雖然穿戴式智能裝置愈出愈多，但智能眼鏡的發展好似一直停滯不前。就連 Google Glass 都停止發展的時候，MAD Gaze 智能眼鏡原來已經出到第二代，仲唔駛戴住眼鏡都用得添！我依莉詩今日就去咗 MAD Gaze X5 AR 眼鏡的發佈會，一於同大家一齊睇下啦！
戴唔戴眼鏡都用到
MAD Gaze 的智能眼鏡相信各位 wire 民都應該聽過。出名的原因不但因為係香港公司研發，更因為喺超額 kickstarter 集資成功，不過最受關注的應該都係抄襲 Google Glass 疑雲。不過見到呢副 MAD Gaze X5 無框智能眼鏡之後可能會另眼相看。外觀上，MAD Gaze X5 不再需要連眼鏡框一同配戴，可以利用夾與自己帶開的眼鏡連接，又或者裝上頭箍戴上，對經常又戴 con 又戴眼鏡的人來說係好消息。不過亦因為沒有了固定的支撐點，所以頭部郁動大的時候會出現搖晃。我諗未必可以戴住跑。此外，MAD Gaze X5 除了配備 1080P高清鏡頭及 800 x 480 穿透式顯示屏 用作拍攝外，因為需要顧及第 3方 Apps 的發展，所以硬件亦比 Google Glass 優勝，內置 1.3 GHz 的四核處理器、九軸運動追踪 、 2 GB RAM 及 32GB ROM。使用 MAD Gaze X5 拍片及影相都十分順暢。
▲ 將 MAD Gaze X5 裝上頭箍就可以使用，唔一定需要戴眼鏡，睇落型好多呢！
▲ 亦可以夾將 MAD Gaze X5 夾係平時戴開的鏡框上，咁就可以成日換眼鏡都無問題。
▲ MAD Gaze X5 都幾輕身，同一般藍芽耳機差不多，所以夾係眼鏡上都未算太唔平衡。
▲ 雖然話唔同款式的鏡框都可以夾到，但如果邊框太幼都未必可行。
6種操控模式支援廣東話
唔少智能眼鏡都依賴語音控制，如果英文唔多好都控制唔到，而 MAD Gaze X5 除了支持英文外，更支援廣東話同國語，不過因為發佈會現場太嘈，所以未能試到。除了語音控制，MAD Gaze X5 還有 5種控制方式，包括光感感應、用手機 Apps 控制等。而我今次只試了利用邊框的按鈕及多點式觸控板控制，基本的上下、左右、返回都容易控制，感應都順暢快捷。
▲ MAD Gaze X5 除了語音控制外，還有 5種控制方式，新手使用都唔會太手忙足亂。
▲ 邊框有 4個按鈕及多點式觸控板，可以控制 MAD Gaze X5。
▲ 官方表示電量可以用到 6小時，似乎未可以長期帶。
▲ 因為私穩問題，影相同拍片時都會有聲音提示，所以想偷拍都幾難。
▲ 800 x 480 穿透式顯示屏同 Google Glass 相似，都係立方體玻璃，睇的時間就好似有個手錶 size 的螢幕係眼前，會不自覺矇起對眼。
第一視覺 Facebook 直播
依莉詩：「唔戴眼鏡夾唔穩！」
今次試 MAD Gaze X5 的時間比較短暫，好多功能都未試到。外表上，MAD Gaze X5 都幾靚仔，唔駛限住戴咩眼鏡都可以戴算係一個突破，不過都唔太穩陣，我諗大郁動就未必用到。戴上去時好似睇到個迷你螢幕係眼前，會不自覺矇起對眼，短時期感覺都良好，唔會暈。用多點式觸控板控制感應都順暢快捷，而功能都算多，足夠日常使用。 唔駛 5千蚊就買到，追求新科技的朋友可以試下啊！
MAD Gaze X5 AR 眼鏡
售價：$4999
