等咗咁耐，iPhone 7 同埋 iPhone 7 Plus 終於會在呢個星期五正式開賣！有些 wire 民相信之前都已經透過 AOS 或者 iReserve 訂了愛機了吧？訂唔到？其實仲可以透過網絡商出機，好彩仲有機會在第一日拿到機添！但邊間最抵？邊個 plan 最啱自己用？如果劏機又邊個台最划算？而家就等 Edward 教大家最精明嘅上台出機方案啦！
一表看盡各台 iPhone 7 / 7 Plus 計劃
預繳幾多？幾多通話時間？每月有幾多數據用量？有咩增值服務？一表看盡！（但可能會看到你頭暈）
iPhone 7 <按此>
iPhone 7 Plus <按此>
「淨月費」是初步關鍵位
如果大家選擇上台買機個時單睇月費多少，但無留意每個 plan 有幾多預繳機價多少又有幾多回贈，甚至要局簽幾多錢增值服務，真係有機會中伏。所以要比較真正邊個台上台買機最抵，最簡單就係扣除 iPhone 7 / 7 Plus 本身機價同埋各台回贈，得出的「淨月費」，用呢個去比較先係最公平，因為好多所謂激平的月費都會「見光死」，初步有了大約每月花費後，再考慮其他服務如 Air Time、訊息、增值服務 … 等是否能滿足你所需。
淨月費計法 :
24 個月總和的 [ ( 月費+行政費+VAS) – 回贈 (如有) ] – 官方淨機價 = 扣除官方淨機價後合約期總支出
扣除官方淨機價後合約期總支出 / 24 個月 = 淨月費
淨月費各台比併
今年的 iPhone 月費計劃，基本上所有網絡商均設有低、中、高合共 3 至 4 種用量計劃，低用量有 1GB 及 / 或 2.5GB 兩種選擇，而中用量就有 6GB 選擇，大部分台亦設有 10GB 高數據用量月費計劃。以下就讓筆者逐項為大家分析吧。
1GB 月用量可以做啲咩？
- 足夠大家每月上載 110 張相片（以每張 1MB 計算）
- 瀏覽 24 小時的網頁
- 欣賞 6 小時串流音樂
- 3 小時 256kbps 質素影片
- 640 段即時訊息（例如：WhatsApp）。
2.5GB / 3GB 月用量可以做啲咩？
- 足夠大家每月上載 275 張相片（以每張 1MB 計算）
- 瀏覽 60 小時的網頁
- 欣賞 15 小時串流音樂
- 7.5 小時 256kbps 質素影片
- 1,600 段即時訊息（例如：WhatsApp）。
低用量 1 GB 及 2.5 GB：中國聯通香港 + 中國移動香港最抵、3 香港其次
適合用家 :
只玩 Facebook、WhatsApp、LINE 等社交平台及少睇網頁、YouTube 的用家使用。
iPhone 7 1GB / 2.5GB or 3GB 計劃分析
今年多了中國聯通香港競爭，去年最抵的中國移動香港優勢雖然相比其他台來講仍然保留，但單以價錢來講始終平不過「新丁」，基本上在低用量來講，每個容量的 iPhone 7，而且無論是 1GB 或者 2.5GB / 3GB 數據月費計劃，中國聯通香港都有每月淨月費約 $10 的優勢，如果大家只是想「劏機」的話，中國聯通香港似乎是不錯的選擇。但如果真的要用的話，中國移動香港畢竟在香港經營了一大段時間的 4G 服務，而且收費亦不是貴中國聯通香港太多，加上如果是中低等用量來講，中國移動香港的月費包含 3GB 用量，而中國聯通香港就與其他台一樣，只有 2.5GB，所以每月多 500MB 數據用，而又只係貴 $10，都算合理。所以如加上用量來講，尤其是在 2.5GB / 3GB 數據量上，中國聯通香港及中國移動香港兩個台可說是「雙冠軍」。至於其他網絡商，依抵玩程度排行，1GB 用量來講分別是 3HK、SmarTone、csl 及 1o1o；而 2.5GB / 3GB 用量來講排名次序就是 3HK、csl、SmarTone 及 1o1o。
