足球永遠都係男人嘅浪漫，由6歲去到80歲都一樣可以做球迷，每個人總有自己鐘意嘅球隊或者球星，所以先至可以長玩長有。年度足球遊戲大作 FIFA17 今日終於正式登場，相信玩開嘅朋友都總會問「除左資料 update 咗之外仲有咩唔同?」今集 開發商 EA Sport 除了轉用了新嘅遊戲 Engine 外，連操作系統都加入咗唔少新元素，改動可算是近年比較大的一次，究竟今集有咩新野又好唔好玩? 就等 Duncan 同大家慢慢分享下!
全新一集 FIFA17 轉用咗唔少大作例如: Battlefront、Star Wars、Dragon Age 採用嘅 FROSTBITE 引擎開發，廠方有呢個決定唔駛諗都一定會令畫質再上一層(總無理由換個差D 嘅 Engine 掛?)，廠方指出新 Engine可以展現出更多的人物細節例如動作、表情、反應、球迷、球場的場景、動態及氣氛等等，而且在 The Journey新模式入面，更加會出現好多全新嘅場景例如: 領隊辦公室、球隊私人飛機、更衣室、訓練場、賽後受記者採訪等等不同的新元素，肯定可以為各位 FIFA 迷帶來新鮮感！ 畫面表現，好老實遊戲中的球員太細好難睇得清楚面貌，不過單憑球員的外形和動態就可以認到星級球員例如美斯、C 朗、費明尼等等，而在近鏡 Closeup時，就可以清楚睇到 detail 好似樣貌、汗水、紋身、髮型等。好老實，唔係個球場咁大唔係近鏡好難睇清楚球員個樣，而 Duncan 就覺得畫質已經收貨 !而且連以往個個一樣樣嘅電腦球員亦有更顯注改善啦!
▲ 大家又覺得遊戲畫面有幾似真人呢?
相信只要有留意 FIFA 新聞嘅朋友都一定知道今集 FIFA17 最大的賣點就係加入咗 The Journey 故事模式，玩法就好似 NBA 2K17咁，玩家可以控制一位叫做 Alex Hunter的小球員，由剛剛加盟職業球隊，努力練習、爭取上陣機會，再要面對表現不佳而被球隊外借、在低組別聯賽力爭表現，及後再被原有球隊收回己用，到帶領球隊捧盃等等，單是故事背景已經十分吸引，而 Duncan 更加喜歡每個不同的過場故事，例如: 體驗到第一個聯賽入球嘅興奮、訓練時狀態不佳被教練省幾句又或者被下放到連後備都冇份嘅 reserve B 隊，而主角和領隊、隊友、家人、朋友之間的互動亦都十分真實，絕對有讓你一嘗成為職業球員面對種種困難和機會的挑戰。
遊戲一開始玩家就要主射改變命運的 12 碼，場中觀察的球探馬上就會把你帶到職業隊中，玩家可以按個人喜好加入英超的不同球隊，不過首先講明，若果閣下想為曼聯的摩連奴、利勿浦的高普效力，就一定要忍受在大球會打後補，或者得極少上陣機會的情況，因為總不能叫伊巴比個正選你打吧~ 而且教練對你打正選和後補的表現評分亦會有較高要求，想玩得輕鬆一點，最好就好似 Duncan 咁樣，一開始就揀一 D 中小型球會效能，以便獲得多D嘅上陣時間，用最短嘅時間升呢吧!
玩家經常需要回答記者、隊友、朋友、領隊的問題，而答覆一般可分3種，Cool、balanced、Fiery，Cool答覆最得領隊歡心，而 Fiery則可以得到最多球迷支持，以便獲得更多遊戲內的社交圈 fans 關注，更易得到贊助商垂青!
▲ 只要可以在比賽中完成領隊對你的任務，便可以由後備升呢成為正選球員，而且亦會對你未來的發展更有幫助呢!
