唔經唔覺又萬聖節啦！經歷上年多間嚇破膽的鬼屋之後，我依莉詩已經咩都唔怕，夥拍水哥組成「萬聖節敢死隊」再次出發，深入海洋公園為大家報告情況！
8間鬼屋 10個體驗
今年哈囉喂大部份都俾公司包咗場，就只有 17日開放俾公眾，真係撞鬼都要擇日。同上年一樣今年有 8間鬼屋，其中一間更會分日夜兩種玩法。另外，仲有 10個表演分佈係園內不同角落。如果買普通飛，我諗好彩嘅應該可以玩到 3、4間鬼屋嘅，所以依家就快 D 揀定排邊幾間啦！
1)【16禁】大玩血淋淋
每年哈囉喂都有一間用數字命名，更是全場最恐怖的鬼屋。不過今年的【16禁】再唔係一個人單獨入去，更唔係瞓棺材咁簡單，反而大玩 SM 。欣賞完妖豔華麗的真人騷後，便會正式展開血淋淋的噩夢，走進一間接一間的陰森密室，利用一幕幕血腥心寒的恐怖場面挑戰人類底線。亦因為【16禁】，所以 16歲或以上及能接受極度驚嚇人士先入得去，睇嚟驚嚇程度唔講得笑。
位置：高峰樂園動感天地
開放時間：下午 1 時 – 晚上 11 時
▲ 一開始主持就叫我地睇表演，一個個奇人輪住出場。
▲ 浴簾背後有人沖涼，非常誘人。
▲ 每間房都有人被 SM，睇到毛骨悚然。
▲除咗人，仲有公仔，重口味到未必人人受得起。
依莉詩點評
雖然 16禁係今次主打的鬼屋，不過入到去絕對唔恐怖，亦唔血腥，感覺就好似去咁咗泰國睇人妖表演一樣。雖然入場前每人都有一個面具，不過望住表演者被打、被電，就係難以投入，甚至感得太重口味，未必人人受得起。
驚嚇度 ★★☆☆☆
必玩指數 ★☆☆☆☆
相關文章:
受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
2)【照妖宮殿】AR 技術打開天眼
自從 Pokemon Go 之後，AR 擴增實境技術應該無人唔識，而係呢個華麗堂皇的宮殿裹，大家可以透過手機 APP，打開「攝靈天眼」，呼喚一眾妖精現身。唔知係咪可以用精靈球捕捉佢地呢？
位置：海濱樂園廣場
開放時間：上午 11時 —下午 5時 30分
▲ 蛇精都好索架！
▲ 日間的鐵扇公主好美艷呢！
▲ 對準記號會有妖精走出嚟啊！
依莉詩點評
香港人鐘意自拍，上年海洋公園都加左 Lolita 鬼屋日間俾人自拍，今件年都唔例外，不過就轉咗中式妖精做主角，沒有了華麗的佈置，多了一番神秘感，加埋個捉妖 AR App ，真實同虛擬的妖精共處一室，包保每張自拍都獨一無二。
驚嚇度 ★★☆☆☆
必玩指數 ★★★★☆
3)【血祭宮殿】百妖盡出
夜幕低垂，華麗宮殿隨即變成恐怖鬼域。牛魔王、蛇妖、蜘蛛精等各路妖魔鬼怪從黑暗中甦醒，向人類施以凶猛突襲，捉拿活人煉成長生不老的養顏補品。想出去的話，唯一出路就是越過猛鬼橋和凶靈祭壇，逃出妖氣衝天的煉獄。
位置：海濱樂園廣場
開放時間：下午5時30分 — 晚上11時
▲ 閰羅王都出埋，問你驚唔驚？
▲ 中式打扮的將軍特別恐怖。
依莉詩點評
妖精的洞穴充滿神秘感，就算 Android 機開唔到天眼，只睇真人妖精都足夠燒不少菲林，不過環境比較黑，想影靚相最好帶番支 LED燈了。