iPhone 7 Plus 1GB / 2.5 GB or 3GB 計劃分析
至於 iPhone 7 Plus，情況亦與 iPhone 7 一樣：單純以月費計算的話，「新丁」中國聯通香港肯定是大贏家，但從比較可見，中國聯通香港與排行第二的中國移動香港差距比在 iPhone 7 時拉大了少許，尤其是最大容量的 256GB 版本，每月淨月費差距更接近 $20，所以如果大家想「劏機」的話，中國聯通香港明顯是首選。至於除這兩個台以外的網絡商的抵玩排名，1GB 月費計劃排名先後分別是 3HK、csl / SmarTone（csl 在 32GB 及 256GB 容量會較抵，而 SmarTone 就在 128GB 容量上較平）及 1o1o；而 2.5GB / 3GB 月費計劃排名先後則是 csl、3HK、SmarTone 及 1o1o，不過要留意的是 256GB 版本的話，3HK 的淨月費會比 csl 抵玩的。
低用量計劃用家注意事項
如果你選用低用量計劃，筆者建議大家盡量使用 Wi-Fi 預先下載音樂、影片等，又或者係 Wi-Fi 環境下先好下載或更新軟件或遊戲，當欣賞或遊玩時亦盡量避免浪費數據用量（例如：少玩 online 遊戲或者串流聽歌睇片）。如果真的要欣賞串流內容，或者下載軟件、甚至想透過 Remote Desktop 軟件操控遠端電腦，也建議用 Wi-Fi 連線上網時先好咁做，唔係就好容易爆 plan 了。
6GB 月用量可以做啲咩？
- 足夠大家每月上載 660 張相片（以每張 1MB 計算）
- 瀏覽 144 小時的網頁
- 欣賞 36 小時串流音樂
- 18 小時 256kbps 質素影片
- 3,840 段即時訊息（例如：WhatsApp）。
中用量 6GB ：中國聯通香港制霸！
適合用家 :
這種計劃十分適合較常使用數據網絡的用家，這類用家不但會頻密地用手機玩 Facebook、WhatsApp、LINE 等社交平台，以及上網睇網頁，甚至會用串流方法欣賞音樂（例如：KKBox、Moov 等）、高清影片（例如：YouTube、煲劇 APPS 等）、或者玩線上手機遊戲。有些用家甚至會間或將手機網絡分享給其他裝置，例如：手提電腦、平板電腦等上網使用。如果你是這類用家，就應該選用中用量計劃了。
iPhone 7 6GB 計劃分析
從下表可見，在各網絡商的中用量月費計劃中，無論是購買哪個容量的機款，中國聯通香港的平均月費仍然係最平的！如果大家每個月數據用量唔算少，但又唔想俾太貴月費，可以考慮從中國聯通香港入手 iPhone 7。如果大家唔 like 中國移動香港，其次抵玩的就是中國移動香港。至於再其後的排名，如果係 32GB 及 256GB 容量的話，先後次序分別係 3 香港、csl、SmarTone 及 1o1o；至於 128GB 容量，依次就係 3 香港 / csl、SmarTone 及 1o1o。
iPhone 7 Plus 6GB 計劃分析
從下表可見，大機的 6GB 數據月費計劃入面，中國聯通香港依然「玩哂」，繼續以 $239.5 – 247.8 / 月淨月費成為最抵玩的上台出機網絡商。之後的次序方面，32GB 來講依次為數碼通、中國移動香港、3HK / csl 及 1o1o；而 128GB 及 256GB 來講，就依次為中國移動香港、csl、3HK、數碼通及 1o1o。總括來說，如果你是中用量用家，在中國聯通香港出 iPhone 7 或 iPhone 7 Plus，都係最抵玩的選擇。
10GB 月用量可以做啲咩？
- 足夠大家每月上載 1,100 張相片（以每張 1MB 計算）
- 瀏覽 240 小時的網頁
- 欣賞 60 小時串流音樂
- 30 小時 256kbps 質素影片
- 6,400 段即時訊息（例如：WhatsApp）。