除左大家最留意 FIFA 17 畫面有冇靚左之外，相信最重要就係隻 game 係成個系統同埋操作上面有咩改進，而今集遊戲 EA Sport 就公佈咗新 game 的 4 大全新操作功能，包括: Set Piece Rewrite、Physical Play Overhaul、Active Intelligence System同埋 New Attacking Techniques，以下就逐一為大家慢慢介紹!
顧名思義，Set Piece Rewrite 就是有關定點球的新系統，當中包裝、罰球、角球、界外球、12 碼通通都唔同咗，以前 FIFA 開死球的時間完全要靠經驗黎估落點，隊友或者自己想接應基金上十分困難，而 FIFA17 這個新的 Set Piece Rewrite 系統，簡單黎講就係大家會係開死球時發現地上會多了一個小黃圈，玩家可以利用左邊搖杆來控制死球的落點，以後就唔駛再斷估個波飛去邊度了…. 而當選定好小黃圈的落點後，玩家只要操控場上其他隊友到落點附近的位置接應，進攻的機會就會大大提升! 此舉除左可以增加入球率之外，如果是玩 online 合作或者 Pro club的時候，你隊友就唔駛再估個波會飛去邊，大家一睇就知道啦~
▲ 玩家在處理死球時可以利用左杆去控制小黃圈的罰球落點，方便自己友去附近接應，玩 pro club或者 online coop就更易和隊友夾波了。
▲ 要練好罰球就要靠training啦，就好似 duncan咁，總有強迫症要全部的 set piece 訓練都想攞到 excellent 先收工~~
另一方面，在開罰球、12碼嘅時候，走跑的角度和距離都一早由電腦定好，彈性欠奉，而在 FIFA17 入面，玩家可以隨便咁在開死球時走來走去，需要多一點助跑距離? 要由斜一點切入射罰球? 通通都可以由你控制，Duncan 覺得雖然對於間中玩一場半場的朋友可能只是一個 gimmick，不過若果係 Die hard fans 的話，就可以配合自己的 Be a Pro 球員的特性好好訓練，要做到百步穿陽應該都不是問題呢~~
雖然上一兩集 FIFA 已經加入不少攞身位的動作，而 Duncan 早就已經覺得都算做得好好，不過 FIFA 17 全新的 Physical Play Overhaul 實在令人 WOW 一聲，原因就是個 game 入面既技術同埋動作更似現場，試想想以往傳波同前鋒腳下，最好就只可以扭兩扭、扣兩下，打 One-Two、或者回傅衝上來的隊友起腳。新的 Physical Play Overhaul 加入了據稱已申請美國專利的 PushBack 技術，令場上球員的動作真嘅一樣! 任何控球球員都可以透過 LT 鍵來揹位護波(官方名稱叫: 360 degree Shielding)，前鋒可以把防守球員在 360 度方向揹係背脊護波再慢慢選擇傳、射、過人，靈活性狂升! 玩家不單只可以做更多的選擇，亦可以為後上球員賺到更多時間，而中場球員則可以好似沙維、派路咁更加輕鬆掌握中場的節奏，這個新功能絕對是 Duncan 覺得進步最大的地方。
如果你有好似伊巴咁樣嘅前鋒，新加入嘅揹位功能絕對好玩又好用，閒閒地可以一個揹住2個轉埋身又或者分波同樣可以令進攻變得更多樣化~~
不過有好亦有壞，Physical Play Overhaul 這貢新功能連電腦亦都可以發揮到淋漓盡致，duncan 試過比 WORLD CLASS嘅電腦揹住揹到比對手轉埋身去埋都搶唔到對方的波，可以預期若果玩家喜歡網上同人挑機的話，技術方面的掌握將會大大影響勝負，要 FIFA17 玩得叻，一定一定一定(重要的講 3次)要學識 LT 鍵點用黎護波……