驚嚇度 ★★★★☆
必玩指數 ★★★★☆
▲ 去完 HUAWEI 嘅【血祭宮殿】記得去埋華為大劇院之「鬼火咁靚」後台啊！只要用 HUAWEI P9 同一眾靚鬼影相，再將作品上載去 Facebook 就可以獲贈精美禮品，最「鬼火咁靚」同最鬼有創意嘅三張相仲有機會得到 HUAWEI P9一部添！
▲ 入到後台仲可以揀自己鍾意嘅紋身貼紙添係面度，今次仲唔係「鬼火咁靚」？
4)【古惑糖果村】
萬聖節唔一定係驚嚇，同上年一樣。南瓜精靈精心打造了一條古惑糖果村，等小朋友可以挑戰搗蛋小遊戲，帶著繽紛糖果滿載而歸，盡情開懷大笑。
位置：海濱樂園自然大揭秘
開放時間：上午11時 — 晚上11時
依莉詩點評
全日祭之後，哈囉喂多咗好多歡樂元素，唔單止唔驚嚇，仲好岩小朋友玩，同妖怪玩完小遊戲就有糖果收，總算有個位可以抖下氣。
驚嚇度 ★☆☆☆☆
必玩指數 ★★★☆☆
相關文章:
受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
5)【捉鬼敢死隊Live!】一展槍法
依家乜都興懷舊，就連鬼片都要番炒。呢間鬼屋就以八十年代經典電影《捉鬼敢死隊》做主題，而且仲有兩種體驗。首先要到捉鬼敢死隊學堂學習捉鬼槍的用法，等你一展槍法，一嚐捉鬼的樂趣，大人細路都啱玩。之後穿過鬧鬼大宅、凶靈地下鐵、紐約時代廣場等一個個經典場景，親身體驗電影經典對白「遇到衰鬼，急Call捉鬼敢死隊最有計！」不過大家要留意，兩個部份不但分開玩，仲要分開排隊，要玩晒兩 part 記得預番時間啦！
位置：高峰樂園動感天地
開放時間：上午 11 時 – 晚上 11 時
▲ 生還者失驚無神出現，比鬼更嚇人呢！
▲ 又一個無啦啦彈出的生還者，演技好好呢！
▲ 唔知呢位 OL 被咩嚇親呢？
▲ D 鬼口水好核突啊！
▲ 鬼屋入面無棉花糖鬼有少少失望。
依莉詩點評
用槍玩的鬼屋已經唔係第一次搞，但今次捉鬼敢死隊學堂明顯係俾小朋友玩，用雷射槍射牆邊的紙板，有 D 似迪迪尼的巴斯光年，刺激感大減。而且見唔到棉花糖鬼有少少失望呢！幸好另一邊的電影經典場景鬼屋場景相當逼真，一個個生還者出現營造恐懼氣氛，令你想快快逃離災難現場。
驚嚇度 ★★★☆☆
必玩指數 ★★★★☆
水哥點評
捉鬼敢死隊做主題嘅鬼屋無咁恐佈，以往玩過有啲鬼屋嘅鬼係會追住你一排，但係捉鬼敢死隊就無呢個情況，而且出現驚嚇場面亦無咁密，可以同一啲比較細膽嘅朋友一齊玩！
驚嚇度 ★★★★☆
必玩指數 ★★★☆☆
6) 【屍立中學】鬼影幢幢
讀過書的人都應該聽過 3樓女廁有鬼的故事，聽就聽得多，就好似無人真係見過。不過呢間位處山上的陰森荒廢校園，就一定有啦！走過鬼影幢幢的走廊，直搗校園墓地，你就會搵到驚慄故事背後的謎團。
位置：高峰樂園極速之旅旁
開放時間：下午1時 — 晚上11時
▲ 校園內無論學生定校工都好似撞邪一樣。
依莉詩點評
呢間係今次 3間鬼屋入面最恐怖的一間，每一個學生都好似撞邪一樣，有突然 D 自殺，亦有 D 被謀殺。由走廊、課室到校園墓地，一個場景比一個場景恐怖，由學生變成怨靈係身邊出現。如果唔係傳媒可以開 LED 燈，我真係唔敢向前行。
