中秋節快樂呀咁多位！大家今日係咪可以早少少放工，返去屋企人做節食兼玩月餅食燈籠呢（誤）？由細到大，中秋都係一個港女非常期待的節日，因為可以攞正牌「玩火」！
細細個嘅時候，就會點一兩支蠟燭燒下燈籠（笑），唔係我特登燒，唔知係細個揸得個燈籠唔好，定係支蠟燭插得唔好，玩玩下總係會成個燈籠燒著咗… 後來大個少少，就開始約埋啲朋友出去玩燒蠟燭，其實真係好無聊，就係攞個月餅罐出黎，點著晒啲蠟燭，同朋友鬥燒得耐、砌下圖型、將啲蠟整埋一大舊變大蠟燭等等，咁就玩到一晚（港女係從來都冇煲過蠟，唔使問?）。
後來唔知係咩原故，食環署大力打擊玩蠟燭，真係好嚴，咩一個罐唔可以點著超過 5 支蠟燭，唔係過黎吹熄你?。當然佢個出發點係好，怕有危險，又怕你煲蠟整親，但真係有啲小學雞囉。同時，亦因為呢個安全問題，唔少家長就唔畀仔女玩蠟燭，取而代之的就係「萬惡的螢光棒」。
「萬惡的螢光棒」之所以萬惡，係因為佢由製作到用完到丟棄整個過程，都係極不環保。塑膠管的分解需時以百年計，內含的化學液體又對人體有害，又會造成污染。重點係壽命極短，最多玩三日就唔會再光，又冇其他用途。到要扔的時候，因為管內有碎玻璃，如要回收，要先用大量清水清洗，不合符環保原則。咁仲唔係萬惡？
實不相瞞，港女少不更事，細個都有玩過幾年「萬惡的螢光棒」… 嗰時好似好高科技咁架嘛，又話可以砌立體圖型、戴喺手咁，仲要識發光喎！但認真，真係冇火咁好玩?，螢光棒係不能代替蠟燭的，我以後都唔會再玩螢光棒㗎喇！好彩嘅係，後來大個咗，中秋節變成一個聚腳的節日，燈籠定蠟燭定螢光棒都不再重要，最重要係身邊的屋企人及一班朋友。
可惜吖，今晚港女應該又要 OT，聽聞今晚有半影月蝕睇，怕且今晚港女都係與月無緣㗎喇，同同事喺公司寫稿啦，大家今晚玩得開心啲呀下！