今集 FIFA 嘅操作升級可以算係近年較大改變的一次，除咗上面提及嘅揹位護球之外，仲加入咗唔少的新射門、傳球同埋 hold ball 轉向等等，對於真正認識足球的玩家黎講一定會覺得「好正! 好實用!」。新系統加入咗好似 Driven Finish、Downward Header，呢兩樣都係以(XBOX B+B 按鍵來完成)，前者就係硬性規定射割草式嘅地波，而後者就是頂彈地波嘅頭槌，兩者的攻擊路數都會令龍門更難撲救，Duncan 就認為呢 2個新射門方法相當好用了 ！而除咗射門之外，傳球亦有新攪作，FIFA17新增咗叫做 Threaded Through Pass 的超毒直線(RB + Y) ，話就話係直線，其實就係專放地波去防守球員嘅「盲眼位」比自己入攝嘅隊友，呢招比起原有的 Y 鍵放直線毒得多!!不過大家又唔需要擔心呢招變得太屈機，因為若果閣下傳球數值太低往往會被防守球員成功截斷，如玩家的攻擊球員身位較弱，即使你比防守球員跑得快，但亦會因為切入的時間差而被拉扯減速甚至是被食身位波都冇埋，所以話新系統對於發燒玩家絕對讚不絕口，但是對於一般玩嚟講就比較難拿捏了~
▲ 而家連扔界外球都可以 fake 對手，duncan 就覺得呢個新功能好實用啦~
雖然每一代 FIFA 都話 A.I 有改善，不過到玩嘅時候總會發現身邊總有幾個低左幾個 level 嘅電腦，令你玩到想扔手制! 而今集 EA Sport 加入咗 Active Intelligence System，簡單黎講就係攻擊同防守嘅時候，隊友會視乎你的位置而喺無球跑動嘅情況下自動走位幫波，走得空嘅時候就可以令你更加容易將個波傳出去，另一方面亦可以將防守球員拉開，比多啲空間你! 而係防守嘅時候電腦球員亦會判斷得更加準確，避免走甩人又或者在夾擊時撞埋一齊，等玩家有更多的空間發揮。
▲ FIFA17繼續提供女子世界盃的國家隊選擇~
▲ 喜歡日本 J-聯賽的朋友肯定會另眼相看，J-League 終於不是 PES 的專利了。
▲ FIFA17 加入了大量全新的慶祝及射門 style，好多都既特別又過癮！
Duncan 對於全新的 The Journey 實在玩到停唔到手，雖然比賽場場一樣，但係就總是好想知道主角 Alex Hunter 將會有咩事發生，幾時又無啦啦比人外借，玩起上黎代入感都幾強，以足球 game 黎講真係好難得。FIFA17 的畫面嚴格黎講已經冇咩大破綻，遊戲的流暢度好高，球員數值十分合理，而且最重要FIFA攞到世界上大部份國家隊同埋球會既授權，玩家唔駛捱假名! 而在全新的操作系統方面，Physical Play Overhaul 應該是更新入面最重要的環節，識得用就係好好用，可以將對手玩到謝皮，估計網上對戰會因為忍唔住腳而多咗好多紅牌出現….. 另一方面，Threaded Through Pass 傳出的威脅比以往的簡單 through pass 大得多，因為可以配合時間差同埋盲眼位去進攻，除左攻擊更加多變化亦都好好睇，Duncan 真係有D擔心FIFA18 仲可以有咩改進呢~
網上見到好多遊戲既BUG，不過係 XBOX ONE 上面就未見過，小編留意到問題係，球證間中會誤判球權，執法尺度亦有點不一，明明從後鏟只係得黃牌，平時紅硬(你可以話個別球證執法仲真咗~)，而電腦猜波同揹位太過屈機，玩 World Class 都已經好辛苦，而且對手的防守緊逼壓力明顯比前作強得多，玩家要決定傳、射、帶波都冇太多時間思考，反應一定要夠快!