高用量 10GB ：中國聯通香港繼續完勝！
適合用家 :
這種高用量計劃十分適合極頻密使用數據網絡的用家，這類用家不只會做一般人在手機上會做的事，串流方法欣賞高清多媒體內容或無損格式音樂（例如：TIDAL）也是等閒事，甚至會一部手機透過 Tethering 方法分享 4G 網絡給多部裝置同時上網。更有甚者在家中也會用手機分享網絡給電腦上網（例如：住村屋的用家，用手機網絡上網隨時比用 8MB 固網寬頻快得多！！）。如果你是這種用家，高用量計劃就十分適合你使用了。
iPhone 7 10 GB 分析 :
從下表可見，今年繼續係除數碼通沒有提供 10GB 月費計劃外，其餘各網絡商均有提供俾大家揀。而最抵玩方面依然係中國聯通香港，每月只需要俾 300 蚊有找的淨月費就可以用得到。其次就分別為中國移動香港及 csl / 3HK，而 1o1o 依舊係最貴的選擇。
iPhone 7 Plus 10 GB 分析 :
從下表可見，中國聯通香港的 iPhone 7 Plus 上台出機月費計劃仍然是 5 間網絡商之中最抵玩的！其餘 4 間網絡商的話，排名依次為：中國移動香港、csl / 3HK 及 1o1o。所以如果你是高用量用家，無論想出 iPhone 7 還是 iPhone 7 Plus，中國聯通香港都係最抵玩的選擇。
總結 ：大機 32GB 入場平但月費相對貴
整體來說，如果單考慮價錢的話以上圖表已經告訴你答案：如果細機 iPhone 7 來講，無論是月費或者平均淨月費來講，各型號都差不多，有些台可能係 32GB 平均淨月費較貴，但有些台就所有容量型號的平均淨月費也是一樣，所以如果大家係打算入手細機，如果係用家的話按個人需要的容量選擇就好了；如果打算「劏機」的話，最好就揀一些所有容量的平均淨月費也一樣的網絡商，然後出「賺錢」潛力最高的高容量亮黑版會比較划算。至於大機來講，就與舊年一樣，同樣是細容量（例如：32GB）的淨月費一般比大容量（例如：128GB / 256GB）的機款貴，但今年大機多了雙鏡頭及 RAW 格式支援等，如果是用家的話，建議購買大容量版本較划算；如果係打算「劏機」的話，就更加應該考慮亮黑版的大容量版本了，因為月費平均來講會比較平呢！
總結 2 ：按自己需要選擇網絡商
上台出機，除非你的目的是「劏機」，否則還是要看自己的需要，決定選擇哪個網絡商比較好。那麼怎樣去決定自己需要在哪呢？其實看看每間網絡商提供的獨特服務，大家就可知道一二了，以下就讓小編簡單說說吧：
1010：最貴但可儲 Club 積分換 Asia Miles
1010 可說是月費最貴的網絡商，但一直以來也提供著尊貴服務，而且在 1010 上台出機，還可以賺取 The Club 積分，之後可以用來換取 Asia Miles 亞洲萬里通里數，對於想俾台費之餘又可以儲飛行里數的用家來說，是獨一無二的選擇。而且較高用量月費計劃，更會送 Club 積分或酒店住宿，對於追求玩樂享受的尊貴用家來講，都係不錯的選擇。不過建議想使用 1010 計劃的 unwire.hk 讀者，最好不要選 32GB iPhone 7 / 7 Plus ，因為平均月費相對地貴很多。
3HK：最多增值服務揀
3HK 最值得上台的地方，就係佢地係咁多個網絡商之中，提供最多增值服務俾大家揀的一間，當中唔少都幾實用，例如：想串流聽歌的有 KKBOX，想隨時隨地唱 K 有 Olegok、想睇電子書有 24 Reader、看雜誌等，就算想買 APP 但無信用卡，都有 iTunes 代碼服務，令大家可以係每月賬單入面扣數，兌換指定金額去買 APP、歌、片等。今年仲要送埋手機保險、玻璃貼、myTV SUPER 服務等，所以如果大家用得著呢啲服務，3HK係一個唔錯的選擇。
csl：隨時睇英超 + 外地打電話回港超方便