驚嚇度 ★★★★★
必玩指數 ★★★★★
水哥點評
如果一定要玩一間最刺激嘅，我覺得一定要玩屍立中學呢間鬼屋，鬼嘅數量密集好多，而且好多通道都好窄，唔可以並排過，有時我要行先都驚驚地！
驚嚇度 ★★★★☆
必玩指數 ★★★☆☆
7)【心慌血色吧】危機處處
係殭屍王唐禹哲的豪宅內每日都會舉辦盛大的狂野派對，但係狂野派對中，原來危機處處。據說唔少人會係忘我舞蹈之際，走進豪宅的秘密暗室，被嗜血成性的恐怖殭屍捉到後就再無出過嚟。
位置：高峰樂園登山纜車廣場
開放時間：下午1時 — 晚上11時
▲ 一開始大家都係度飲酒享樂，超瘋狂呢！
▲ 不過呢個 3D 唐禹哲好似有 D …
依莉詩點評
參加派對前大家都要先同殭屍王唐禹哲立約，方法有些少驚喜，縮手都縮唔切。之後進入酒吧，氣氛就好似一個迷幻派對，無數個假公仔忘我舞蹈，亦真亦假。當你覺得一 D 都唔恐怖反而搞笑的時候，原來已經不知不覺發現忘我背後的危機，廁所同後行入面的竟然係一隻隻吸血殭屍，睇嚟頭腦要時刻保持清晰先得。
驚嚇度 ★★★☆☆
必玩指數 ★★★☆☆
水哥點評
咁多間鬼屋我相信氣氛最輕鬆就係呢一間了，入面似入左酒吧。仲有少少人隱藏咗係度出奇不意地嚇你，整體嚟講，唔算太恐佈。
驚嚇度 ★★☆☆☆
必玩指數 ★★★☆☆
8) 猛鬼巷 — 陰陽路及屍家路
入黑後，嘩鬼由鬼屋走出戶外，彌漫公園的每個角落。當中兩條以中西惡靈為主題的猛鬼巷充滿陰氣，隨時撲出送上「驚嚇」！
位置：海濱樂園及高峰樂園
開放時間：下午5時30分 — 晚上11時
依莉詩點評
其實哈囉喂 D 鬼都係會四圍走，所以加咗呢兩條路純粹集中咗而已。
驚嚇度 ★★☆☆☆
必玩指數 ★★☆☆☆
相關文章:
受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
總結
今年海洋公園哈囉喂確實有點令人失望，雖然同上年一樣有十種設施體諒，不過驚嚇程度大大減低。除了屍立中學同捉鬼敢死隊稱得上係鬼屋，其他都沒有太多驚喜，大部份走家庭路線。更甚的是，每年最有睇頭的鬼屋，16禁 轉玩 SM ，非常重口味，好似睇 sex 表演咁，但就難以投入。 以往買普通門票就已經可以入晒鬼屋入面所以房，不過今年就係【16禁】、【屍立中學】、【心慌血色吧】及【血祭宮殿】留咗 4個秘密暗室俾優越門票持有人玩。如果想玩埋就要俾多 D 錢啦！如果要感受哈囉喂氣氛，我反而推薦今年樂富鬼屋，雖然係小辣，但最少係免費。
海洋公園哈囉喂全日祭2016
日期：2016年10月2、7-10、14- 16、20-23、27- 31日
開放時間：早上10時至晚上11 時
票價：成人 $ 385 ；小童（3 至11 歲）$193
哈囉喂優越門票：成人 $730 ；小童（3 至11 歲）$365
相關文章:
受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
分享到 :
最新影片
