唔經唔覺又萬聖節啦！經歷上年多間嚇破膽的鬼屋之後，我依莉詩已經咩都唔怕，夥拍水哥組成「萬聖節敢死隊」再次出發，深入海洋公園、迪士尼甚至各大商場的鬼屋，為大家報告情況。頭炮就喺海洋公園其中 3間鬼屋，我過穿過鬼影幢幢的校園、狂野酒吧，捕捉一隻隻惡鬼。
依家乜都興懷舊，就連鬼片都要番炒。呢間鬼屋就以八十年代經典電影《捉鬼敢死隊》做主題，而且仲有兩種體驗。首先要到捉鬼敢死隊學堂學習捉鬼槍的用法，等你一展槍法，一嚐捉鬼的樂趣，大人細路都啱玩。之後穿過鬧鬼大宅、凶靈地下鐵、紐約時代廣場等一個個經典場景，親身體驗電影經典對白「遇到衰鬼，急Call捉鬼敢死隊最有計！」不過大家要留意，兩個部份不但分開玩，仲要分開排隊，要玩晒兩 part 記得預番時間啦！
位置：高峰樂園動感天地
開放時間：上午 11 時 – 晚上 11 時
▲ 生還者失驚無神出現，比鬼更嚇人呢！
▲ 又一個無啦啦彈出的生還者，演技好好呢！
▲ 唔知呢位 OL 被咩嚇親呢？
▲ D 鬼口水好核突啊！
▲ 鬼屋入面無棉花糖鬼有少少失望。
用槍玩的鬼屋已經唔係第一次搞，但今次捉鬼敢死隊學堂明顯係俾小朋友玩，用雷射槍射牆邊的紙板，有 D 似迪迪尼的巴斯光年，刺激感大減。而且見唔到棉花糖鬼有少少失望呢！幸好另一邊的電影經典場景鬼屋場景相當逼真，一個個生還者出現營造恐懼氣氛，令你想快快逃離災難現場。
驚嚇度 ★★★☆☆
必玩指數 ★★★★☆
捉鬼敢死隊做主題嘅鬼屋無咁恐佈，以往玩過有啲鬼屋嘅鬼係會追住你一排，但係捉鬼敢死隊就無呢個情況，而且出現驚嚇場面亦無咁密，可以同一啲比較細膽嘅朋友一齊玩！
驚嚇度 ★★★★☆
必玩指數 ★★★☆☆
讀過書的人都應該聽過 3樓女廁有鬼的故事，聽就聽得多，就好似無人真係見過。不過呢間位處山上的陰森荒廢校園，就一定有啦！走過鬼影幢幢的走廊，直搗校園墓地，你就會搵到驚慄故事背後的謎團。
位置：高峰樂園極速之旅旁
開放時間：下午1時 — 晚上11時
▲ 校園內無論學生定校工都好似撞邪一樣。
呢間係今次 3間鬼屋入面最恐怖的一間，每一個學生都好似撞邪一樣，有突然 D 自殺，亦有 D 被謀殺。由走廊、課室到校園墓地，一個場景比一個場景恐怖，由學生變成怨靈係身邊出現。如果唔係傳媒可以開 LED 燈，我真係唔敢向前行。
驚嚇度 ★★★★★
必玩指數 ★★★★★
如果一定要玩一間最刺激嘅，我覺得一定要玩屍立中學呢間鬼屋，鬼嘅數量密集好多，而且好多通道都好窄，唔可以並排過，有時我要行先都驚驚地！
驚嚇度 ★★★★☆
必玩指數 ★★★☆☆
係殭屍王唐禹哲的豪宅內每日都會舉辦盛大的狂野派對，但係狂野派對中，原來危機處處。據說唔少人會係忘我舞蹈之際，走進豪宅的秘密暗室，被嗜血成性的恐怖殭屍捉到後就再無出過嚟。
位置：高峰樂園登山纜車廣場
開放時間：下午1時 — 晚上11時
▲ 一開始大家都係度飲酒享樂，超瘋狂呢！
▲ 不過呢個 3D 唐禹哲好似有 D …
參加派對前大家都要先同殭屍王唐禹哲立約，方法有些少驚喜，縮手都縮唔切。之後進入酒吧，氣氛就好似一個迷幻派對，無數個假公仔忘我舞蹈，亦真亦假。當你覺得一 D 都唔恐怖反而搞笑的時候，原來已經不知不覺發現忘我背後的危機，廁所同後行入面的竟然係一隻隻吸血殭屍，睇嚟頭腦要時刻保持清晰先得。
驚嚇度 ★★★☆☆
必玩指數 ★★★☆☆
咁多間鬼屋我相信氣氛最輕鬆就係呢一間了，入面似入左酒吧。仲有少少人隱藏咗係度出奇不意地嚇你，整體嚟講，唔算太恐佈。
驚嚇度 ★★☆☆☆
必玩指數 ★★★☆☆
▲ 以往買普通門票就已經可以入晒鬼屋入面所以房，不過今年就係【16禁】、【屍立中學】、【心慌血色吧】及【血祭宮殿】留咗 4個秘密暗室俾優越門票持有人玩。如果想玩埋就要俾多 D 錢啦！
睇完呢 3間鬼屋，對於追求刺激嘅朋友可能會有少少失望，不過唔洗心急住，下星期我地「萬聖節敢死隊」會再出發，同大家直擊重口味的 SM 【16禁】，同埋要用 AR 技術打開天眼先玩到的【照妖宮殿】，記得留意啦！
海洋公園哈囉喂全日祭2016
日期：2016年10月2、7-10、14- 16、20-23、27- 31日
開放時間：早上10時至晚上11 時
票價：成人 $ 385 ；小童（3 至11 歲）$193
哈囉喂優越門票：成人 $730 ；小童（3 至11 歲）$365