csl 月費雖然唔係最平，但勝在提供的免費服務夠吸引，雖然係增值服務上，唔夠 3HK 咁多，但簽月費後，唔止大家可以用「King 傾」，係外國個時只要身處 Wi-Fi 網絡環境，就可以免費致電回港，慳番唔少 IDD 長途電話費；而且 $408 月費或以上仲送條 nowTV mobile 621 台，俾大家隨時隨地都可以睇英超比賽，最啱各位球迷選用。另外，他們仲有 Moov 音樂串流服務，仲提供無損格式音樂串流俾大家欣賞，而且係香港的免費 Wi-Fi 熱點係最多的，就連便利店、甚至電話亭都用得，可以減低低用量用家爆 plan 的機會。今年仲要同 3HK 一樣，新增埋手機保險服務，就算跌爛機都唔洗太憂。不過要留意的是，前文提及的英超 621 頻道，是要用數據網絡睇的，對於 6GB 以下數據月費計劃的用家，因住睇一陣就爆 plan 呀！
SmarTone：可 0 息分期免預繳
至於 SmarTone，特別之處是如果使用指定信用卡上台及安排自動轉帳，就可以享有免預繳及 0 息分期計劃（當然會先從信用卡中扣除本身要預繳的信用額），不用一次過用現金或碌卡俾預繳，cash 運用上更為彈性。而且針對舊客戶，如果合約期少於 10 個月，可以選擇「加監」買機；又或者可選用「贖舊約」形式，以一筆過款項結束舊合約再簽訂新合約，算是較特別的服務。另外，今年仲加推 SIM Only 服務，上台可以買機，雖然要一筆過俾錢，但叫做可以揀只出 SIM 卡的 plan，而且仲要機價即減 $500，比係 Apple Store 買仲抵呢！
中國移動香港：港台中澳門四地跑用戶至愛
至於中國移動香港，平均「淨月費」雖然比舊年 iPhone 6s / 6s Plus 時貴了，但都只係輸俾中國聯通香港，而且加多少少錢仲有「飛常大中華」月費計劃，本地數據可以中、港、台、澳門 4 地共用，如果你是需要經常在這 4 個國家或地區周圍跑的 wire 民，就可以考慮中國移動香港了。另外，一如既往中國移動香港都可以在官網或 APP 買賣數據用量，如果個個月用唔哂就可以賣俾人賺錢，亦係他們獨有的服務呢！
中國聯通香港：至抵月費計劃多多
至於今年的 iPhone 上台出機「新丁」中國聯通香港，就取代了去年的「劏機王」中國移動香港，成為最抵月費計劃的網絡商，如果大家單純只是想用 4G 上網，又想格到最抵的話，中國聯通香港確實係最好用。另外，有些用家希望自行選擇自己喜歡的電話號碼選擇，中國聯通香港亦獨有推出自選號碼服務，可以自行選擇電話號碼最後的 4 位數字，十分有趣。此外，針對有些需要經常前往澳洲、日本或新加坡的用家，中國聯通香港亦是獨有提供「7 地合 1」數據服務，只要每月加 $38（每地區計），在這些國家以 data 上網，用量就可以從香港本地用量中扣除。不過要留意的是，中國聯通香港的月費計劃既不支援 MMS（但其實不算太多人用），亦沒有提供免費 Wi-Fi 服務（這個比較緊要！！），即是說如果在街上上網，大家就要局用 data，所以如果你是高用量用家，又想在中國聯通香港上台的話，建議選擇較多數據用量的月費計劃會比較安全。
如果大家想瀏覽比較表的詳細資料，可以點按以下連結參閱：
[UNWIRE.HK] iPhone 7 香港各網絡商月費計劃比較
https://docs.google.com/spreadsheets/d/1cHQ74prWNWdGPgC7mj4t7QKsYzW-L__A5k1IYJztcNo/edit?usp=sharing
[UNWIRE.HK] iPhone 7 Plus 香港各網絡商月費計劃比較
https://docs.google.com/spreadsheets/d/1KGna5u-Jh017X0CKKOt33SkRy_QzlUhQuO-L5wV46lg/edit?usp=sharing
Leave a Comment