曲線，告別駝背

除咗左右兩邊身用力唔同，低頭族經常都有駝背問題，而 Medical chair 3S 按摩椅就利用 32個氣囊，達到從頭到腳的全身包裹式按摩，以拉直身體，恢復背部 S型曲線。初初按嘅時候頸同背都會有少少痛，按摩椅會不斷攤開同摺埋身體，讓橫膈膜得以伸展及鍛鍊腹部核心肌群，不過慢慢習慣之後呼吸會暢順咗，成身好似啱啱拉完筋鬆晒。頸、背直咗，人都高啲！

▲  Medical chair 3S  體積為 83cm x 128cm x 106cm，同 W Engine 差唔多大。

▲ 肩頭位置有兩個枕頭，俾你兩手舉高拉筋。

▲ 按摩椅會不斷攤開同摺埋身體，讓橫膈膜得以伸展及鍛鍊腹部核心肌群。 ▲ 「按摩穴位」偵測系統會自動找出身體穴位，並進行指壓，腳板底嘅感覺就特別明顯，好似俾人一下一下篤咁。

依莉詩：「按完即刻高咗！」

雖然今次試坐嘅兩張按摩椅外型都唔太討好，而且相當大舊，對於我呢 D 住屋邨嘅窮等人家根本無可以放咁大張喺廳。不過 Medical chair 3S 伸展式嘅按摩方法相當特別，拉完筋真係成身鬆晒，頸、背直咗，人都高啲啦！