不少美女應該都同港女一樣，電話入面安裝咗好多「美圖獸獸」Apps。呢啲美圖 Apps 用途十分廣泛，除咗簡單執相、調色，仲可以整容、移形換影等（笑），等大家自拍完一張相可以後製到靚一靚先出街。港女以為而家呢方面嘅 Apps 咁勁，好有可能會取代到港女 MK 年代成日去玩嘅「貼紙相機」，因為功能都係差唔多啫，貼紙相機仲差樣嘢添呀，都無 soft copy！於是早幾日捉咗娜姐去返以前成日玩貼紙相的地方視察下，竟然畀我發現有 2016 最新款的貼紙相機！
第一眼見到係好震驚嘅，因為無諗過啲貼紙相機會咁 update，同埋無諗過香港跟得咁貼，港女仲以為佢已經係「夕陽工業」… 一時好奇之下，港女就同娜姐順便去試玩，睇下而家啲貼紙相機有咩功能啦（其實係港女自己貪玩 XD）。
基本上個過程都係無變嘅，首先畀錢 –> 揀背景 –> 入去影相 –> 出黎後製 –> 印相。
港女最欣賞佢入去影相嗰度嘅貼心位，大家有玩過嘅人都知，影相個過程其實好快好趕，佢倒數 3、2、1，就影咗，如果唔係真正嘅港女係唔會黎得切轉 pose 架，跟住就會影到好多 fail 晒嘅醜態。新機嘅好處係，佢有 Model 喺個 Mon 度教你擺幾個 pose，你可以即刻跟住佢擺，只要你手腳協調，就一定會靚。
但個精粹從來都唔喺影相嗰度，梗係後製功能先係重點。呢部新機標榜自己有「長腿叔叔」功能，可以整長你個身同你對腳。其他嗰啲瘦面、美白、大眼功能已經十分基本，而由於本身個美肌功能太強勁，其實都唔係幾需要自己另外做其他調整，如果你想即時染髮、染眼珠，都得。
但作為一個 ex-MK，整容唔係真係咁重要，放日期、公仔、心心、寫字、畫公仔先係貼紙相必不可少的地方。港女就嫌部機太少靚靚 stickers，太多整容工具喇！同埋港女可能已經慣咗用 Touch Mon，唔明白點解一定要用筆做後製，支筆又粗，好唔方便，明明好多電腦都做到多點觸控?
今次港女貪玩，同娜姐回顧下當年 MK 年代的小玩意。講真，港女唔明點解貼紙相機仲可以生存到，因為我覺得電話美圖 Apps 的效果好過貼紙相機好多，仲要係免費㗎喎。貼紙相機要畀錢，仲要唔係平，中學生去玩都嫌貴啦，一大班人又玩唔到長腿效果，嘥咗個功能。唯一嘅「好處」就係佢可以即時印到張相出黎，有實物，但又無得好方便咁 share 出去，post 上社交網絡。有冇人答到我貼紙相機價值喺邊度…？
分享到 :
最新影片
